Read Hrangkhol JOBA 24 Bible Online

JOBA 24 - Hrangkhol bible

JOBA 24

¹Itinrêngthotheitu hin itina mo roirêl zoro a indang loi? Ithoa mo a hmutuhaiin kha nikhua kha an inhriat loi?

²Mi senkhatin ramria lungphun sonpai ngai an oma, Mi sâhai an sutpaihaia, an ivâi ngai a ni.

³Farahai an sakuartung an lâk pehaia, An dik irti theina hrangin meithâi sehrâtchal an khita.

⁴Inrianghai an soisakhaia, Ram sûnga mi inrianghai an thuphai ngaia.

⁵Ramchâra sakuartunghai angin, sathnem irngaiin bu an la zong thei cho chôka, Ramchâra khan an nâihai fâk hrang an la hmu vi viata.

⁶Mi loia bu âtin an irhloa, Mi sualhai grep irhmal mihlia an irfuanga,

⁷Puan sil loiin zân khonvârin korongin an zâla, Phalbia puanlum ite nei mahaia.

⁸Tânga ropui tho’n a pha induihaia, Irbîkna zongin lungpui an irbêla.

⁹Pa nei loi irhnu nêk lai inpotpai an songa, Mi inrianghai irnêng man intong irthûlin an nâihai an lâk pehai.

¹⁰Silkai irsamin, korongin an invâia, phîngchâm pumin an bumûthai an pêla.

¹¹Oliv irhuana sahriak an epa, Uain khura grep ra an thuna, Tuihrâl dangchârin sin an zonga.

¹²Khopui lianpumin mi an khêka, mi sâbe tuang lungrîl na an khêk suaka; Pathian lakin thil dikloi kha ite bê’n bê maka.

¹³Mi senkhat vâr inhuat an oma, A lampui lak inhre mahaia. A lampui taka om nuam mahai sikin.

¹⁴Khuantîra mi thattu kha a thoia, Inriang le chaninvâihai a thata, Zâna khom inru angin a’rvâka.

¹⁵Inru’n chu zân inthim a nghâka, “Tûte’n ni hmu no nihai,” tiin, A hmâi a thupa.

¹⁶Inthim kâra in an invera, Sûna chu an irkalkhuma, A vâra om nuam loiin.

¹⁷An rênga hrangin inthim chu thina dâihlîm ang a ni, Thina dâihlîm ichiom kha an irzuka,

¹⁸Tuilianin hrât takin a tân irhmanghaia, Nêngpila an dongtum chu khosâlna vai a ni. A grep irhuan tiang tûte irhei ual ta mahai.

¹⁹Kholumin ivurtui a inzôitir angin, Seolin thil tho inchâihai chu irhmang an ti.

²⁰A nu sulin irnghil a ta, Irlunghai hrangin bu tuitak ni a ti, Mi sualhai chu inhriat mai ni ta no nihaia, Thingkung anga kiakin om an ti.

²¹A ching nâi nei thei loihai chu intak takin a hmanghaia, Meithâihai inren ngai maka.

²²Pathian sinthotheina le hrâtna’n mi hrâthai zoro a bôk pehaia, Dam an sabei ta no khomin an hong dam nôk ngai.

²³Zôkna lampui ar hmuhaia, Khatak khan an irngam ngai. An lampui hro lai khom a ensui mai ngai.

²⁴Chôiindômin an oma, zâm zâmin an hek ngai; mi dang angin thêmin an oma, an chuai ngai. Buvûi anga ât inhekin an om ngai.

²⁵Khahai kha a dik loi a ni khomin tu mo, “Minlak” ni ti thei hrang? ‘Ni thu hi ite lua ni mah,’ tu mo a ti thei hrang?