Read Hrangkhol JOBA 23 Bible Online

JOBA 23 - Hrangkhol bible

JOBA 23

¹Khanchu Joba’n hiang hin a sâma:

²“Ki chardongna a sûn tin ar bôk maia, Kin hrûmna hin ki natna hi hril zoi thei ma.

³O, Ama hmu theina lampui inhre inlân, A toihmuna hong fe thei ki ta.

⁴Ki chungthu a kuang intung ki ta, ki bâia funga ni sunhai hi hril ving ki ti.

⁵A ni sâm dân inhre suak ki ta, A ihril hrang chu an hriat ki irzuk a ni.

⁶A sinthotheina roiinpuitak leh a ni idoi hrang ma ni? Doi no ni, keima tiang a mikuar sung ual a ti.

⁷Mi felhaiin ama ngên an ta, A ni ngaituatu kuang ata suak ki ti.

⁸Irngai ro, nisua tiang ki fea lei om maka, Nitâk tiang ki kîr nôk khomin hmu ma unga.

⁹Hmâr tiang a’rsang lai khan khom hmu ma unga, Sim tiang a fe khomin hmu thei ual ma ung.

¹⁰Ki lampui hro chu an hriata, A ni fia zoi le rângachak angin suak ki ta.

¹¹Ki kehai hin a kehnung zui ki ta, Rotsan loiin a lampui ki zui maia.

¹²A chongbâi suak thupêk chu masan loiin, a thu suakhai chu bu nêkin ki’rngai poimoa.

¹³Mi lungrîl det a ni, tu’n mo hruai inkôi thei hrang? A inuam ang a itho thei a ni.

¹⁴Ki rukbaka a irêl chu zui ki ta, Ama ang kha a la inei hluk a ni.

¹⁵Khasikin a kôla chipumin kin thinga, ki hor ngaitua hin ki chitna ar bôka.

¹⁶Pathianin ki milung an dôptira, Itinrêngin a ni inbuai a ni.

¹⁷Zîng irsa’n nir khu khomsian, chi ual ma ung. Itinrêngthotheipu chu a ni, a nin dôptirtu chu,” a tia.