Read Hrangkhol JOBA 16 Bible Online

JOBA 16 - Hrangkhol bible

JOBA 16

¹Joba’n hiang hin a sâma:

²Khahai ang thil kha chu tamtak kin hriat tâka, Nin rênga irtharngamtu tuang hnôngom nin ni.

³Thu phuachôphai ma mai nin ihril mai hrang ma ni? Aninole, sâm hrangin i’n mo nang a inthor?

⁴Keima ituang ang hi tuang unglân chu, nin ihril ang hi chu hril intam thei ki ti. Ki lu nang ni inthikkhum ki ta, nangni hrângkhum thei ki ti.

⁵Khannisian, ki bâiin nangni inhrâttir ki ta, Ki hmûra irtharngamna thu’n nangni inhnêmtir a ti.

⁶Hril ngot khom inlân ki natnahai dam ual no nia, ki dâihrek khomin boi ual no ni.

⁷O Pathian nangin ni nin sôltira, ki insûngkua pumpui ni nir hmangtir tâka.

⁸Nangin ni ni chelthunga, kha kha ki chunga inhriatpuitu a nia, Ki kôngna hin a ni hnôla, Kha kha ki hmâi makunga inhriattirtu a ni.

⁹Ni ningmurna’n ni nin potthêra, ni en nuam mak chea, Ni ha ni ni rial khuma, a ni doituhaiin ni en nuam mahaia.

¹⁰Mihaiin an nir kôka, irdîn loiin ki bianga an nin bên intheka, ni doi hrangin an irbuka.

¹¹Ama ngaisak loihai kuta Pathianin a nir hlana, mi sualhai kuta a ni pêka.

¹²Hoi takin ki oma, a ni inthekindartira, ki ringa a ni chela, a nin potthêra, entin hrangin a ni sia tâka.

¹³A thal kâptuhaiin ki’rhîlin an ni irhuala, thalhai chu ki panga lûtin popin a ni siama, Khan khomin inrenna zel nir hmutir maka.

¹⁴Siatna chunga siatna’n a nin siattira, mi huaisen angin ki chunga a hong pûta.

¹⁵Bora puan ki sila, mualphoi takin nêngpila ki toia.

¹⁶Ki chapna hrai sikin ki hmâi a hong sena, ki mit kôlhai chu invûngin a hong duka.

¹⁷khannisian ki kuthai hin thilsual inthem maka, a diktakin ki chongchaina a’rthiang khomin.

¹⁸O irnêng ki thisen hi irkhu no’n lân, ki beidong chapnahai hi irngam hmun nei no ri se.

¹⁹Atûna a nin hriatpuitu chu irvâna om a nia, a ni thoptu chu chung tianga om a ni.

²⁰Ki rualhaiin nin nuisanhai khomsian, mitrithi tâkpumin Pathian tiang irhei ki ti.

²¹Pathian kuang mihaiin mihriam hi san thei sianlân chu! mihriam Nâipa’n a rualhai a isan ang hin.

²²Kum sôtloite a hong hek tena, kîr ta loina lampui ki hro hrang sikin.