Read Hrangkhol FESUAKNA 38 Bible Online

FESUAKNA 38 - Hrangkhol bible

FESUAKNA 38

¹Thilinhlanhai hâlna hrang maichâm sitim thing le irki minli nei, mûk ringa sei, mûk thum irsâng a siama.

²A’rki minlia khan a’rki inchortirin a intuanthal a ni; dârin maichâm le a’rkihai kha a tuam vinga.

³Maichâma hmang hrang hmangruahai, irvut bêlhai; irvut luakna, khuri hai, thîr kuaikim le mei luakna dârthîrin a siama.

⁴Dâr tuana om hmor hnuai tiang khan irkualin an inkhopa, maichâm chimrip a idel a ni.

⁵A’rzônna hrang a kalna minli siamin irki minli khan an khopa,

⁶a’rzônna hrang sitim thing tuan a siama, dâr leh a tuama.

⁷Maichâm kil tianga kalna khan a rola, maichâm chu thingphêk leh a siama, a sûng chu a ir-ôngtir a ni.

⁸RENGPA omna puan in mikot kôla sintho ngai nupanghaiin hlîmena an ihmang ngai dâr irtêk ngaia irthokin dâr tâbor le a toihmun chu a siama.

⁹Patzâiirhmia không puan in kha a’rkula. Sim tianga puan mûk irzakhata sei puan a hmanga,

¹⁰chopui sômhni le an toihmun dâr sômhni, thil bângna hrang kuaikim le a zarna hrang sumru tuanhai siamin.

¹¹Hmâr tianga dâi khom khaang ngêt khan a nia.

¹²Nitâk tianga khan puan mûk sômringa sei a zara, chopui sômkhat le an toitirna hmun dâr sômkhat a siama, a chopuia khan thilinchor a oma, puan bângna hrang sumru tuan a om sa.

¹³Nisua tiang, mikot omna khom khan dâi mûk sômringa irzat a ni.

¹⁴Mikot irzat lam chu mûk sôm hleiringa a ni, a sîr hitiang hitianga zâr hrangin patzâiirhmi thûr sai không zoi loi a ni.

¹⁶Mikot kôla puanzâr murdi chu patzâi irhmia siam ving a ni.

¹⁷Chopui intoitirna chu dâra siam a nia, a kuaikim ngul le a chopui sîp tuamnahai chu sumru rônga siam a ni. A’rkulna dâr chopui chu a rênga sumrua inluan ving a ni.

¹⁸A lûtna mikota puanzâr chu patzâiirhmi thûr sai, samul dum, a senduk, a sen leh irzêl enhoi taka zepa không a ni. A sei lam chu mûk sômhni, a’rsâng lam chu mûk ringa; puan in irkulna puanzâr danghai anga khan;

¹⁹An toitirna dârthîr minli inver sai sûnga phun chopui minlia indet a ni.

²⁰Puan in le a irkulna dâi hêmvuak murdi kha dâra siam ving a ni.

²¹Thupêk sôm irziak chuangna lungphêk an isiana RENGPA omna puan ina sin hrang rângachak sumru le dârhai an ihmang tam lam chu hiang hi a ni. Mosia thupêkin ochai Arona nâipa Ithamara hruaina hnuaia Levi irchihai a tam lama insâp suak an ni.

²²Juda nama mi, Hura tupa Uria nâipa Bezalela’n Mosia kuanga RENGPA thupêk angin itinrêng a siama.

²³A sinthopui, Dan nama mi, Ahimasaka nâipa Oholiaba chu thil ker theia enhoi lam a siam thei, patzâiirhmi le samul dum, a senduk le a sena irzêla không nuam mi a ni.

²⁴Puan in irthiang sinna hranga RENGPA kuanga hrang rângachak an hong inhlan chu her sângkhat a ni, kha zoroa khotâng tho lam le ngaidân dik taka varin.

²⁵Irteppui an neia, mi tin an chôitum hranghai bituk an siama, sumru an hong ichôi bûm chu her sâng thum irzaminli sômthum a ikâi a ni, khotâng varh dân diktaka varin.

²⁶Hi hi kum sômhni kâia irteppuia tep sa chu, mi nuai ruk sângthum irzaringa sômringa haiin sekel irzakhat an hong ipêk irangpui kha a ni.

²⁷Puan in irthiang le puanzâr intoitirna irzakhat siam hrang sumru her sâng thum irzaminli hmang a nia, an toitirna inkhat hrangin her sômthum minli hmang a ni.

²⁸A hmang zoi loi sumru her sômthûm la om chu, Bezalela puan zârna thiltuan chopui hranga kuaikim le a sîp tuamna hrangin a siama.

²⁹RENGPA hranga dâr an ipêk chu her sâng hni irzaminli sômhni ringa a ni.

³⁰Hihai ata hin RENGPA omna puan in mikot toihmun dâr maichâm le indettirtu dâr tuan ram, maichâma hrang hmangrua murdi;

³¹puan in irkulna dâi le a mikot irnghatna hai, puan in le a’rkultu dâi indettu hrang hêmvuakhai a siamsuaka.