Read Hrangkhol JOBA 1 Bible Online

JOBA 1 - Hrangkhol bible

JOBA 1

¹Uz rama mi inkhat a oma, a’rhming chu Joba a ni; hi mi hi sêlnaboi, Pathian chi mi, mi iamom, thil saloihai ata irdîn thei mi a ni.

²Nâipasal sari le nupang inthum a neia.

³A’rchong lam dân chu hiang hin a ni: kêlbelra sângsari, saringsei sângthum, sehrâtchal a bopin irzaringa, sakuartung a pui irzaringa le siahlo tamtak a neia. Nisua tiang rama khan chu irchongtak a ni.

⁴A nâihai hin an mâni inhaia hruai an inthe irthâk ngaia, an far inthumhai khom an hruaithe fâk nêk zongpuihai hrangin an fialhai ngai.

⁵Khaanga hruaithe an zoiin chu Joba’n a koihaia, an hlan irthianghai ngai. Zînga a thoia an irhming chitin hâlirvôm thil an hlan pehai ngai. Khan, Joba’n, Ki nâihai hin thilsual thoin an lungrîlin Pathian insîrinsiat rôi an tih tia a itho a ni. Joba’n, hiang hin a itho mai ngai a ni.

⁶Khan vântîrtônhai, RENGPA makunga an inlang nî sûn a hong tunga. Setan khom an laia a om saa.

⁷RENGPA’N Setan kuang, “Kho rengata hong mo ni ni?,” a tia. Setana’n RENGPA kuang khan, “A suk a tunga irnêng ki’rfangna rengata,” a tia.

⁸RENGPA’N Setan kuang, “Ki siahlo Joba hi ni ngaitua ngai mo? Irnêng chunga hin ama anga sêlnaboi, mi dik, Pathian chi mi, thil saloi lai ata irdîn thei om mahai,” a tia.

⁹Setana’n RENGPA kuang khan, “Joba hin a bi boiin nang a irngaisak ma ni?

¹⁰Ama chu a in le, a inei murdi kil tina ni pêk sika ni ma mo? A kut sintho sat ni vura; a sâhai khom ram an ibit pe a ni ta.

¹¹Khannisianlân, atûn hin ni kut pharin lân, a inei murdi lapai pe nôkin lân, ni hmâi makunga nang a ihrilsiat ngêt hrang,” a tia.

¹²Khanchu, RENGPA’N Setan kuang, “Tho atûn hin a inei murdi nangma kuta nang ki pêk, ama chu innatir ro,” a tia. Setan chu RENGPA kuang ata a suak ta.

¹³Sûn khat chu a nâinuhai le pasalhaiin a ulian takpa ina bu an nêka, Uain an in lai takin,

¹⁴Joba kuang thanginthei an hong tunga, “Sehrâtchalhaiin âl an kaia, sakuartunghai hlataka an om laiin,

¹⁵Seba mihaiin an ni hong doi thuta, an lâkpai vinga, siahlohai chu khandai leh an thathaia, keima vai hi nang an hril hranga hong suak thei ki ni,” a tia.

¹⁶A la hril laitakin mi dang a hong tung nôka, “Irvân ata Pathian mei a zuang tâka, kêlbelra le siahlohai a kâng thathaia, keima vai hi a hril hranga hong suak thei ki ni ta,” a tia.

¹⁷A la hril laitakin mi dang inkhat a hong nôka, “Kaldaihai pôl thuma irsiamin an ni hong doia, saringseihai an lâkpaihaia, siahlohai khom khandaiin an thathaia, keima vai hi a hril hranga hong suak thei ki ni,” a tia.

¹⁸A la hril laitakin, mi dang a hon tân nôka, “Ni nâipahai le ni nâi nupanghaiin an upatak ina bu an nêka uain an in laiin,

¹⁹irngai ro, ramchâr ata phâivopui a hong thoa, in kha ar kî minli tiang a nam siata, ruatharte le dôngmatehai chu a dela, an ithi a ni ta, keima vai hi nang hril hranga hong suak thei ki ni ta,” a tia.

²⁰Khanchu Joba kha a thoia, a songkol irfual an pot thêra, a lu a voi inkola; hnuaia inbokin Pathian a biaka.

²¹“Ka nu sûng ata korongin ki zuang suaka, a korong ngêtin ki ikîr nôk hrang a ni hi te, RENGPA khan a pêka, RENGPA hin a ilâk nôk a ni hi te, RENGPA irhming chu inpâkin om ri se,” a tia.

²²Hi thil a tung pe khom hin Joba chu sual maka, Pathian khom insîrinsiat mah.