Read Hrangkhol JOBA 34 Bible Online

JOBA 34 - Hrangkhol bible

JOBA 34

¹Khanchu Elihua’n a hril maia,

²Nangni mi vârhaio, ki thu irngai roi, Nangni a theithiamhaio, nin mikuar lei sung roi.

³Bâiin a tui lam an hriat ngaia, Mikuarin a sa le saloi a theithâka.

⁴Eini hranga a dik chu inthangin lân, Ei ta hranga a sa sa chu inthang ei ti.

⁵Joba’n, “Mi fel ki nia, khannisian Pathianin ki diknahai a ni hnôl pea.

⁶Ki dik maiin chu milak a ni tia, Insiatna boi, indam theiloi rakin ki popa,” a tia.

⁷Joba anga mi moh nin hmu ngai ta? Pathian mahrip tho lam inhre loiin.

⁸Thil saloi thohai leh irrualin, Mi sualhai leh lêng suamhai chu tu mo?

⁹“Pathian inlômtirtu’n hi mihriamhai hrangin chu ite ar fêna om loi a ni,” a la ti sa maia.

¹⁰Khasikin nangni mihriam lungrîl neihaio, irngai roi, Pathianin thil tho’nchâiin, Itinrêngthotheitu’n, Thil dikloi a itho thei loi hrang mo?

¹¹Mi an sintho ang takin a thuan nôk ngai. Mi tin an omdân angin an chunga an tungtir ngai.

¹²Pathianin thilsual tho viat no nia, Itinrêngthotheiin dik loiin roirêl viat no ni.

¹³Tu mo irnêng chunga hin thu inneitir, Rammual pumpui inkoltirtu chu?

¹⁴A’rtha lâk kîrpai pe a ta, A phûk a lâkpai pe’n chu

¹⁵Mi murdi irhmang zoi an ta, Mihriam chu nêngpila kîr nôk a ti.

¹⁶Inhriattheina ni neiin chu hi hih irngaitua’n lân, Ki ihril hi irngai sabak roh.

¹⁷Thudik theimâktu hin roi moh a rêl ngai? Mi dik le sinthotheitu hi thei loi ni inchangtir hrang ma ni?

¹⁸Ama’n chu rêng kuang khom, “Chanlamboipa,” a tia, mi roiinpui khom, “Mi sualpa,” a iti ngam a ni.

¹⁹Hruaituhai khom indit bîkhai ual maka, Mi irchonghai khom inrianghai nêkin en irsânghai mah. Ama kut suak ving an nia.

²⁰Mitkhapkârin an thia, zânlaia an inthinga, an irhmanga, Mi hrâthai khom irnak song nang loiin, an irhmang thei ngai.

²¹Mihriamhai om dân a en irchika, An châng dân a ihmu’nfel ving a ni.

²²Thil saloi thohai irbîkna hrang, Inthim irsa om maka, Thina dâihlîm khom om ual mah.

²³Pathian makunga roirêlna fe hrangin, mihriamhai hrangin zoro bîk om ual thei ma.

²⁴Mi roiinpuihai ar hnuaitirhaia, anni irthûl mi dang a siahai ngai, Ama hrangin an thurchi irdon ual nang pe mah.

²⁵Khaanga sinthohai an hriat mai sikin, zâna a paihaia a irhmangtirhai thei a ni.

²⁶An sual sikin, mihai mithmua a soisakhaia,

²⁷Ama an rotsan sikin le a dânhai an zôm pe no sikin.

²⁸Pathian inhriat thei rakin inrianghai an khêktir ngaia, Riangvâihai irhâi chu a len hriat thei ta.

²⁹Ama lei dâihrek sianlân, Tu mo thiam lan changtir thei hrang? A hmêl a thup khomin tu mo hmu thei hrang? Nam le mimal ta hrang khomin hmunkhat a ni.

³⁰Pathian inhreloi mi’n chu roi a rêl thei loina hrang le, mipuihai khom ite tho thei nei no nihai.

³¹Mihaiin, Pathian kuang hiang hin hrilhai sian, “Mi ite ki tihai no khomin, hremna ki tuanga.

³²ki ihmu thei loina chu nir chutirin lân, ki lei tho’nsual tâkin chu tho nôk ta ngai no ning,” ti sianlân.

³³Pathian thuan theina chu ni indit dân angin, ni hnôla! Keima ni loiin nangin ni inthang hrang a ni. Khasikin ni inhriat chu hril roh.

³⁴Inhriatna neihai le mi vârhaiin chu ki thuhril hi an inhriatin chu ni pompui an ti.

³⁵Joba hi ite inhre loiin nuamningin a chonga, A thuhrilhai hin vârna om mah ni tipui roi.

³⁶Joba thuhril hi ni’rngaipui sabak hi roi, Mi sualhai anga nuamninga a ihril a nih ti inhre thei nin ti.

³⁷A sual bôksa’n tehel a zonga, Ei rênga makunga hnuaisia takin Pathian kha a kut a inbênkhum a ni.