Read Hrangkhol FESUAKNA 6 Bible Online

FESUAKNA 6 - Hrangkhol bible

FESUAKNA 6

¹Khanchu RENGPA’N Mosia kuang khan, “Atûn chu Faroa chunga ki itho hrang hi hmu ta ni ti: Ki kut hrâtna sinin ki mihai infetir a ta, ki mihai a ram ata insuakhai ta a ti.

²Khanchu Pathianin Mosia a koia, “Kei RENGPA ki ni:

³Abrahama kuang, Isaka le Jakoba kuanga khom Pathian itinrêng thothei kin lâr pehaia, khannisianlân Jehova ki nih tiin chu la’nlâr pehai ma ung.

⁴Khan anni kuang khan chu, Kanaan ram, zoro sôtnotea an lei mikhualna ram pe hrang thu ki lei irthungpuihai tâka.

⁵Atûn chu Israelhai khêk irhâi, Aigupta haiin suak anga an ihmanghai lai hin, ki thu lei thung kin hriat suak ta.

⁶Khasikin Israel irchihai kuang khan ‘Kei RENGPA’N Aigupta rama nin suak puak rik pêlna ata nangni hruai suak ki ta, an suak chang ta no chin ni. Ki kut hrât tak hmangin dengintheitirhai ki ta, nangni chu nangni hruai suak ki ti.

⁷Khanchu ki mi ni ta nin ta, kei nin Pathian ni ki ti; khanchu keima hi nin Pathian RENGPA Aigupta hai suak nin changna ata hruai suakpu ki nih ti inhria ta nin ti.

⁸Abrahama, Isaka le Jakoba ki lei ipêkhaina ram hi nangni’n hong lua nin ta, nin irchon ni ta a ti: Kei RENGPA ki nih tiin hril ta nin tih a tia.

⁹Khanchu Mosia’n kha thu kha Israel irchihai kuanga a va hrila, khannisianlân an lungrîl sôl sikin le dengthei hrai tâk sikin Mosia thu irngai thei mahaia.

¹⁰Khanchu RENGPA’N Mosia kuanga,

¹¹“Va fe’n lân, Aigupta rêng Faroa kuang, Israel irchihai hi a ram ata insuahai ta ri se, va ti pe’n lân,” a tia.

¹²Khanchu Mosia’n RENGPA kuang khan, “Irngai ro, Israel irchihai lua’n ki thu hril irngai nuam mahaia, keima mi chong ak hi Faroa len vângin chu a’rngai lua le’rngai nuam no ni?” tiin a hrila.

¹³Khanchu RENGPA’N Mosia le Arona kuang khan, “Aigupta ram ata ki mi Israelhai hruaisuak hrangin thu nangni ki pêk tah ti hi Israelhai le Aigupta rêng va hril roi,” a tia.

¹⁴Khanchu hihai hi Israel nâilutîr tak Reubena irchihai chu an ni. Hanoka, Palua, Hezrona, le Karmia hai hi an ni, hihai hi Reubena nam irtihai an ni.

¹⁵Khan Simeona irchihai chu Jemuela, Jamina, Ohada, Jakina le Zohara, Kanaan nupangnu le a nâi Saula hai hi an ni, anni hi Simeona nam irti an ni.

¹⁶Khanchu hihai hi Levi irchihai chu an ni, Gersona, Kohatha le Meraria hai an ni; Levi dam sûng kum chu 137 a ni.

¹⁷Khanchu an nam ang takin Gersona nâihai chu Libni le Simeia hai an ni.

¹⁸Kohatha nâihai chu Amrama, Izhara, Hebron le Uziela hai an ni; Kohatha dam sûng kum chu 133 a ni.

¹⁹Meraria nâihai chu Mahlia le Musia an ni. Hihai hi an irchi fe dân anga Levi nam irtihai an ni.

²⁰Khan Amrama’n chu a pa farnu Jokebedi dôngma’n a neia; khanchu Arona le Mosia a neipuia, Amrama dam sûng kum chu 137 a ni.

²¹Izhara nâihai chu Kora, Nefega le Zikri hai an ni.

²²Uziela nâihai chu Misaela, Elzafana le Sithria hai an ni.

²³Khan Arona’n Aminadaba nâinu, Nasona farnu Elisebi dôngma’n a neia; Nadaba, Abihua, Eliazara le Ithamara a neipuia.

²⁴Kora nâihai chu, Asira, Elkana le Abiasafa hai an ni; hihai hi Kora nam irtihai chu an ni.

²⁵Khan Arona nâipa Eliazara chu Putiela nâinupang laia inkhat dôngma’n a neia, Finehasa a neipuia. Hihai hi a nam fe dân anga Levi irchibulhai chu an ni.

²⁶Hihai hi kêng Arona le Mosia RENGPA’N ki mi Israelhai “Aigupta ram ata hruai suak roi, a iti pehai,” an ni.

²⁷Hihai hin kêng Aigupta rêng Faroa va chongpuia, Israel irchihai chu Aigupta ram ata suak hranga va hriltu chu Mosia le Arona hai hi an ni.

²⁸Khanchu, hiang hin a hong nia, Aigupta rama RENGPA’N Mosia a koi ni khan,

²⁹RENGPA’N, “Kei RENGPA chu ki ni: Aigupta rama rêng Faroa kuang khan, ni kuanga ki ihril murdi hi va hril pe ro,” tiin Mosia kha a hrila.

³⁰Khan Mosia’n RENGPA kuang khan, “Irngai roh kei chu chong ak ki nia, khasikin keima chong hi itin mo Faroa’n a lei irngai hrang?” a tia.