Read Hrangkhol JOBA 10 Bible Online

JOBA 10 - Hrangkhol bible

JOBA 10

¹Khan, ki’rtha hin a hnông ta, ki hringna hi ki irsîr chi chian a ni ta, lungrîl natak pumin ki ichong ma ni?

²Pathian kuang hiang hin ti ki ti, theiloi nin changtir loiin ni ni demna nin entir sa roh.

³Ni hnuaisiaa, ni kut sintho hmusita, mi pualoihai inkung hi, en a hoi mo ni ti?

⁴Taksa mithai chu ni neia, mihriam ihmu angin.

⁵Ni sûn hmanghai chu mihriam sûnhai angin. Ni kumhai khom mihriam kumhai angin.

⁶Ki dikloinahai ni sût maia, ki sualnahai khom ni zong mai ngaia,

⁷Mi pualoi ni ma ung ti lak nin hriata, ni kut ata ni sansuak thei tûte om mahai ti khom nin hriata.

⁸Ni kutin ni nin tûka, nangma isiam ki nia, nangma ngêtin ni ni inboi hrang ma ni?

⁹Nangin pilhlûm angin ni ni siam ti inhre maiin lân, Nêngpil ni ni inchangtir nôk hrang ma nih?

¹⁰Nangin irhnutui leh ni nin fâa, irhnu lum nêk angin ni ilôm loi ma nih?

¹¹Taksa le vunin a ni tuama, ru le irthahruiin a ni khit indeta.

¹²Nangin hringna ni ni pêka, ni nin hlutira, Ni ni enkolna khan ki’rtha sûnghualin lân;

¹³Khannisian hi hi ni lungrîla ni thupa, Hi hi nangma kuang a om ti kin hriat.

¹⁴Lei sual inlân, nangin ni ni sinsiaa, ki pualoina ata nin hnot no chi ni.

¹⁵Mi pualoi ni ta inlân, Ki vânsiat hrang dân chu! Mi fel ni khom inlân, irsong thei ual no ning. Mualinphoiin ki oma, ki ituang ngôi ngôi a ni.

¹⁶Lei irngaisâng inlân, nangin kâmkeibaknei ilôi angin ni lôi ni ta, ki chunga irkhêl takin ni nin entira.

¹⁷Ki chunga ni thu ni hon thartira, Ni ningmurna ki chunga nin pungtira. A pa pâlin ni ni doia.

¹⁸Itho sika mo sul ata ni ni ikêlsua? Tûte hmu loiin lei thi ta inlân,

¹⁹om loi angin ki lei nia, sul ata thâna fe lei ni ta ki ta.

²⁰Ki dam lai sûnhai hi a ihek vâng mo ni ma? Irngamin ni dâisanhrek sian, irnak hong song nôk ual inlân.

²¹Kîr ta loina rama ki kîr mân hin, inthim le thina dâihlîm rama hin,

²²A zîng irsâna ram, zân zîng chardongna hmun chu, Thina dâihlîm, lampui ite om loina vâr khom inthim a changna hmuna khan.