Read Hrangkhol FESUAKNA 35 Bible Online

FESUAKNA 35 - Hrangkhol bible

FESUAKNA 35

¹Mosia’n Israel nam pumpui a koi bûmhaia, an kuang, “Hi hi nangni sin hranga RENGPA thupêk a ni:

²Mâni sinthôna hrangin sûn ruk reng nin inei a ni, sûn sarina ni chu irngam nî sûn irthiang, keima RENGPA hranga serir-up hrang a ni. Mi tukhomin ser loia kha nî sûna sin zong chu that hrang a ni.

³Sabat ni chu mei ten lua in sûnga khom nin itho hrang ni ma,” a tia.

⁴Mosia’n Israel mipuihai laia, “RENGPA thupêk chu hi hi a ni;

⁵RENGPA kuanga thilinhlan nei roi, tukhom a’rhlan nuamhai chu thilinhlan rângachak, tangka dârthîr,

⁶patzâiirhmi thûr sai, a dum, senduk le sen samul puan, kêl mula siam puan;

⁷kêlbelra chal a vun sen, savun a sazât, sitim thing;

⁸meisera hmang hrang oliv hriak, irthu theina sahriak, hâl hrangin thil mirimhoi;

⁹ochai Efod le a kôlvêla onik lung le lungmantamhai hong chôi roi.

¹⁰“Nin laia kut theithiamna nei murdi’n hong irsiamhai sian, RENGPA’N thu a ipêk murdi sin hrangin;

¹¹puan in a chung irkhûna le, hnuai inta ual inkhopna le thingtuai tângkhang, a chopuihai le a bangbul intoinahai;

¹²Thuthung Bôm zônfunghai, a sîng le a dâihlîm hrang puanzâr;

¹³dokâng zônfung le hmangrua dang a rêngin; Pathian kuanga inhlan bai,

¹⁴hâl invâr hrang meiser siana le hmangruahai; meiserhai le a tui,

¹⁵thil mirimhoi hâlna hrang maichâm le a zônfunghai, irpol zât sahriak, thil mirimhoi, puan in kotbâia sia hrang puanzâr;

¹⁶thilinhlanhai hâlna hrang maichâm a sîra dârthîr kopa zônfung le a hmangrua murdi irsûkinfâina tuibêl le a toihmun;

¹⁷dâia hmang hrang puanzârhai, a chopui le an toitirna dâi mikota hrang puanzâr;

¹⁸puan in le a dâi hêmvuakhai le a hruihai;

¹⁹Hmun Irthianga sintho hrangin an fe zoroa ochaihai innghâk hrang tukfam enhoi takhai; ochai Arona le a nâihai hrang songkol ser siam ri se,” a tia.

²⁰Israel mipui irbûmhai chu an chîn indara,

²¹a’rphaltuhaiin RENGPA omna puan in sinna hrangin thil an hong pêka, Pathian chubai mûk zoroa nang murdihai le ochai tukfamhai siamna hmangrua an hong chôia.

²²Mi irzukna neihaiin nupang le pasal irvôna irthei enhoihai, kuarkâihai, kutsabi hai, irthei rângachaka siam thil hlutak takhai an hong chôia RENGPA makunga mahrip takin an inhlana.

²³Mi tukhom patzâiirhmi a dum, a senduk mo, a sen samul pat, kêl mula siam puan kêlbelra chal vun a sen; savun a sazât neihaiin an hong chôia.

²⁴Sumru le dârthîr neihaiin RENGPA kuang an hong pêka, i ang khoma hmang thei hrang sitim thing neihaiin an hong chôia.

²⁵Mi kut theithiamna neihaiin patzâiirhmi an hong chôia.

²⁶Kêl mul khom satak thûr sai an hong chôi sa ngai.

²⁷An hruaituhaiin onik lung le lung mantam dang, Efod-a inkhop hrang le rôpphô târ hrang,

²⁸Thil mirimhoi le sahriak inchok thei hrang, irpol hrang le hâl hrang an hong tum ngaia.

²⁹Israel mi tukhom a nuam murdiin, Mosia kuang sin hrangin a thupêk anga hmang hrang thilpêkhai RENGPA kuanga an hong pêk ngai.

³⁰Mosia’n Israel nâihai laia khan, “Juda nam laia mi, Hura tupa Uria nâipa Bezalela chu RENGPA khan an thang tâka.

³¹Irfûktir theina thil i khom siam hranga kutsin theina le inhriat thiamna nei hrangin Pathianin a sinthotheina an siptira.

³²Thil enhoihai ngaituah suaka, rângachak sumru le dâr irfûktir theihai;

³³lungmantam inkhop hranga âttan, thing sin, thil enhoi chi tinrêng siam theina a ipêk a ni.

³⁴Dan irchia mi, Ahisamaka nâipa Oholiaba le an ruaiin mi dang kut theithiamhai irchutir theina RENGPA’N a ipêk a ni.

³⁵Thil siam theina, thil enhoi inhriat theina hai, puan zerhmi satak sin, a dum le a senduk le samul puan sen le puan dang không theihai, a ipêk a ni. I khom an sin theia, a hong irhoi hrang anga theina an inei tâk a ni.