Read Hrangkhol JOBA 39 Bible Online

JOBA 39 - Hrangkhol bible

JOBA 39

¹Tânga kêl inte zoro mo nin hriat? Sazuk inte lai mo ni hmu ta?

²An inrâi sûng a tha tep dân sûtin, An te hrang zoro mo nin hriat thei?

³An inboka, nâiha’n a sêhaia, An inte zel ngai a ni.

⁴An têhai chu an suak ata ramkâra seilianin an oma, An pui khom inhre ta loiin an om ngai.

⁵Ram sakuartung chu tu mo an nghiptir thei? A nuamlam angin tûte’n lo thei ngai mah!

⁶An omna hrang hmun kin dang pehaia, michi tamna rama an om nuama.

⁷Khopui irhu lumna ite innang ngai mahai. Tûte’n inthêmin hmang thei ni ngai mahai.

⁸An lêng nuamna chu tângsuilunghai hin a nia, sûlhring fâk hrang zongin an irvâk ngai.

⁹Selechal hi hmang theiin mo? Ni sâ vâi ina riak nuam ni mo?

¹⁰Âlkai hrangin hrui mo thung theiin? Ni hnunga nang zui nuam ni mo?

¹¹A hrât sikin, a hrâtna hmangin ni sin intak nang thopui le mo ni iam?

¹²Bu mo in-âttir theiin? Bu mo nang pêl pe nuam ni?

¹³Ostrich vâ’n chu a mitha a zâp theia, Khannisianlân khânghlâi angin vuang thei ma.

¹⁴Irnênga a’rtui a phûma, nêngpilin a’rkhudela.

¹⁵Mihaiin an sirsiat theia, ramsahaiin insiat an tih iti ite insâp loiin.

¹⁶An hriatloi angin a oma, a isôlpuinahai om pe no khomsian a poi ti ual loiin.

¹⁷Pathianin vârna pe maka, Inhriattheina a pêk no sik ualin,

¹⁸Intân hrangin irnak a songin chu sakor le a chunga chuanghai chu ite ni ta mahai.

¹⁹Sakor hi nin hrâttir thei ngai mo? A ruangzâng hi ni isiam pe mo a ini?

²⁰Khâi anga fuan hrâtin ni isiam mo a ini? A hnâr tum tet tut hi ichiom tak a ni.

²¹Irhôra a ke inphîtin irnak a lâka, Irdoina hmuna a fe hrangin a suaka,

²²Ichi zel nei maka, irkhâi ngai maka, khandai laia khom rotna lungrîl nei mah.

²³A puma thalkok irhâi suakin, ufei le thal irtêk long longin a oma.

²⁴Ningmur hmêl irputin ar ling khaka, Bekul irhâi a zuana. Omchian thei ta mah.

²⁵Bekul irhâi an hriat paiin chu a hnâr a khônga, irdoina irhâi chu hlatak ata khom an hriat thei, Hruaituhai khêk le an hê chu.

²⁶Irvâna irmu vuanghai khi ni’rchutir thei mo? Sim tiang irheia an mitha zârhai khi?

²⁷Nangma thupêk sikin mo irmu vânlaizôla an ivuang, Irsângtaka irbu an ikai thei?

²⁸Rôl kâra a om ngaia, lungpui kik kârhaia a riak ngai.

²⁹Khatak ata kha fâk hrang a en irzûla, hlataka om khom a hmu theia.

³⁰A têhai khomin thisen an indôp theia, Saruak omna hmuna an irbuk ngai a ni.