Read Hrangkhol FESUAKNA 37 Bible Online

FESUAKNA 37 - Hrangkhol bible

FESUAKNA 37

¹Bezalela khan Thuthung Bôm hrang sitim thingin a dung mûk hni le a chimrip, a khang mûk khat a chimrip, a’rsânglam mûk khat a chimripin a sina.

²A sûng le a pên tianghai khan rângachak rôngin an luanhaia, a kil thophai khom rângachak leh a thopa.

³A zônfung rolna hrang rângachak irkual minliin a siama, bôm sîra a ke minlihai khan hitiang hitianghai khan inhni hniin an khopa.

⁴A zônfung hrang sitim thing leh a siama, rângachak le a tuama,

⁵bôm sîr hitiang le hitianghai khan a’rkualna khan a rola.

⁶Bôm a sîng hrang, a dung mûk hni a chimrip, a khang mûk khat a chimrip, rângachak felfatin a siama.

⁷Rângachak suk inphêkin cherub inhni,

⁸a sîng a seina tiang a siama, a sîng leh khan irzoma phêk khat a ni theina hrangin a isiam a ni.

⁹Cherubhai chu bôm sîng chunga khan hmâi irsongin an ir-en a ni, an mitha zârhai khan Thuthung Bôm sîng kha an ingha a ni.

¹⁰Sitim thing dokâng a dung mûk hni, a khang mûk khat, mûk khat le a chimripa irsâng a siama.

¹¹Rângachak felfatin a tuama, a kôlhai khom kha rângachak leh a tuam vinga.

¹²A hmor kutzapha dôra lian a siama, rângachakin a thopa.

¹³A’rzônna hrang rângachak irkual minli a siama, a kehai omna a kil minlia khan an khopa.

¹⁴A’rzôn zoroa zônfung rolna hrang irkual chu a hmor kôla khan inkhop a ni.

¹⁵A zônfung sitim thing leh a siama, rângachakin a tuama,

¹⁶rângachak felfatin dokâng hmang hrang le khênghai a siama, khênghai, khilâthai, bêlhai le khurihai uain inna hmangrua hrangin a isiam a ni.

¹⁷Rângachak felfatin meiser siana ôn sari nei an chera. An toina hrang le a ngul kha rângachak suk inphêkin a siama; a’rvôtirna pârhai, a’rmuam le pâr illimhai leh khan a irzomtir ving a ni.

¹⁸A ôn kiruka kungpuia irthokin an zara, a sîr tiang, hitiang hitiang inthum thumin a iom a ni.

¹⁹A ôn kiruk omna hmun tina khan a’rvotirna pâr irlim inthum, almond pâr irvut angin, a’rmuam le pâr anga om an khop sa.

²⁰A ngulpuia khan a’rvôtirna pâr almond pâr irvut anga om, a’rmuam le a pâr ang a iom sa a ni.

²¹A ôn chung inta le hnuai inta kâra khan, a ngulpuia khan a’rmuam inkhat illim a chuang chita.

²²Hi a’rmuamhai a ônhai le a ngulpui hi rângachak felfat phêk khat suk inphêka siam a ni.

²³Meiser siana ôn sari hranga meiser bûr, a lu inchor sari, meichephai le mei chôina hmunhai rângachak felfatin a siama.

²⁴Meiser siana le hmangrua danghai siamna hrangin rângachak felfat her sômthum ringa a ihmang a ni.

²⁵Sitim thing maichâm kil minli nei mûk khat vêla sei, a’rsânglam mûk hnia irsâng a siama, irki minlia inchor leh khan an tuanthal a ni.

²⁶Rângachak felfatin maichâm leh a’rkihai a thopa, a hmor indôr khom rângachak leh a ithop a ni.

²⁷A zônfung rolna hrang rângachak irkual inhni a siama, a hmor indôr hnuaia khan an khophaia.

²⁸a zônfung hrang sitim thingtuanhai a siama, rângachakin a tuama.

²⁹Hriak irthiang irpol zât, mirimhoi irpol zâthai a siam sa.