Read Hrangkhol JOBA 28 Bible Online

JOBA 28 - Hrangkhol bible

JOBA 28

¹Tangkarua laih suakna hmun a oma, Rângachak irthiangtirna hmun khom a om.

²Thîr chu irnêng ata lâksuak a nia, Dâr sen chu lung hâl inhmin ata suak a nia.

³Mihaiin inthimna hin an invârtir ngaia, khur inthûktak takhai hin an lûta, inthimna kâra lung omhai chu an lâk theina hrangin.

⁴Mi om loina hmuna khur an choia, A chung tiang an irlôi khomin inhre loiin. Mi inhriatpuihai loiin an irkhâia.

⁵A’rlangna tiang chu bu songna reng a anga. A sûngrîl rêk chu mei ikâng reng a ang.

⁶Irnêng sûnga lung omhai chu Safir lunghlu a nia, Rângachak di a kopa.

⁷Ama omna kha chu râikoso khomin inhre thei mahai, Irmu khomin hmu thei ngai mahai.

⁸Ram sahrâng danghai khomin sir thei mahaia, kâmkeibaknei khom fe ngai mahai.

⁹Mihaiin lung ngar chang chu an lâka, Tânghai chu a bul phutna ata an laia,

¹⁰Lungpui khom an inverhaia, thilhlu ta tak an hmu doka.

¹¹Tui khom a fe hmu loiin thil irlang thei loihai, an inlangtira,

¹²Khannisian vârna kho tiang mo an ihmu hrang. Inhriat theina chu khôn mo a iom hrang?

¹³Mihriamin a hlu lam inhre mahai, Mi hringna rama hin hmu thei ni no ni.

¹⁴Tui inthûkhai khomin, “Kin kôla om mah,” an tia.

¹⁵Rângachak leh irchôk thei khom ni mah, A man hrangin tangkarua varh zoi zât khom ni mah.

¹⁶Ofir rângachakin phâk zât ni maka, Onik le safir lunghlu khomin phâk zât ni mah.

¹⁷Rângachak le lung irfîmin insiat thei ni maka, Rângachak enhoi ta tak leh thûl thei khom ni ual mah.

¹⁸Koral le Krustal lunghlu leh irkhî thei khom ni mah. Vârna man chu lunghlu manhai nêkin a itam a ni.

¹⁹Ethiopia rama lunghlu topaz khomin pha maka, Rângachak irthiang nêkin a hlu ual.

²⁰A ni vârna chu khô tianga irthoka om mo a ini? Inhriat theina chu khôn mo a iom?

²¹Thilhring inkhat lua’n hmu theiloia irthup a ni, Chung lêng vatehai ten lua’n an ihmu thei loi a ni.

²²Irhmangna le thina’n, “A’rhâi chu kin mikuara kin inhriat ngai,” an tia.

²³Pathian vaiin a lampui chu an hriat, Ama vai kêng a omna hmun inhriat thei.

²⁴Nêngpil hek dênin a thîra, vân hnuaia thil tinrêng an lang vinga.

²⁵Phâivua le tui hrâtlamhai ar khi lai khoma khan,

²⁶Rotui tho hrang dân an sâp laiin, khonri le kôlirtêk lam a siam lai khan.

²⁷Vârna chu a hmua, an puanga, an dettira, a suisuaka.

²⁸Mihriamhai laia, “Irngai ro, RENGPA chi hi vârna a ni, thil saloi mâksan hi inhriat theina chu a ni,” a tia.