Read Hrangkhol JOBA 31 Bible Online

JOBA 31 - Hrangkhol bible

JOBA 31

¹Taksa irzukna lungrîl nei pumin, Dôngmate en loi hrangin chong kin kung ta.

²Chung Pathian kuang khin imo dongtum le Itinrêngthothei anchungtak kuang ata ei dongtum imo a ini?

³Mi sualhai hranga siatna le thiltho insualhai hranga vânduaina a ini loi hrang mo?

⁴Ki lampuihai a hmu infela, ki kalphêt tin hi an inhriat zit mo ni ma?

⁵Minlak tho ki nuama, Irhuangna hmang nghâkhmo ki ni’n chu.

⁶Irvarna diktak leh ni var sianlân, Ki dik lam hi Pathianin inhre ving a ti.

⁷Khan, lampui dik ata rot ki nia, ki mitin suala a ni hruaia, ki kutin thil saloi tho nuam ki lei ni.

⁸Ki isinna ra chu mihaiin fahai sian, ki chîmu songhai chu mi’n la ving ri sehai.

⁹Ki lungrîl hin nupang a’rzuka, Mi dang inkhâr kôla ki irdîp a ni’n chu.

¹⁰ki dôngma’n mi dang hrang bu er pe sianlân, Mi dangin zâlpui ri sehai.

¹¹Hianga thotu kha chu, Roirêltuhaiin thi raka an isoisak ngêt hrang a ni.

¹²Hianga sual kha chu kâng irhmang thei ving ang ni a ti. Ki inei murdi kâng zit a ti.

¹³Ki siahlo nu le pa khom, Keima ata an ichiarna thu, Dik takin ki’rngaitua pehai no’n chu,

¹⁴Pathian a hor thok tena chu itin mo tho ta ning? A hor zoi infel tena teh itin mo sâm ta ning?

¹⁵Phîng sûnga ni sintu khan ama khom a isiam mo ni ma? Mi inkhat kutsuak kin ini loi ma ni?

¹⁶Inrianghai le tikhoihai changpui sêl ngai ma unga. Meithâihai beiindongtir ngai no ning.

¹⁷Bu khom ki bing vaia nêkin nâi farahai an nêk sa no’n chu,

¹⁸An chîn lai ata an pa angin ki enkolhaia, Nâitesen an ni lai ata ki idonsuihai an ni.

¹⁹Tukhom silkai boia irhmang mani, inriang innghâk hrang boi ki hmu’n chu,

²⁰Tukfam samul leh siam ki belrahai ata ki pêk ngai, Khanchu ama’n lungrîl takin a nin fâk ngai.

²¹Lampuia khan changpuitu ki hmu sikin, Farahai chunga kut ki lei thâkin chu,

²²ki dârmikhehai hi irkhoi sianlân, ki bân khom a bula hin irtan ri se.

²³Pathian ni isoisak ki chi hrai sikin, An lal hrai sikin kha thilhai kha ki itho ngamloi a ni.

²⁴Rângachak chu ki irnghatna tak a nia, Rângachak irthiang kôla, “Ki zôkna ni nih,” ki ti’n chu,

²⁵ki irchongna le ki sintho intam sika lôm ki niin chu,

²⁶Misa khi a vâr hrai sika le tha khom a roiinpuina sika chubai lei mûk ngai ma ung.

²⁷Anni chôiirsâng hranga hruai invâiin om ngai ma unga, Annihai inzâ sikin ki kut khom irboptir no ning.

²⁸Annihai khom kha roirêltuhaiin an isoisak ngai sual a ni. Ama Pathian philsan ngaitu an ni.

²⁹A ni en nuam loitu siatna lômpui ki niin chu, Thil saloiin a ni hong de thut laia lôm ngai ki niin chu.

³⁰“Thi ri se,” tia khua ki sâlna hrangin ki bâi khom phal ma ung.

³¹Ki sintho ngaihaiin, mikhual ki lei lômlût ngai ti khom an inhriat.

³²Mikhualhai kholaidunga riak ngai mahai, khual inzinhai hrangin mikot kin hong mai ngai.

³³Mihai tho dân anga sualna ip nuam ni ma ung, Sualna khom thup nuam ngai ma ung.

³⁴Mipuihai inzâna le ki’rchipuihai chitna sika, dâihreka suak ngam loi ki niin chu;

³⁵ki thu irngaitu mo la om thei nihai, ki ihril murdi chu a dik a nia, Itinrêng thotheitu’n ni sâm sianlân chu, keima tep thei hrangin an ni idoinahai hi irziak ni thei sianlân chu!

³⁶Irsongpui hrangin ki dârsuama târ ki ta, Rênglukhum angin khum ki ti.

³⁷Ki itho murdi Pathian inhril ki ta, Ngam pangin ama pan ki ti,

³⁸Loia ki inei ngai kha, a neitu diktak kuanga ki ilâk a nia.

³⁹A man pe loiin, a ra vai lei irhmal ngai ki nia, sinthotuhai dangchârin ki siahaia ni’n chu.

⁴⁰Bu bila sûl mông angin, Barli irthûlin hloi thar mông ri se. Joba thu chu a hek ta.