Read Hrangkhol FESUAKNA 34 Bible Online

FESUAKNA 34 - Hrangkhol bible

FESUAKNA 34

¹RENGPA khan Mosia kuang hiang hin a ti pea, “Matona ang dêna lungphêk inhni siamin lân, ni inkhoi lungphêk masahaia chuang thuhai kha irziak nôk ki ti.

²Nangtûk zînga irsiamin lân, tâng sîp taka ni hmu hrangin Sinai tânga hong lui roh.

³Mi dang tûte an hong ilui sa hrang ni ma, tâng kôla khan kêlbelra mo sehrâtin mo fâk an izong hrang ni ma,” a tia.

⁴Khaang khan Mosia khan lungphêk inhni a siama, RENGPA thupêk ang lam takin zîng nôka chu a luipui tâka.

⁵RENGPA chu sûmlaia a zuang chuma, a kôla a ngîra, a’rhming RENGPA iti kha a zuang tia.

⁶A maton tiang fe angin RENGPA khan, “Keima RENGPA hi khonza le satna sip Pathian chu ki nia, a ninginmur zel ngai loi lungkhamna lian le iamomna inlang ngaitu chu ki ni.

⁷Suanpâr dênin ki chonginkung tho ngaitu, pualoina le tehelna le sual ngaidam ngai; khan nu le pahai sualna sikin nâihai le tu le te irlo inthum le minli dên khomin dûk intongtirhai lêk no ning,” a tia.

⁸Mosia chu inrang takin khûksadelin a kûna, chubai a mûka.

⁹“RENGPA ni milung ki chuk tak takin chu kin kuanga fe sa hrangin nang ki ngên. Hi mihai hin an tukullian bâk khomsian, kin pualoina le sualnahai nin za’n lân, ni mi ni hrangin ni pom ro,” a tia.

¹⁰RENGPA’N Mosia kha hiang hin a ti pea, “Israel mihai le thuthung atûn hin kin isiam a ni. Rammual kho hmuna le tu nam chunga ki la itho ngai loi thil roiinpuihai an mit hmu ngeia tho ki ti. Thil irkhêl tak nin ta hrangin ki itho hrang a ni sikin, nin omna hmuna mi tinin keima RENGPA’N thil roiinpui tak ki itho thei lam hi hmu an ti.

¹¹A vuana dân nangni ki ipêkhai hi zôm ngit unglân, malam nin pan thiai lai hin, Amor-hai, Kanaan mihai, Hit mihai, Periz mihai, Hiv mihai le Jebus mihai inhnotsuakhai ki ti.

¹²Nin fena hrang rama mihai leh khan thuthung nin isiam hrang ni ma, kha kha nin ta hrangin thina a ini thei hrang a ni sikin.

¹³An maichâmhai setpai unglân, an lungphunhai insiat unglân, pathiannu Aseri irsinsianahai insiat zit roi.

¹⁴“Pathian dang chubai nin imûk hrang ni ma, RENGPA, a’rhming khom “hnarsasia” chu Pathian hnarsasia tak a ni sikin.

¹⁵Kha rama mihai leh khan thuthung siam no roi, an pathianhai chubai mûka irbôlna an inhlan zoro khomin, kop sa hrangin nangni fial an ta, an pathianhai laia fâk an inhlan kha fa sa hrangin nin irzuk hrang ni mah.

¹⁶Nin nâipasalhaiin kha nam dang nupanghai kha dôngma’n lahai duai an ta, ki ta hrangin iamom loina om hrang le an pathianhai chubai nin mûkpui theina lampuia nangni an ihruai thei hrang a ni.

¹⁷Inluan millim pathianhai chubai nin imûk viat hrang ni mah.

¹⁸Baidi kût chu hmang mai ngai roi. Abib tha, ki zoro khita thu nangni ki ipêk ang khan sûn sari sûng chu chol pol loi bai nin ifâk hrang a ni; kha tha kha Aigupta nin mâkna zoro a ni sikin.

¹⁹“Nâilutîr pasal le sa a suak maton tak chu keima hrang a ni.

²⁰Sakuartung suak maton tak rêk chu a’rthûlin kêlbelrate inhlanin inhlan thei nin ti, nir hlan no’n chu a ring inher khiak pe roh. Nâilutîr murdi chu ni inhlan nôk ving hrang a ni. Tûte thilinhlan loiin ki kuang an hong inlang thei hrang ni mah.

²¹“Mâni sinthôna hrangin sûn ruk sûngpa reng nin neia, a sûn sari ni chu sin nin izong hrang ni ma, âlkai zoro mo, bu ât zoro mo i ang khomin nin irngam hrang a ni.

²²“Bu a tung masatak ât a’rphutin chu, favâng kût hmang unglân, phalbi lût tianga ni thei ra nin bûm zoro’n chu, kairêng kût chu hmang roi.

²³RENGPA Israelhai Pathian kuanga pasal murdi chu a kum tin voithum an hong inlang ngêt hrang a ni.

²⁴Nin mâna nam danghai ki len hnothaia, nin ramrihai kin liantir tena chu, hi kût inthumhai laia hin, RENGPA nin Pathian kuang inhlan hranga nin fe zorohai hin tûte’n nin ram lei long no nihai.

²⁵“Irbôlna hme nin hlan zoro’n chol kop loi ni inhlan hrang ni mah. Ferkân kût zoroa that sai hme hlek khat khom nangtûka hrang hôi no roi.

²⁶“Ni loia chîmu a tung masatak chu RENGPA ni Pathian ina hong chôiinlût ngai roh. Belrate mo kêlte mo a puinu irhnutui leh suang ngai no roh,” tiin.

²⁷RENGPA’N Mosia kuang khan, “Hi thuhai hi irziak suak ving roh, hi thuhai hi sirbia neiin nangma le Israel kuang thuthung ki isiam a ni,” a ti pea.

²⁸Mosia chu sûn sômminli le zân sômminli ite fâk le in loiin RENGPA leh an oma, lungphêk chunga khan thuthung chonghai thupêk sôm chu a’rziak tâka.

²⁹Thupêk sôm irziak lungphêk chôiin Mosia chu Sinai tânga irthokin a chuma, a hmêl chu RENGPA leh an chong sikin a ir-al puma, ama’n chu inhre thei maka.

³⁰Arona le Israel mipuihai khan Mosia kha an enzui maia, a hmêl chu ir-al phutin an hmu maia, a kôla va nâi hrang khom a sate’n an chia.

³¹Khan Mosia’n a koihaia, Arona le nam hruaituhai murdi chu a kuang an fea, Mosia khan a lei chongpuihaia.

³²Kha zoiin chu, Israel mi murdihai a’rhîlin an irbûma, Sinai tânga RENGPA’N a kuanga a ipêk dânhai chu Mosia’n a hrilhaia.

³³Mosia’n thu an sîr pehai zoiin chu, puan hmâiirkhûna leh a’rkhuma.

³⁴RENGPA leh chong hrangin RENGPA omna puan ina a fea, a hmâi irkhûna a hlîkpai ngaia, a hong suakin chu RENGPA’N a kuang a iti hrang thu a ipêk murdi kha Israel mipuihai an hrilhai ngai.

³⁵A hmêl ir-al phut kha an ihmu ngai a ni. Khanchu RENGPA chongpui hrangin a fe nôk mâka chu a hmâi a’rkhu nôk ngai.