Read Hrangkhol JOBA 32 Bible Online

JOBA 32 - Hrangkhol bible

JOBA 32

¹Khanchu Joba kha a fel a la’rti mai sikin a rual inthumhaiin ite ti pe nuam ta mahaia.

²Elihua, Baraka nâipa, Buz mi, Rama irchihai anga mi Joba chunga a ning an mur pea, Pathian nêka sa ar ti sikin.

³Joba rual inthumhai chunga khom a ning an mur pea, Joba chu theiloi inchang pumin a sâmna lam an inhriat no sikin.

⁴Annihai nêka ulian a ni sikin Elihua’n Joba kuanga thuhril hrang zoro a nghâk mai a ni.

⁵Khanchu hi mi inthumhai hin a sâm lam zel inhre mahai ti an hriatin chu Elihua ning an mur pe tâka.

⁶Baraka nâipa Elihua, Buz mi’n hiang hin a sâma: “Ki la nâipanga, nangni chu ulian nin nia, Khasikin nangni ki mahripa, ki inhriat khom nin kôla hril ngam ma ung.

⁷Ulianhai inhril hrangin an kum tamhaiin vârna irchutir ri sehai, ki tia.

⁸Khannisian, thil inhriat theitirtu chu mihringa irtha om, Itinrêngthotheitu phûk chu a ni.

⁹Mi kum tam murdi vâr ual mahaia, ulian pai a ni’n chu inhre zit mahai.

¹⁰Khasikin nir ngai pe unglân, ki’rngaidân la hong hril hi rong, ki iti a ni.

¹¹Irngai roi, nin thu ki nghâk maia, Hril hrang nin zong kârin, Nangni ki len hriat hlet nin isôn loi mo?

¹²Ngûk ngitin nin thu ki le’rngai maia, nin laia tukhomin Joba dikloina sêl thei mak chêia, Tûte’n ama sêl thei lak om mak chêia.

¹³“Irdîn roi; mi vârtak kêng ei itong a ni ta, Mihriam ni loia, Pathian vaiin kêng an hnê thei hrang,” ti pal nin tih.

¹⁴Ama thuin ite ni la dêng inhnê ma, Nin insâp dân angin chu nangni sâm ual no ning.

¹⁵An chongbâiin a idaih pehai zoi loi a ni ta, Ite nang a sâm lam zel inhre ta mahai.

¹⁶Atûn hin an dâihreka, hril hrang inhre loiin, an ngîr mai tâka, ki inghâk zoihai hrang mo?

¹⁷Keima’n hong sâmhai ki ta, Ki’rngaidân la hong hril hi rong.

¹⁸Hril hrang ki nei intama, ki lungrîla a ir-ût mai a ni.

¹⁹Irngai roi, ki lungrîl hi, Uain irhu suak thei loi ang a ni, Uain botol thar puak khoi hrang va vâng ang ki ni ta.

²⁰Ki hril bak ta no’n chu ki sôl chan no ni. ki bâi hong phong ki ta, hong sâm ta ki ti.

²¹Tûte inzaktir no ninga, Tûte inpâk ual no ning.

²²Mi’n pâk hi thei ma unga, khano’nchu, A ni siamtu’n ni la pai lat a ti.