Read Hrangkhol JOBA 37 Bible Online

JOBA 37 - Hrangkhol bible

JOBA 37

¹Hi sika hin ki lungrîl an dûka, ki milung hlut hlut a ti ngai.

²Satakin irngaitua’n lân, a khêk irhâi le a bâi ata irhâi hong suakin,

³Irvân pumpui hnuaia chim angin, a michêk irtêk chu irnêng chung sipin.

⁴A hnung tiang kêng ar hâi a suaka, A roiinpuinatak chu a’rhâi inring dur dur hi a ni. A’rhâi an inhriat khomin irngamtir ual loiin.

⁵Pathianin irkhêl takin, khopui an ringtira, thil irkhêltak ei insâp phâk loi a itho a ni.

⁶Ivurhai khom “Hnuaia ta ro,” a tia. Khaang dênin rua khom “Zuang tho ro,” a tia.

⁷Mi tinrênghai kut a chel inngar pehai zoia. Ama itho a nih ti mihaiin an inhriat theina hrangin.

⁸Khanchu ramsahaiin irbîkna hmun an zonga, An omna khura an om chian ngai.

⁹Sim tiang ata phâivopui saloi a hong thoa, Hmâr tiang ata phâivua dâi a hong thoa.

¹⁰Pathian phûkin vur a hon changtira, Tuipuilianhai khom an kangtir theia.

¹¹Sûm irsâhai khi tui an pêltira, sûm zîng laia kôl a’rtêktira.

¹²Ama thupêk ang takin a’rtêktir ngaia. Rammual pumpui hi Ama thu anga a inomtir ang hin.

¹³Mihriam soisakna hrang mo, irnêng insatir hrangin mo, annihai hi a inomtir ngai a ni.

¹⁴Joba, hi hih le’rngaitua sabak nôk roh, Mikuar sungin Pathian sintho irkhêlhai chu irngaitua ro,

¹⁵Khahai kha Pathianin thu a ipêk dân le, Sûmphâi ata kôl a irlektir dân hi nin hriat mo?

¹⁶Sûm a irhêk dânhai le inhriatna irkip neitu sintho irkhêl hi nin hriat mo?

¹⁷Sim tianga phâivua’n irnêng an lumtira, Ni songkol irthânin an dui zôia;

¹⁸Ama chu irvân khi ni kaipharpui thei moa? Thîrtang anga ngar chu!

¹⁹A kôla kin ihril hrang chu ni ti pe ta ro, Inthimin a ni tuama, ite hril hrang inhre thei ta ma ung.

²⁰Ki ihril hrang kêng ti hih ama mo hril ngam ning? Mi’n ama siatna hrang lampui mo a zong ngai?

²¹Atûn phâivua a hong thoa, a sêm inkianin, vânlaizôla vâr roiinpui khi mihaiin en ngam mahai.

²²Hmâr tiang satakin rângachak a hong vâra, Pathian chu roiinpui takin a hong irvoa.

²³Itinrêngthothei chu hmu suak thei loiin sinthotheina le dikna khan a roiinpuitira. Felna a nei intama, phâk zoi zât ni mah.

²⁴Khasikin mihaiin an chia, A vâr irtihai khom tûte chi ngai mah.