Read Hrangkhol FESUAKNA 8 Bible Online

FESUAKNA 8 - Hrangkhol bible

FESUAKNA 8

¹Khan RENGPA’N Mosia chu hiang hin a ti pea, “Faroa kuang va fe’n lân, RENGPA’N ki mihai khan ki sin an tho theina hrangin insuahai roh.

²Nin suatir nuamhai zel no’n chu, nin ram sip khakin uichok insuahai ki ti.

³Nail vadung khom uichokin sip an ta, nangma in sûnga khom lût an ta, ni zâlna hmun, ni puanthahai le ni sinthotuhai in sûng khom sip zoi an ti, ni mihriam omna hmun tina sip an ta, ni buhmun le ni khalâia khom fuan sup supin om an ti.

⁴Khakhêla uichokhai chu nang le ni mihai le ni sinthotuhai laia sip zitin om a ti, a ti va ti ro,” a tia.

⁵Khanchu RENGPA’N Mosia kuang, “Arona kuanga ni khianghrol kha tui chunga khan irlekin lân, Aigupta ram sûnga hin uichok hong suak ni ta ri se, va ti ro,” a tia.

⁶Khanchu Arona’n Aigupta ram vadunghai chunga khan a kut a phara, khanchu uichok an hong suak tâka, Aigupta ram murdi an hong bit zit tâk a ni.

⁷Khan tasân theihai khomin an dôihai hmangin khaang khan an thoa; Aigupta rama khan uichok an hong insuaktir pehaia.

⁸Khanchu Faroa’n Mosia le Arona a koihaia, “RENGPA kha koi unglân, ki mihai le ki kôl ata uichokhai hi lapai sianlân; khanchu RENGPA kuang an irbôl theina hrangin mipuihai hi infetirhai ki ti,” a tia.

⁹Khanchu Mosia’n Faroa kuang, “Hi inzak irlâkna ata hi nangin ni nei pe’n lân, nangma le ni ina uichokhai hi nin boitir pe hrang le vadunga fea om mai hrangin ni mi le ni siahlohai le nangma ta hrangin itika mo nangni ki la izong pe hrang?” a tia.

¹⁰Khanchu Faroa’n, “Zînga duah,” a tia. Mosia’n “Ni thu ang takin ni ri se: RENGPA kin Pathian ang hi mi tûte om mahai, ti nin hriat theina hrangin.

¹¹Khanchu uichokhai khan ni mihai le ni siahlohai, ni in le nangma irthokin fesuak an ta; ivadunga om ta an ti,” a tia.

¹²Khanchu Mosia le Arona chu Faroa kuanga irthokin an fesuak tâka: Mosia’n, Faroa chunga uichok a ikêlsua chungchânga khan RENGPA a koi tâka.

¹³Khanchu RENGPA’N Mosia thu angin a hong tho pea; khanchu uichokhai chu loi le kho sûnghaia, in sûnga an thi khup tâka.

¹⁴An bukkhômhaia, an thu lulin an mirim a siata.

¹⁵Khannisianlân Faroa’n an boi tah ti thu an hriatin, a milung an ngartira; RENGPA’N a lei ihril tâk angin an thu hril uksak nôk ta maka.

¹⁶Khanchu RENGPA’N Mosia kuanga, “Arona kuanga ni khianghrol kha inlekin lân, hnuai chunga vâiphin kha vîk ro, Aigupta rama phersedîp an hong tam theina hrangin, tho ro,” a tia.

¹⁷Khanchu a hong thoa, Arona’n a kuta hmol kha an leka, hnuaia vâiphin kha a vîka, sa le mihriamhai chunga khan phersedîp an hong om tâka.

¹⁸Khanchu tasân theihaiin an dôi hmangin phersedîp intâmtir hrangin an thoa, khannisianlân tho thei mahai; khanchu sa le mihriam chunga hrikhai an hong om tâka.

¹⁹Khanchu tasân theihaiin Faroa kuanga khan, “Hi hi Pathian kut chal a ni,” an tia. Faroa lungrîl chu an ngartira; RENGPA’N a lei ihril tâk angin an thu hrilhai chu irngai ual loiin.

²⁰Khanchu RENGPA’N Mosia kuang khan, “Zînga thoiin lân, Faroa kuanga va ngîr ro: irngai roh tui chôi hrangin hong suak a ta, a kuang khan, ‘RENGPA’N hiang hin a ti, ki sin an tho theina hrangin ki mihai infetirhai roh.

²¹Ki mihai nin fetirhai no’n chu, ni in sûng le ni mihai chunga, ni siahlohai chunga le nangma chunga thoivâihai hong tîr ki ta: Aigupta mihai omna le an inhaia thoivâi hong sip zoi an ti.

²²Khanchu kha ni tena chu, ki mihai omna Gosen ram chu zêkpai ki ta, thoivâi om viat no nihai; hnuai chunghai khom hin RENGPA ki ni, ti an hong inhriat theina hrangin.

²³Khanchu ni mihai le ki mihai kâra saninzôkna thua teina sia ki ti; kha inhriatna kha chu zînga hong tung a ti,’ ti ro,” a tia.

²⁴Khanchu RENGPA’N khaang khan a hong tho tâka. Faroa in sûng le a siahlohai in sûnga khan thoivâi irkhêl takin an hong tama; kha thoivâihai leh khan, Aigupta ram murdi insiatin a hong om tâka.

²⁵Khanchu Faroa’n Mosia le Arona a koihaia, “Fe unglân, ram kâra nin Pathian kuang irbôl roi,” a tia.

²⁶Mosia’n, “Khaanga tho kha a sa ti maka; Aigupta mi intiromna kha chu kin Pathian RENGPA kuanga ki irbôl sa hrang a nia, irngai ro, Aigupta mi intiromna chu an mit hmua kin irbôl sa’n chu, lung leh an ni idêng loi hrang ma ni?

²⁷Thu a ni ipêk angin, ramchârna hmun, sûn thum fena lam hlataka fe kin ta, RENGPA kin Pathian kuang irbôl kin ti,” a tia.

²⁸Khanchu Faroa’n, “RENGPA nin Pathian kuang khan, ramchârna nin irbôl theina hrangin nangni infetir ki ti. Aniachu, ram hlataka fe thei no chin ni; kha kha ni zong pe roi,” a tia.

²⁹Khanchu Mosia’n, “Ni kuang ata fesuak ki ta, Faroa le a siahlohai, a mihai rengata, thoivâihai hi zînga irthokin chu an rot theina hrangin RENGPA chu nghî ki ti; khannisian mipuihai chu RENGPA kuanga irbôlna hmuna infetirhai loiin, hmûsit takin Faroa’n enhai mai ta no ri se,” a tia.

³⁰Khanchu Mosia chu Faroa kuang ata a fesuaka, RENGPA kha a ngêna.

³¹Khan, RENGPA’N Mosia iti angin a tho pea, a lâkpai pe vinga, inkhat khom hôi pe loiin.

³²Hi zoro khom hin Faroa lungrîl chu a ngar pea, mipuihai chu infetirhai ta mah.