Read Hrangkhol FESUAKNA 39 Bible Online

FESUAKNA 39 - Hrangkhol bible

FESUAKNA 39

¹Samul pat dum, a senduk le a senhai hmangin hmun irthianga sin an tho zoroa ochaihai innghâk hrang enhoi tak le Arona ta ochai songkol ser chu RENGPA’N Mosia kuang thu a ipêk ang lam takin a siama.

²Efod chu rângachak patzâiirhmi thûr sai; samul dum, a senduk le a sen hmangin a khônga.

³Rângachak irphân dapin a sukinpêra, patzâiirhmi, samul dum, a senduk le a sen leh irpol hrangin a thêrhai zita,

⁴rôpbel inhni an sina, Efod kilhai khan an inkhopa, khahai khan Efod an intûk indetpui a ni.

⁵Konga Efod khit indetna hrang Efod ang zekin an siama, Mosia kuang khan RENGPA thupêk anga Efod leh khan an ikhông irkoptir a ni.

⁶Onik lungmantam chu rângachaka an inkhopa, enhoi takin Jakoba nâi sômhleihnihai irhming an irziaka.

⁷RENGPA thupêk ang takin Efod dâra irvôna khan an belsaa; kha kha Israel nam sômhleihni inlangna hrang a ni.

⁸Efod siamna hranga an thil hmang, patzâiirhmi thûr sai, samul dum, a senduk le a sen le rângachakhai hmangin rôpbel khom enhoi takin an không sa.

⁹Ithep a nia, thep zoiin irki minli nei, khâp khata chêng a ni.

¹⁰Lungmantam rân minli an inkhopa; rân maton taka khan Odam, Pitda le Bereka lunghai an siaa;

¹¹a rân inhnina khan Nopek, Safir le Emirald lunghai;

¹²a rân inthumna khan Tarkois, Agate le Amethist lunghai;

¹³A rân minlina khan berid, Onik le Jasper lunghai an siaa. Hi lungmantamhai hi rângachak inkhop indet a ni.

¹⁴Lung inkhata hin Jakoba nâihai inkhat irhming a chuang chita, Israel nam sômhleihni irthûla ngîr hranga iti a ni.

¹⁵Hi rôpbel hranga hin rângachak felfat zîngziri hruihrual irkin anga siam a ni.

¹⁶Lungmantam inkhopna hmun inhni rângachak le rângachak irkual inhni an siama, a’rkualhai kha rôpbel chung tianga a khilina hrangin an inkhopa.

¹⁷Rângachak zîngziri irkin kha a’rkualna khan an khita;

¹⁸hrui inhni inkhat tianga mongna hmora khan, a danghai chu a kopna hmun inhni khan a kop sa, khaangin, rôpbel intoina chu Efod dâr bângna maton tianga inkhâi a ni.

¹⁹Rângachak irkual inhni an siama rôpbel hnuai sîra khan an inkhopa, a sûng tiang chu Efod kôl zela khan,

²⁰rângachak irkual inhni an siam nôka, Efod dâr bângna inhnihai maton tiang hnuaia enhoi takin kongkhit chunga an inkhopa;

²¹Mosia kuanga RENGPA thupêk angin, rôpbel irkualhai chu Efod irkualhai leh khan hruihrual dum le an khit irkopa, rôpbel vêl chu kongkhit chunga i ang khomin a’rthôl loina hrangin.

²²Efod hnuaia innghâk hrang songkol irfual chu samul dum inzena không a nia.

²³Lu thunna hranga a ring ir-ông chu a chet loina hrangin, suisaruangmual neia iphiar a ni.

²⁴A hnuai tianga a hmor irfual khan patzâiirhmi samul dum, a senduk a sena siam dâlim dûr anga siam rângachak silniang kârirthâk inkhop a nia; Mosia kuanga RENGPA thupêk lam ang takin an siama.

²⁷Arona le a nâihai innghâk hrang songkol hnuai,

²⁸lukôm, le tuman an khônga,

²⁹patzâiirhmi thûr sai le samul dum, a senduk le a sen hmangin kongkhit enhoi taka irvôtirin an ikhông a ni, Mosia kuanga RENGPA thupêk lam ang taka khan.

³⁰Rângachak felfata irvôna thil irthiang an siama, kha khan “RENGPA HRANG TUM” iti an inchuanga.

³¹Lukôm maton tiang khan hrui dumin an inkhopa, RENGPA’N Mosia thu a ipêk ang taka siam a ni.

³²RENGPA omna puan in sinhai chu a hnungkhôn taka chu zoiin a om tâka. Israel mihai khan Mosia kuanga RENGPA thupêk lam ang takin itinrêng an isiam ving a ni.

³³Mosia kuang khan puan in le a hmangruahai an hong chôia; a kuaikimhai, thingphêk irfûk saihai, tângkhang hai, chopuihai le a in intoitirna hai;

³⁴a chung irkhûtirna kêlbelra chal vun sen; a chung irkhûna savun a sazât a’rhlina hrang puanzâr;

³⁵thuthung bôm le a sûnga lungphêk hai, zônfung hai, a sîng;

³⁶maichâm le a hmangrua, Pathian kuanga inhlan bai ser sai;

³⁷rângachak felfata siam meiser siana, meiserhai, a hmangrua murdi meisera inchok hrang meitui;

³⁸rângachak maichâm, irpol zât sahriak, thil mirimhoi hâl zât, puan in mikota hrang puanzâr;

³⁹dâr maichâm le an detna zônfung hai, hmangrua murdi, irsûk infâina tuibêl le a toihmun;

⁴⁰dâia puanzâr târ hrang, a chopuihai le a toihmun hai, dâi mikota hrang puanzâr le a toihmun hruihai; puan in hêmvuak hai, puan ina le hmang hrang hmangrua murdi;

⁴¹hmun irthianga ochaihai innghâk hrang tukfam le mitha enhoi takhai ochai Arona le a nâihai innghâk hrang songkol serhai.

⁴²RENGPA’N Mosia kuanga thu a ipêk ang takin sin tinrêng Israel mihaiin an thoa.

⁴³Israel nâihai khan itinrêng eninfelin RENGPA thupêk lamtak a ni iti a hmua, khanchu Mosia’n anni kha sat a vurhai tâka.