Read Hrangkhol JOBA 29 Bible Online

JOBA 29 - Hrangkhol bible

JOBA 29

¹Joba’n hiang hin sunzomin thu a hril nôka.

²Tha lei fe tâkhaia khan, Pathianin a ni hruaia, Tianlai anga om ki’rzuk nôk ta!

³A meiser chu ki lu chunga a vâra, A vârna tûngin inthim chu ki khêl ta.

⁴Ki vânglai sûnhai Pathianin ki puan inah a ni ompui lai khan,

⁵Itinrêngthotheiin a ni ompuia, ki nâihai ki kôla an om lai khan.

⁶Ki lampuia dûttui a luang zun zun lai khan, Lungpui sûnga sahriak kin sin laihai khan

⁷Khopui fena lampuia ki fea, Mikot lian kôla roirêlna toihmun ki’rfûktir lai khan

⁸ruathartehaiin an ni hmua, an irbîka, Ulianhai an thoi huaka, an ni ena,

⁹ulianhai chong khom an irngama, An kut leh an bâi an hîpa.

¹⁰Milianhai khom an dâihreka, An milei khom an danga a kopa,

¹¹ki thuhril inhriathaiin an nin pâka, A ni hmuhaiin an ni chôiirsânga,

¹²Mi inriang changpui nang hai, le chaphai ki sanhaia, changpui hrang nei loi nâi farahai khom.

¹³Thi hrang anga om pumin, an lômna thu an hrila, Meithâihai khom râifân takin ki’rchuhaia.

¹⁴Diknahaiin ki ompuihaia, Roirêlna dik chu ki songkol le ki rênglukhum a ni.

¹⁵Mitchohai hrangin mit ki nia, ke’nbâihai hrangin ke ki ni.

¹⁶A’rsamhai hrangin an pa ki nia, ki hmêl hriatloihai thubuai khom ki’rngaitua pehai ngai.

¹⁷Mi sualhai pho chu kin siat pehaia, An thil fâk lai khom ki sutpaihai ngai.

¹⁸A sôt thei dôra dam sôt ki tuma, “Keima ina ngêt thi ki ti,” ki tia.

¹⁹Ki’rzunghai chu tuia inchiain, ki ônhaia irdôtui duiin zân sôt a om ngai.

²⁰Roiinpui u ual ki ta, hong hrât si sit ki ti.

²¹Mihai sabeiin keima tiang an irhei ngaia, keima thurôn irngaiin an ni inghâk ngai a ni.

²²Ki hril zoiin chu ite hril hrang nei ta ngai mahai, ki thuhril chu an ikhop a ni.

²³Ruatho masatak an inghâk angin, an ni inghâk a ni, Rua hnungkhôn an izong angin an inhriat nuam a ni.

²⁴Beidong an tuang laiin an râi kin fântira, ki râifân hmêlin an hartirhai ngai a ni,

²⁵An lampui hro hrang ki sinsiam pehaia, An hruaitu ki nia, Sipai pâl laia rêng angin ki oma, Anni hrangin chu beidong tuanghai inhnêmtu ki ni.