Read Hrangkhol FESUAKNA 30 Bible Online

FESUAKNA 30 - Hrangkhol bible

FESUAKNA 30

¹“Sitim thing le mirimhoi hâlna hrang maichâm siam roh.

²Irki minli nei mûk khat vêla sei, a’rsâng lam mûk hni ni sianlân, a’rki minlia khan a’rki inchor maichâm leh tuan khata siam om ri se.

³A chung tianga incham, irki minlihai, a’rkihai chu rângachak rônga inluan hrang a nia, a hmor tiang chu rângachaka tuam hrang a ni.

⁴A irzônna hmol rolna hrang rângachak irkual inhni siamin lân, a sîr hitiang, hitiang a hmor hnuaia khan inkhop roh.

⁵A zônfung chu sitim thing ni sianlân, rângachak leh ni ituam hrang a ni.

⁶Hi mirimhoi hâlna maichâm hi Thuthung Bôm maton tianga puanzâr inkhâina maton tiang khan intoitir roh. Kha hmuna khan nang ki irhmupui hrang a ni.

⁷A zîng tin, Arona’n meiser infâi balamin, mirimhoi thil a inhlan hrang a ni.

⁸Khohloi tiang meiser an chok zoro khomin khaang khan a itho ngêt hrang a ni. Zoro la hong om thiai maia khom, hi mirimhoi thil inhlan hi irngam loiin a irzôm mai hrang a ni.

⁹Hi maichâm chunga hin hâl phal loi, thil mirimhoi, hme thil inhlan mo, bu thil inhlan mo, kha hnung uain khom thilin ni inhlan hrang ni mah.

¹⁰A kum tin voikhat, sual irbôlna thil inhlan thisen chu, Arona khan maichâm thâr irthiangna hrangin a’rki minli khan a ipol hrang a ni. A kum tin zoro la hong oma khan tho mai hrang a ni. Hi maichâm hi keima RENGPA kuanga inhlan a irthianghai hrang a ni,” tiin.

¹¹RENGPA khan Mosia kha hiang hin a ti pea.

¹²“Irteppui zoroa a mi Israel mihai chunga vânduaina irkhêl a tung loina hrangin, mi tinin mâni hringna irtanna an ipêk ving hrang a ni.

¹³Irteppuia om murdi an pêk hrang dôr sum an inkung chu an ipêk ngêt hrang a ni. Ki omna puan ina hrang, varna le diktaka varh sekel chimrip, Gera sômhni an pêk ngêt hrang a ni. Mi tinin sekel chimrip ki kuang thilinhlan an inei ving hrang a ni.

¹⁴Irteppuia tep kum sômhni chung tianga mihaiin RENGPA kuang hiang thil hi an inhlan ving hrang a ni.

¹⁵An hringna irtanna hrang RENGPA kuang an inhlan zoro khan sekel chimrip, mi tinin an inhlan ving hrang a ni. Mi irchong khomin hi nêka tam a inhlan hrang ni mah. Mi inriang khomin hi nêka tôm a inhlan hrang ni ual mah.

¹⁶Israel mihai laia irthokin hi hringna irtanna sum hi irfuangin lân, ki omna puan in enkolna hrangin hmang roh. Hi khâzana hi an hringna irtanna hranga chôi ni a ta, anni ki sûnghual ti inhriatmaina hrang ni a ti,” tiin.

¹⁷RENGPA khan Mosia kha a ti pea,

¹⁸“Dâr tâbora toina hrang dâr thîrin siamin lân, puan in le maichâm kâra intoitirin lân, tui om mai ri se.

¹⁹Arona le a nâihai khan an kut le ke irsûkinfâina hrangin tui kha an ihmang hrang a ni.

²⁰Uain inna mo, fâk nêk zongna mo thil inhlanna hranga maichâm an pan mân khan chu thatin om no nihai.

²¹An thi loina hrangin an kut le ke an irsûk ngêt hrang a ni. Anni le an irchihaiin kumtuanga an hmang hrang chu a ni,” tiin.

²²RENGPA khan Mosia kha hiang hin a ti pea,

²³“Mura tui her ruk, thingzungthum mirimhoi her thum, thing rimhoi her thum,

²⁴kesepât thing her ruk, ki omna puan ina hmang lai her leh varh kha lakhômin lân, oliv hriak litar minli leh polin lân,

²⁵mirimhoi irpol anga irthiang takin siam sa roh.

²⁶Ki omna puan in thuthung bôm.

²⁷Dokâng le hmangrua danghai, meiser siana le hmangrua danghai, mirimhoi hâlna hrang maichâm,

²⁸Thil inhlan hâlna hrang maichâm le a hmangrua murdihai, tâbor irthûlna le an toitirnahai inlâpna hrangin kha kha hmang roh.

²⁹Hi thilhai hi fel takin serindangin lân, hong irthiang khak an ta, mihriam mo, i dang khom a hong tônpu dôr chu a’rthiangna irtha khan a innatirhai hrang a ni.

³⁰Arona le a mihai chu ki sintho hrangin sahriak hi polhaiin lân, ochai hrangin namindethai roh.

³¹Israel mihai chu hrilhai roh. Hi hriak irthiang hi ki sinthotu ni hranga serindang zoroa irpol hrangin hmang mai ngai hrang a ni.

³²Mi pangaihai chu pol hrang ni maka; thil dang dang irpol ngai dân hmangin a dang nin isiamsuak hrang ni mah. Thil irthiang a nia, nin iser ok hrang a ni.

³³Hianga irpol hrang sahriak le thil danga ki siamhai mo, ochai rua ni loi lei pol mihai chu ki mihai laia inkhat khom tep ni no nihai,” a tia.

³⁴Khan, RENGPA’N Mosia kuang, “Hi mirimhoi Netep hai, Sekelet hai, Kalbana hai, Bero irfîmhai ir-angsarin la’nlân,

³⁵mirimhoi sinpu sin dân angin mirimhoi takin siamin lân, fâi tak le irthiang taka a om theina hrangin michi pol roh.

³⁶Vîkkham viatin lân, nôiinditir ro, nang ki’rtongpuina hrang hmun, irtongna Biakbuka Thuthung Bôm maton tiang khan sia’n lân, nangma ta hrangin irthiang tak ni a ti.

³⁷Hi mirimhoi sin dân hranga hin, nangma ta hrangin mirimhoi zel siam ta no ro, RENGPA ta hranga hual a ni sikin, thil irthiang tak ni ibe ta hrang a ni.

³⁸Mi tukhomin khaanga mirimhoihai kha mâni hmang hrangin a siama ni’n chu a mihai lai ata ipai ni a ti,” tiin.