Read Hrangkhol JOBA 40 Bible Online

JOBA 40 - Hrangkhol bible

JOBA 40

¹RENGPA’N Joba kuang,

²“A sêltu, Itinrêngthothei chu ni isêl ngam hrang mo? Pathian sêltu hin sâm ri se,” tiin

³Khanchu Joba’n RENGPA kha a sâma:

⁴keima mi chanlamboi hin, itin mo nang ki isâm thei hrang? Ki bâi ki inhruk a ni.

⁵Voikhat ki hril tâka, nang sâm ta no ning, Hril nôk mai ta no ning.

⁶RENGPA’N phâivopui lai ata Joba kha a sâma:

⁷Pasal irti takin ni puan bomin lân, Thu nang ki irdonhai hi ni sâm roh.

⁸Ni tho indik loinahai hi thei ni chang theina hrangin, keima ni ni intum hrang ma ni?

⁹Pathian anga hrât mo ni ni? Ama hê anga mi izôm thei inring hê mo ni neia?

¹⁰Inlalna le inzaomna hong irbelin lân, chôiindômna le roiinpuina’n irbel roh.

¹¹Ni ninginmurna sip lêt kha bun suakin lân, Mi lârirpâk murdi kha entinin irhniamtir roh.

¹²Mi lârirpâkhai murdi chu entinin irhniamtirin lân, Mi siahai kha an ngîr hmuna sirbêhai roh.

¹³An rêngin irnênga phûmhaiin lân, hmun irthupa an hmêl thuphai roh.

¹⁴Khanchu ni kut chang tiang nir sansuak thei tih keima khomin inhre thei ki ti.

¹⁵En ro, Behemot hi nangma ang dêna, ki kut suak a ni hi. Sehrât angin hloisûl a ifâk ngai a ni.

¹⁶Irngai ro, a hrâtna chu a konga om a nia, A’rthahrui chu a phîng taksahaia khan a iom a ni.

¹⁷A’rmei chu sidar thing angin an ngartira, A malpui khom irthahruiin a ituam pe a ni.

¹⁸A ruhai chu thîr anga ngar a nia, A kehai khom thîrtuan anga om a ni.

¹⁹Pathian thilsiam laia ulian tak a nia, A siamtu vaiin khandai leh a inhnê thei a ni.

²⁰Tângsîpa a fâk hrang sûl a mônga, Kha khan ramsa sahrâng olehaiin an irnghatna a ni.

²¹Lotus pâr ilhlingnei hnuaia a zâla, tuichir sûl kâra ar bîk ngai.

²²Lotus pârkung khan a’rhlia, Tui kôla tui ihnôknahai khan a’rdâia.

²³Irngai ro, tuilian irsokhai khom chi ual maka, A bâi phâk rakin Jordan tuilian khom sian chi maka.

²⁴Râl leh an irdoi lai hin nin chel thei ngai mo? A hnâr khom tu mo an vit ngam hrang?