Read Hrangkhol JOBA 2 Bible Online

JOBA 2 - Hrangkhol bible

JOBA 2

¹Vântîrtônhai RENGPA makunga inlang zoro a hong om nôka, Setan khom RENGPA makunga inlang hrangin an laia a om saa.

²RENGPA’N Setan kuang, “Kho tiang ata hor thok mo ni ini?” a tia. Setana’n RENGPA kuang khan, “A suk a tunga irnêng ki’rfangna hmun ata,” a tia.

³RENGPA’N Setan kuang khan, “Ki siahlo Joba hi ni ngaitua ngai mo?” a tia. Irnêng chunga hin ama anga sêlnaboi, mi dik, Pathian chi mi, thil saloi lai ata irdîn thei mi dang om mahai. A bi boia, ama insiat hrang ni nin thêm zoia khom hin, a la iamom mai a ni,” a tia.

⁴Setana’n RENGPA kuang khan, “Vun irthûla vun ti a nia, a ni, mi’n a hringna hrangin a inei murdi pe phal a ti.

⁵Atûn ni kutin a ru le a taksa hong innatir pe ngân ta, ni hmâi makunga nang an sîrinsiat no tâkin chu,” a tia.

⁶Khanchu RENGPA’N Setan kuanga khan, “Irngai ro, ama khom ni kuta om a nia, a hringna vai hi hôi pe ro,” a tia.

⁷Khanchu, Setan kha RENGPA kuang ata a suaka, Joba chu a ke ata a lu dênin pân hring a’rveitira.

⁸Joba kha a suaka, ar hriatna hrangin bêlkoi hârte a lâka, pil chunga a toia.

⁹A dôngma’n a kuang khan, “Ni lungrîl ni la ithûl loi hrang mo? Pathian insîrinsiatin lân, thi rak ta ro!” a tia.

¹⁰Khannisianlân, Joba’n a kuanga khan, “Nupang into chong angin te ni chonga. Pathian kuang ata thil sa ei donga, thil saloihai khom ei idong loi hrang mo?,” a tia. Hianga thil a tuang khom hin a Pathian chu insîrinsiat mah.

¹¹Joba rual inthumhaiin a chunga thil saloi tung pe kha an inhriata, ama en hrangin an omna ata an hong pana. Annihai chu Elifasa, Temana khopui mihai, Bildada, Sua ram mi, Zofara, Naama ram mihai an ni. Ama tuangpui le lungngamsak hrangin zoro an indang angin an honga.

¹²Hlatak ata Joba chu an hong ena, khannisian infel mahaia. Khan, an va hmu tena chu, an khêka, an chapa; an puanhai an inpot thêra, an lu chunga vâiphin an phula.

¹³Khanchu, irnênga sûn sari le zân sari an toipuia; tûte’n chongbâi khat khom chong loiin, a ituang lam chu natak a nih ti an hmu sikin.