Read Hrangkhol JOBA 42 Bible Online

JOBA 42 - Hrangkhol bible

JOBA 42

¹Khanchu Joba’n RENGPA kha a sâma:

²Itinrêng ni thothei ti kin hriat ta. Ni ititak chu sêl thei ni viat mah.

³Ite inhre loi hin itina mo ni lei irfûktirna hi ki lei isêl tâk hi! ki lei inhriat theiloihai ki lei ihril kêng a ni ta. Ki inhriat zoi loi, keima hranga irkhêl hraihai chu.

⁴Irngai ro, thu nang irdon ki ti; nang irdon ki ta ni hril roh.

⁵Ki mikuar leh dên kin hriat tâka, Khannisian atûn chu ki mit ngêtin nang ki hmu ta.

⁶Khasikin ki irtir tâk a ni, nêngpila toiin, Vâiphin irthu’n ki irsîr a ni ta, a tia.

⁷Khan RENGPA’N Joba kuang, hi thu hi a hril zoiin, RENGPA’N Elifaza, Teman mi kuanga khan, “Nang le ni rual inhnihai chunga ki ning an mura; ki siahlo Joba angin, ki chungchâng thu diktakin hril mak chêia.

⁸Khasikin, sehrâtchal sari le belrachal sari kai unglân, ki siahlo Joba kuang fe unglân, nangni hrang hâlirvôm thil var hlan roi. Khanchu ki siahlo Joba’n nangni chongchai pe a ta, a izonglam angin lei pom pe ki ta, nin into lam angin chu nangni thuan no ning, ki siahlo Joba angin ki chungchâng thu diktakin hril ngam mak chêi sikin,” a tia.

⁹Khanchu Elifaza, Temana mihai, Bildada Sua mihai, Zofara, Naama mihai chu an va fea, RENGPA thupêk angin an tia; khanchu RENGPA’N Joba izongnahai chu a’rngaitua pea.

¹⁰Joba’n a rualhai a chongchai pehai zoiin chu RENGPA’N Joba chu a hon damtir insa nôka, matona a inei lêthniin a pêk nôka.

¹¹A urênghai le a farnuhai, le matona a hmêlhriat murdihai chu a kuang an honga a ina bu an nêkpuia. RENGPA’N a chunga thil saloi an tungtir sikin an milung hoiloina thu an hrila, irtharngam an saka. Mihaiin tangkarua le rângachak kutsabi an pêk chita.

¹²RENGPA’N Joba zoro hnungkhôn chu matona nêkin sat a vura. Belra sîng minli, saringsei sângruk, sehrât bop sângkhat, sakuartung a pui sângkhat a neia.

¹³Nâipasal sari le nâinupang inthum a neia.

¹⁴Khan, a matontak irhming chu Jemima a phuaa; inhnina irhminga khan Kezia; inthumna chu Keren-Hapuka a tia.

¹⁵Ram tin laia Joba nâinuhai anga dôngmate hmêlsa om mahai. An pa’n an nuchahai leh irchon a sem pehaia.

¹⁶Hi zoia hin chu Joba a la dam maia, kum irzakhat sômminli a idam a ni. A nâipahai, a tûhai irlo minli dênin a hmu phâka.

¹⁷Joba chu uliantaka tar kûna damin a thi ta.