Read Hrangkhol FESUAKNA 32 Bible Online

FESUAKNA 32 - Hrangkhol bible

FESUAKNA 32

¹Mosia chu tânga a hong om insôta, kha hmun ata zuang chum lat loiin a om ti an hmu’n chu mipuihaiin Arona tiang an hong fekhôma, a kuang khan, “Tho a ni hruai hrangin pathian ni siam pe ro; Aigupta ram ata ni hruaisuaktu Mosia laka hi imo a ichang a ni ta, suak ta maka,” an tia.

²Arona’n an kuang khan, “Nin dôngmahai, nin nâipasalhai le nâinupanghai mikuar bet kuarkâihai khek unglân, ki kuang ni hong pe roi,” a ti pehaia.

³Khaang khan mi tinin an rângachak kuarkâihai kha an kheka, Arona kuang an hong chôi tâka.

⁴Ama’n kuarkâihai kha a lei lâka, an zôia, a suangna hrang hmun a isiam khan a buna, rângachak sehrâtchalte irlim an luan pehai tâka. Mihaiin, “O Israel mihai hi Aigupta ram ata ni hong hruaisuaktu ei Pathian kha a ni,” an tia.

⁵Kha thu kha Arona’n an hriatin chu, rângachak sehrâtchalte kôla khan maichâm a siama, “Nangtûk chu RENGPA chôiirsângna hruaithe ni a ti,” iti an puanga.

⁶Zînga chu irbôlnahai a hâl hrang le irngeina thilinhlan fa hrangin sahai an hong chôia. Mipuihai chu hruaithe fa hrangin an toi tâka, kha kha uain inrui inhnâi le taksa irzukna sinin an inchangtira.

⁷RENGPA khan Mosia kuang a ti pea, “Zu kîr nôk zel ta roh, mipui Aigupta ram ata ni hong ihruaisuakhai khan, sualin an ni ihnôl zoi tâk kêng.

⁸An lampui zui hranga ki iti kha an imâk tâk kêng; rângachak inzôia siamsuak sehrâtchal irlim chubai mûkin irbôlna thil an inhlan tâk kêng, ‘Ama hi Aigupta ram ata hruaisuaktu an Pathian kha a ni,’ an ti,” tiin.

⁹Hi mihai tukullian lam hi kin hriat infel a ni ta.

¹⁰Khasikin, lei dâihrekin lân, an chunga ki ning an mur oka, annihai khu thathai ving ki ti, khanchu nang le ni irchihai nam roiinpui takin siam ki ti.

¹¹Mosia’n RENGPA a Pathian chu intha loiin a kuang khan, “O RENGPA ni kut irnakhrât le ni sinthotheina hmangin Aigupta ram ata ni isansuak ni mihai chunga hiang dôra ni ning a inmur hi?

¹²‘Tâng rama that irhmang hrang pialin ni mihai hi Aigupta ram ata ni ihruaisuak a ni,’ tiin Aigupta mihai khan itin moh an iti thei? ni ningmurna insum zâmin lân, ni milung inchong thûlin hi vânduaina irkhêl hi ni mihai chunga insum no roh.

¹³Ni mi Abrahama, Isaka le Jakoba hai kha inhre maiin lân; ‘Irvâna ârsi tam dôr nêkin annihai kha irchi suanpâr pe hrang le ram ni inkung murdi an ta ni mai hranga kha,’ an irchi suanpârhai kuanga ni inkung kha inhre mai ro,” a tia.

¹⁴Khasika khan kêng RENGPA’N a lungrîl an danglamtira, a mihai chunga vânduaina irkhêl intungtir hranga a lei ihril kha a irlêktir a ni.

¹⁵Mosia chu tâng ata a chuma, lungphêk inhni hitiang hitiang thupêk sômhai chuangna kha a chôia.

¹⁶Lungphêk kha chu Pathian isiam a nia, thupêk sômhai chunga khan invera irziak a ni.

¹⁷Josua’n mipuihai khêk an hriatin chu, Mosia kuang khan, “Riakbuka irdoi irhâi kin hriat,” a ti pea.

¹⁸Mosia khan, “Zoina khêk irhâi mo, an dinghmun siatna irhâi chu ni le irhoi ma; raifân hlasak irhâi a ni,” a tia.

¹⁹Mosia khan sehrâtchal le mipui lâm sup sup hmu’nfel theina hranga riakbuk kha a zu nâiin chu, a ning an mur pe tak taka, tâng kôla khan lungphêk a ichôihai kha dêngzuanin an khoipai ta.

²⁰Sehrâtchal irlim an isin kha a lâka, an zôia a suk indi chita, tui leh a’rzêla, Israel mihai kha an intirhai ta.

²¹Arona kuang khan, “Itin takin mo hi mipuihai hin sin an itho, hiang dôra sual sin irkhêl an itho tâk hi?” a ti pea.

²²Arona’n hiang hin a ti, “Ki chunga ni ninginmurtir viat no ro; hi mihai hin thilsual tho hrang an irzuk dop dop ti chu ni inhriat mo ni ma,

²³anni hin ki kuang, ‘Tho a ni hruai hrangin pathian ni sin pe ro; Aigupta ram ata ni hruaisuaktu Mosia laka imo a thurchi a ini tâk inhre ta ma unga,’ an ni tia.

²⁴An rângachak irvôna thilhai ki kuanga hong chôi hrangin ki hrilhaia, a neipuhaiin chu an kheka an ni ipêk a ni. Kha thilhai kha meia ki rôa, hi sehrâtchal hi a hong irsiamsuak zel a ni,” a tia.

²⁵Mipuihai chu an nuam an ningin an oma, an râlhai en nuam loi rak hrangin Arona khan a len lêngtirhai tih Mosia khan a hmuin chu,

²⁶riakbuk mikota khan a ngîra a khêka, “Mi tukhom RENGPA tianga kop murdihai chu, ki kuang hin hong ri sehai,” a tia. Khanchu Levi irchi murdihai chu ama an hong bûma,

²⁷an kuang khan, “Israelhai RENGPA Pathianin nin rêngin mâni khandai lâkin, hi riakbuk kotbâi ata kotbâi dang dênin urêng danghai, a rual le chim an tualbômhai that hrangin thu a pêka,” a tia.

²⁸Levihai khan thupêk kha an zôma, kha ni sûn khan mi sâng thum vêl an ithat irman a ni.

²⁹Mosia’n Levihai kuang khan, “Mâni nâi le urênghai that ten khom RENGPA hrangin nin irpêka, sat chu nangni vur ngêt a ti,” a ti pehaia.

³⁰Zînga chu Mosia’n mipuihai kuang khan, “Sual ichiom tak nin itho a ni ta; khan atûn hin RENGPA kuang tânga hong fe nôk ki ta, nin sual inboi hrangin ngaidamna ki hmu duaiin chu,” a tia.

³¹Mosia chu RENGPA kuang a kîr nôka, “Hi mihai hin sual ichiom tak an lei tho tâka, rângachak tui leh millim an siama, Pathian angin chubai an lei imûk a ni ta.

³²Ngaihoi takin an sualna ngaidamin lân; khan ni ngaidam nuam zel no’n chu, ni mihai irhming chuangna bu ata kha, ki’rhming khom kâtpai ro,” a tia.

³³RENGPA’N hiang hin a sâma, “Ki lekhabu ata ki ikâtpai hrang chu, ki chunga thilsual thotuhai irhming vai kêng a ini.

³⁴Atûn hin fe’n lân, nang ki ihrilna hmuna khan ni mihai hi hruaihai roh. Ki vântirtônin nang a ihruai hrang a nih ti hi inhre mai ro, hi mihai an sual sika dûk ki ithohaina hrang nikhua khom anâi teng ta,” a tia.

³⁵Khaangin sehrâtchal irlim hranga Arona an insintir sikin RENGPA’N mipuihai laia hri an lêngtir ta.