Read Hrangkhol FESUAKNA 26 Bible Online

FESUAKNA 26 - Hrangkhol bible

FESUAKNA 26

¹“Puan in irthiang, ki omna puan in chu patzâi irhmi thûr sai, samul rông dum, a senduk le a sen inpôl cherub dûr a ze enhoi taka zep, puan hlek sômkhat không sai hmangin sin ro.

²A hlek murdi kha irtiat natin, mûk sômhni le kiriata sei, a khang mûk minlia sei, siam roh.

³A phêk ringahai kha insui irkoptirin lân, a dang ringa khom kha khaang dên khan tho roh.

⁴Ringa hmor insui irchunna hmor taka khan a mikuar, pat dum inhrual leh ni inkhop chit hrang a ni.

⁵Mikuar sômringa seng a’rkop inhnia khan inkhophai roh.

⁶A mikuar le irkoptirna hrang rângachak kuaikim sômringa siamin lân, kha khan puan insuiin irkop inhnihai chu inkhâihaiin lân, khanchu puan in chu puan phêk khata siam chang thei ta a ti.

⁷“Puan in chung chu kêl mul puan hlek sôm hleikhata không hrang a ni.

⁸A’rhlek tin kha a irtiat hrang, mûk sômthuma sei le mûk minlia khang lianin siam roh.

⁹Ringa kha buk khatin insui irkoptir sa roh. A’rhlek kirukna kha puan in maton tiang khan ni ithep hrang a ni.

¹⁰A rênga insui irkop maton tak le hnungkhôn tak hmora khan a mikuar irang natin sômringa inkhopin lân, a mikuar sômringa insui irkop dang hmora khan inkhop sa roh.

¹¹Dâr sen kuaikim sômringa siamin lân, in chung inkhata siam hrang puan in inhnihai irzom hrangin, a mikuarhai khan inkhop roh.

¹²A chimrip la om kha chu puan in hnung tiang khan kâi chian ri se.

¹³A sîr inhni tiang khan mûk khat a sei la om a ti; a’rkhûna hrangin a sîr tianghai khan nin insei hrang a ni.

¹⁴“A chung irthua inrâng inhni, kêlbelra vun, le savun a sazât hmangin siam sa roh.

¹⁵“Puan in banga intung hrang sitim thing irfangin lân;

¹⁶mûk sôma irsângin a khang lian mûk khat a chimripin siamin lân.

¹⁷Chontan tina khan a’rzomna hrangin a’rlût mat theia a ke inhni a iom hrang a ni. Puan in chopui danghai khom, khaang khan thohai ving roh.

¹⁸Sim tianga banga khan chopui sômhni siamin lân,

¹⁹sumru invit ir-ông sômminli a hnuai tianga omin, chopui hnuaihaia khan a ke inhni irlût theina hrang sumru invit sai inhni a ikop chit hrang a ni.

²⁰Puan in maton tianga khan intung hrang chopui sômhni siamin lân,

²¹sumrua siam an toina sômminli a chopui irkipa inhni kop saiin siam sa roh.

²²Nitâk tianga puan in hnung tianga hrangin chopui kiruk siam sa’n lân,

²³a kila om hrangin inhni chu se sa roh.

²⁴A sîr taka chopuihai chu a bula irthokin a sîp dênin ni irkoptir chit hrang a ni, a kila bang hrang chu a kil irzom sai a ini hrang a ni.

²⁵Khaang khan chopui kiriat, sumrua siam an toitirna sômhleirukhai le om a ta, inhni senin om sa a ti.

²⁶“A bang tung indetna hrang chu sitim thing tuan sôm hleiringa siamin lân, a banga khan banglâi ringa in om sa sianlân,

²⁷a hnung tiang ringa, a sîr tianghai khan ringa sengin om sa ri se.

²⁸A laia banglâi khan puan in bang kha a irtongtir hrang a ni.

²⁹Thing chopui intung kha rângachaka tuam hrang a ni, an sui irkoptirna hrang banglâi tung inkhopna hrang rângachak irki neia siam sa hrang a ni, rângachak ngêta siam ni ri se.

³⁰Puan in chu tâng chunga an dûr nang ki irhmu ang zekin siam roh.

³¹“Chontana zâr hrang patzâi irhmi samul dum a senduk le a sen pôl không sai, a’rvôna cherub dûrhai zepin siam roh.

³²Rângachaka tuam sitim chopui minliin siamin lân, a toina hrang sumru tumin siam sa roh. Chopui khan thil inkhâina hrang kuaikim siamin lân, kha khan puan kha zâr roh.

³³Puanzâr tentan sûnga khan Thuthung Bôm a sûnga lungphêk inhni om kha se’n lân, puanzâr chu hmun irthiang tak le Hmun Irthiang kâr indangna ni a ti.

³⁴Thuthung Bôm chu a sîngna leh sîngin lân, hmun irthiang taka khan se roh.

³⁵Hmun Irthiang tak pên tiang dokâng kha, hmâr tiang khan sia’n lân, meiser siana chu sim tiang pang khan om ri se.

³⁶Puan in mikota zâr hrang patzâi irhmi thûr sai samul dum, a senduk le a sen pôl a’rvotirna hrang puan không hrang a ni.

³⁷Kha zârna hranga khan sitim thing chopui ringa rângachaka tuam, a toina dâr sen ir-ông inthûk le an khâina hrang thil incher rângachakin siam roh.