Read Hrangkhol JOBA 15 Bible Online

JOBA 15 - Hrangkhol bible

JOBA 15

¹Khan Elifaza, Temana mi’n hiang hin a sâma:

²Mi vâr inhriatna tep loi mai mai ata sâmna siamin, Nisua tianga phâivua’n a pum a insip thei hrang ma ni?

³Chong mumalboi hmangin mani, Thuhril satna nei loi hmangin a ihril hrang ma ni?

⁴Pathian chitna zel nei mak chea, a kôla khom irhlan nuam mak chea!

⁵Ni sualzia ni thuhrila an langa, ni vârna chonghai kha thup ni tuma.

⁶Keima ni loiin, ni chongbâiin thei loi ni changa, ni hmûrin nang a isêl a ni.

⁷A suak masatak ual mo ni ini? Tânghai om mân khan ni lei isuak tâk ma ni?

⁸Pathian thiltum irthup chu ni lei inhriat tâk ma ni? Mihriam vârna hi nangma ta vai mo a ini?

⁹Kin inhriatloi i ual mo ni inhriat bîk? kin inhriat thei loi imo ni inhriat thei bîk?

¹⁰Kin laia tar luchuak tâkhai le tar kûna om tâkhai, ni pa nêka ulian khom an om dua!

¹¹Pathianin irtharngam nang a sakna le, Indîn taka nang a ienkolnahai hi a irnêm hrai ma ni?

¹²Itho mo ni lungrîlin nang a ihruai irhmang? Itho mo ni imeng rak hi?

¹³Pathian chunga ningmur nir lâka, ni doia; Ni hmûrin ni ihnôl a ni hi.

¹⁴Mihriam rêng rêng hi a irthiang thei ma ni? Nupang inei hi Pathian kôla a idik thei ma ni?

¹⁵Pathianin chu a mi irthianghai khom iamzoi maka, a mithmua irvânhai khom irthiang ual ma.

¹⁶Mihriam sualna le porchena sip tui in anga sualna intuhai chu a iiam thei ngân hrang mo!

¹⁷Ni’rngai pe’n lân, nang hril ki ti, ki ihmu chu hril ki ti.

¹⁸Mi vârhaiin thudik an ihril ngai kha, An pi le puhai kuang ata an idonghai kha thup ngai mahai.

¹⁹Kha mihai kuanga khan ram chu pêk a nia, Anni laia râlhai fe sa ngai mahai.

²⁰Mi sualin chu a dam sûng kha natna tuang a ta, mi nunchan saloiin a dam sûng tuang a ti.

²¹Ichiom irhâi chu a mikuarin an hriata, Khannisian lungthi taka a om laiin, Mi pualoihaiin an hong doia.

²²Inthim ata suak a irsabei mâka, A sûn maton chu khandai a ni.

²³Fâk hrang zongin irvâk a ta, “Kho tiang mo?” tiin. Ama hrangin sûn maton chu an thim a nih ti an hriata.

²⁴Intak le dengtheina’n a hong bôma, Rêng irsiam saiin irdoina a inhnê angin ama chu an hnêa.

²⁵Pathian chunga a kut an lek leh, Itinrêngthothei chunga omlian taka a om sikin.

²⁶Tukullian takin Pathian chu doi a tuma, Pho irsa tak leh Ama chu doi a tuma.

²⁷A thâiin a hmâi a tuama, A kong vonhnala thâi ar buka.

²⁸Khannisian khopui ramna hmuna khan a oma, Tûte ilua loina ina khan,

²⁹Irchong no nia, a sum le pâi irting pe no ni, An rahai khom hnuaia tâk hrang om no ni.

³⁰Inthim ata hong suak no nia, Meiri-alin a ônhai kâng irhmang a ta, A chongbâi suakin ama chu hruai a ti.

³¹A binga irhuangin, itea irnghatna nei loiin, A hmu hrang chu ite ni mah.

³²A zoro loia hâlin om a ta, a ônhai khom incher ta no ni.

³³Grep ra irhmalpai angin Oliv pâr chil ang ni a ti.

³⁴Pathian ngaisak loi mihai chu irhmang an ta, dikloi taka puan in sinhai khom kâng irvôm pehai a ti.

³⁵Mi dikloi inchang hrang zonga, dik loina an insuaka, An lungrîlin mi huang hrangin an irsiam ngai.