Read Hrangkhol JOBA 18 Bible Online

JOBA 18 - Hrangkhol bible

JOBA 18

¹Bildada, Sua mi’n hiang hin a hrila:

²“Idôr mo hril hrang ni la inei mai? Irngai tan lân, hong hril ta ki ti.

³Itina mo sehrât angin teh ni ni bêa, mi’nmôl tehai angin teh ni ni hmua?

⁴Ningmurna sikin ni bingin deng ni theia, nangma sikin irnêng hi mâksan a ini hrang mo?

⁵A ni, mi sual vâr chu a chuaia, a meichok khom a thi zoi ta.

⁶A puan ina vâr chu an thima, A meiser khom thi pe a ti.

⁷Kalchôi hrâtna chu a’rzala, Ama ngaituana ngêt khan paithâk ni a ti.

⁸Lên sûnga a lûta chânga khitin a oma.

⁹Chângin a ke tiang a khita, an ôk khaka.

¹⁰A val chu hnuaia thupin a oma, a lampui châng kha kam a ni.

¹¹Kil tina ichiomna’n a zuia, a fena hmun tina a zui a ni.

¹²Phîngchâmin a’rzala, siatna’n a irhual ving a ni.

¹³Natna ichiom takin a bôma, A kut a ke a hmon zoi ta,

¹⁴a’rnghatna puan in ata kaisua ni a ta, ichiom rêng kuang khan hruai ni a ti.

¹⁵A puan ina mi danghai om an ta, a omna khan kât mei inthekindarh ni a ti.

¹⁶A hnuai tianga irzunghai chu hmon a ta, chung tianga a ônhai chu châr a ti.

¹⁷Irnênga ama inhriat maina irhmang a ta, Kholaia a’rhming zel inlang ta no ni.

¹⁸Vâra irthokin inthima inhnot ni a ta, rammual ata inhnotsuak ni a ti.

¹⁹A mihai laia tû le nâi nei no nia, A lêngna hmuna khan tûte a lua hrang om no ni.

²⁰A itong hi nitâk tianga mihaiin chu ar khêl an tia, nisua tianga mihai khomin an chardong a ti.

²¹Mi fel loihai omna chu khaang khan ni a ta, Kha kha Pathian inhre loituhai omna hmun chu a ni.