Read Hrangkhol FESUAKNA 31 Bible Online

FESUAKNA 31 - Hrangkhol bible

FESUAKNA 31

¹RENGPA khan Mosia chu hiang hin a ti pea.

²“Uria nâipa Bezalela, Hura tupa Juda nama mi chu kin thang tâka,

³kut sinthei le irfûktir theina, thil i ang khom siam hranga kutsintheina nei hrangin ama kha ki sin theina hrangin ki insiptir a ni ta.

⁴Thil enhoihai ngaitua suaka, rângachak, sumru le dâr siam theina,

⁵lungmantam inkhop zât ât tan, thing a enhoi tak tak siam theina ki inneitir a ni ta.

⁶Ama changpui hrangin Dan nama mi Ahisamaka nâipa Oholiaba ki inthang sa a ni ta. Kut sinthei dang khom, sin hranga thu ki ipêk murdi siam theina ki ipêk sa a ni ta.

⁷Puan in sin an ta, Thuthung Bôm le a sîng, puan in timmatuahai,

⁸dokâng le hmangruahai, rângachak inzena siam meiser siana le a hmangruahai mirimhoi hâlna hranga maichâm,

⁹hâlirvôm thilinhlana maichâm, a tuibêl murdi leh, tâbor le an toina hai,

¹⁰Arona le a mihaiin ochai sin an tho zoroa an innghâk hrang ochai tukfam roiinpui,

¹¹Irpol zât sahriak, hmun irthianga hrang mirimhoi thil an isiam sa hrang a ni. Hi thilhai siam hranga hin thu nang ki ipêk ang takin an itho hrang a ni”.

¹²RENGPA’N Mosia kha,

¹³Israel mipuihai chu inhril hrangin thu a pêka, “Ki sabat nî hi an iser hrang a ni, nin irchi la hong om thiaihai hrang khomin keima RENGPA hi, nangni an thangsuaktu ki nih ti nin inhriatmaina hrang a ni sikin.

¹⁴Sabat nî hi nin ta hranga nikhua irthiang a nia, nin iser ngêt hrang a ni. Mi tukhom ser loia kha ni sûna sintho chu that hrang a ni.

¹⁵Mâni sinthôna hrangin sûn rukpa zel nin neia, a sûn sari ni chu irngam nikhua irthiang, keima hranga serindang hrang a ni. Mi tukhom hi nikhuaa sintho chu that ngêt hrang a ni.

¹⁶Israel mihaiin kin kâra thuthung an inhriatmaina hrangin kumtuanga ser mai hrang a ni.

¹⁷Keima le Israel mihai kin kâra thuthung irsinsiana det ni a ti; keima RENGPA hin sûn ruk sûngin irnêng le irvân ki siam zoia, a sûn sarina chu ki sin ki monga, ki irngam a ni ta,” a tia.

¹⁸Pathianin Sinai tânga Mosia a chongpui zoiin chu, ama Pathian ngêt khan a irziak thupêkhai chuangna lungphêk inhni kha Mosia kuang khan a pêka.