Read Hrangkhol FESUAKNA 7 Bible Online

FESUAKNA 7 - Hrangkhol bible

FESUAKNA 7

¹RENGPA’N Mosia kuang khan, “Irngai ro, Faroa ta hrangin, Pathiana nang ki siam tâk kêng, ni upa Arona hrangin deipu ni ta ni ti.

²Thu nang ki ipêk murdi hrilhai zitin lân; khanchu ni upa Arona’n Faroa kha a ram sûng ata Israelhai kha insuatir hrangin hrilhai a ta,

³khannisianlân Faroa lungrîl inngartir pe nôk ki ta, irsinsiana le sinirkhêl ki tho chu Aigupta rama hin hong inthang a ta.

⁴Khan, nikhomsianlân Faroa hin pom nuam no ni, khanchu Aigupta ram sûnga hin ki kut irnghat ki ta, annihai chunga a sate’n dengtheina tuangin ki mi Israelhai chu Aigupta ram ata hruai suakhai ki ti.

⁵Khanchu, Aigupta mihaiin, an rama ki kut ki phara, Israelhai ki hruai suakhai nî tena kêng, RENGPA ki nih ti hi an la inhriat hrang,” a tia.

⁶Khanchu Mosia le Arona khan a iti ang takin an hong thoa, RENGPA’N thu a ipêkhai ang takin.

⁷Hi zoro lai hin Mosia chu kum sômriat mi a nia, Arona chu kum sômriat inthum mi a ni.

⁸RENGPA’N Mosia le Arona kuang khan,

⁹“Faroa’n sinirkhêl tho roi nangni a lei ti’n chu, Arona kuanga ni khianghrol kha la’nlân hnuaia pai ro, khanchu mirûl hong chang a tih ti pe’n lân,” tiin a hrilhaia.

¹⁰Khanchu Mosia le Arona kha Faroa kuang an va lûta, RENGPA thupêk angin an thoa; Arona’n a khianghrol kha Faroa le a siahlohai mit hmua a paia, mirûl a hong chang pehai tâka.

¹¹Khanchu Faroa’n dôithei le mi vârhai a koihaia, Aigupta ram sûnga mitphil dôi theihai khomin an khianghrolhai an paia, mirûl an hong chang pehai tâka.

¹²Khannisianlân, Arona khianghrol khan a danghai kha an volpaihai vinga.

¹³Khannisianlân, Faroa lungrîl chu a ngar pe maia, an thuhril kha zôm nuam ual maka, RENGPA’N a lei iti tâk ang khan.

¹⁴Khanchu RENGPA’N Mosia kuang khan, “Faroa lungrîl an ngartir sikin, a mihai insuatir hrangin nuam maka.

¹⁵Khanchu Faroa kuang zînga va fe nôkin lân; tui chôi fe ngai a ni sikin, ama irhmupui hrangin tui kôla khan ngîrin lân; ni khianghrol mirûl chang thei kha chôi roh.

¹⁶Khanchu a kuang khan, ‘RENGPA, Hebraihai Pathianin, ki mihai hin ramchâra ki sin an tho theina hrangin insuahai ro, tiin a ni hong itîr a ni; atûn ten ni la ngaipoimo no’n chu.

¹⁷RENGPA’N a vuan ata ni la’rhriatsuak no’n chu RENGPA ki nih ti inhre lat ta ni ti. Irngai ro, ama ki mi hong tîrtu khianghrol leh hin ivadunga tui hi vîk a ta, khanchu thisen chang ving a ti.

¹⁸Kha tena chu tuia ngahai, khom thi ving an ta, tui khom a mirimhai hong siat ta a ti. Aigupta mihaiin kha tui khom kha in thei no nihai a ti, va ti ro,’ a tia.

¹⁹Khanchu RENGPA’N Mosia kuang khan, ‘Arona kuanga ni khianghrol chôiin lân, Aigupta ram tui chunghaia, ivadung haia, dîl le tui omna hmun tin chunga ni khianghrol kha pharin lân, tui chu thisen a hong chang theina hrangin, kha tena chu Aigupta rama thing le lunghai tenin thisen hong om ving a ti, a tih va ti ro,’ a tia.

²⁰Khanchu Mosia le Arona haiin RENGPA thu pêk angin an thoa. Khianghrol kha an irleka, Faroa le a siahlohai mit hmua ivadunga tui kha a hong vîka; khan ivadunga tuihai kha thisen a hong chang zit ta.

²¹Tuia nga om murdihai khom an hong thi zoi tâka; Aigupta mihaiin in thei ta mahaia; khanchu Aigupta ram lian dôra khan thisen a hong bit zoi tâka.

²²Khanchu Aigupta rama mitphil dôi theihaiin an dôi hmangin an ni khom an thoa; Faroa lungrîl chu inngartirin a oma, an thu ite irngai nuam loiin a oma; RENGPA’N a lei iti tâk ang khan.

²³Khanchu Faroa chu a in tiang a kîr nôk tâka, ite a lungrîl châng pe viat maka.

²⁴Aigupta mihai khan tui in hrang zongin muang kôlhai khan an tuka; ivadunga tui an in thei ta no sikin.

²⁵RENGPA’N tui a vîk nî ata irthokin sûn sari a hong ni ta.