Read Hrangkhol JOBA 35 Bible Online

JOBA 35 - Hrangkhol bible

JOBA 35

¹Elihua’n a hril nôka:

²“Pathian kôla mi dik ki ni,” ni tia, A dik mo ni irsôn?

³“Thilsual ki tho khoma tho no khomin, Nangma hrangin imo ar fêna. Ki ta hrangin imo an lâpna om hrang,” ni iti ma ni?

⁴Nang lei sâm rong, nangma le ni rualhai leh khom.

⁵Irvân tiang tangin lân, sûmhai khi thîr ro, Nangma nêkin an irsâng ual a ni.

⁶Thil ni tho’nchâi khomin Ama ta hrangin imo ar fêna om? Nin châina a tam khomin ama ta hrangin ite ar fêna om ma.

⁷Ni dik khomin imo a hmangna om? Ni kut ata imo ni idong?

⁸Ni sualna hin nangma anga mihriam vai kêng a itôn thei, Ni felna khom hi mihriamhai hrang vai kêng a ni.

⁹Dengtheina a tamin chu mi an inrûma, Mi sansuak theihai kôla sansuak hrangin an khêka

¹⁰Khannisian tûte’n, “A ni siamtu Pathian chu khôn mo om; zâna hla nin saktirtu chu.

¹¹Irnênga ramsahai nêka inhriatna inthûk ni pêktu chu, Chung lêng vatehai nêka vâr uala ni siamtu chu,” ti ngai mahai.

¹²Khatak khan an khêka, tûte a sâmhai boiin, Mi sualhai mualinphoina sikin.

¹³Pathian nuama zongtuhai chu irngaitua ngai maka, Itinrêngthotheitu khomin irngaitua pe no ni.

¹⁴Nangma len vâng hin chu o, Ama hmu ma ung, nghâk za zâm roh, Ni chungthu chu ngaitua hrangin a kuang a om.

¹⁵Atûn ningmurin nang a soisak no sikin le sualna a zuang irngai poimo no sikin.

¹⁶Joba hin a bâi a âng mai maia, Ite inhreloia a ichong pa pai a ni hi.