Read Hrangkhol JOBA 17 Bible Online

JOBA 17 - Hrangkhol bible

JOBA 17

¹Ki hringna mongna hrang chu anai tâka, phûksân khom intak ki tia; thân ti no chu hmabâk om ta mah.

²A nin nuisantuhai ki kuang an iom a ni, an ni imanêpna khom ki ihmu chian a ni.

³Nang keima tiang kopin lân, nang ti no chu irhnêl hrang tûte nei ma ung.

⁴Nangin an milung nin zîngtira, nangin inhnêna chu inchangtirhai no chi ni.

⁵Inlâpna zonga a rualhai hnôltu chu, A nâihai mit inchotirtu ni a ti.

⁶Atûn chu mihaiin hi thuvâr hmangin an ni hnôla, an honga ki hmâia an inchila.

⁷Beidong sikin ki mit a zîng zoi ta, ki kut le kehai khom ru inzen a ni ta.

⁸Mi nunchan diktakhaiin chu ar khêl an tia, mi siat loihaiin chu Pathian ngaisak loituhai kha dem an ti.

⁹Mi dikin chu a om dân intha ngai ma, kut fâihai chu an idet ual ual ngai a ni.

¹⁰Nin rêngin hong kîr khom unglân, Nin laia mi vâr tûte hmu ma ung.

¹¹Ki zoro chu a hek ta, ki thiltumhai chu a hong siata, ki milunga irzukhai khom.

¹²Zân chu sûn an changtira, ‘Vâr khan inthim an nâitir ta,’ an tia.

¹³Seol chu ki in angin ki ena, inthima khan ki zâlhmun ki do’n chu;

¹⁴Thân chu “Ka pa” ti ta ki ta, ki taksa irlunghai chu “Ka nu le ki farnu,” tihai ta ki ti.

¹⁵Ki sabeina chu khô hmuna mo ni a ta? Sabei hrang dang mo la om ni?

¹⁶Seol mikot bulhaia khan fe pat a ta, nêngpila khan om suam ta kin ti.