Read Hrangkhol INPÂKNA HLAHAI 10 Bible Online

INPÂKNA HLAHAI 10 - Hrangkhol bible

INPÂKNA HLAHAI 10

¹O RENGPA, ithoa mo hla taka ni ingîr ngai? Ithoa mo lunginzînghai laiin ni irthup ngai?

²Mi siahai lârirpâkna sikin mi inrianghai kha irzûl bitin an om ngai. An thil sual ngaitua suakhaia khan anni ngei in ôk ri sehai.

³Mi sia khan a milung nuamlam a song ngaia, Mi huatirham khan RENGPA’N chu hnung a songsana, a hmusit ngai.

⁴Mi sia chu lârirpâk hmêl irputin, “Inphût no ni,” a ti ngai. A ngaituana murdi chu, “Pathian zel om mah,” ti inzen a ni.

⁵A om dân chu itiklai khomin a det maia, Ni roirêlna chu chung tiang hla taka, a hmu phâk loia, a om pata: Ama doituhai murdi khom an nuisan mai ngai.

⁶A lungrîla chu, “Inhnîng no ning: Irlo tin tin dênin lunginzîngin om no ning,” a tia.

⁷A bâi chu khua sâlnahai, huangnahai, dengintheinahaiin a sipa: An milei hnuaia chu thil sualna le insiatna a om.

⁸Kho tina inrûka inruangna hmunhaia a toi ngaia: Hmun fianriala khan ite ti loi mihai a that ngai.

⁹Kâmkeibakneiin a pûka a inruang angin ama khan fianriala an ruanghai mai ngai: Mi inriang chel hrangin an ruang ngai: Mi inriang chu a chel ngeia, khanchu a lên khan a hnûk irhmang ngai.

¹⁰Mi ite tho thei loihai kha inrîlin an oma; Mi hrâthai sirpha’n an om ngai.

¹¹A lungrîla chu, “Pathianin a irnghil a ni: A hmâi chu a thupa; itika khom hmu no ni,” a ti ngai.

¹²O RENGPA, thoiin lân; O Pathian, ni kut hong inlek ta: Mi’nrianghai chu irnghil no roh.

¹³Itho sikin mo mi sia chu Pathian a hmusita, An lungrîlin, “In phût no chi ni,” a iti ngai?

¹⁴Hmu chu ni hmu chian tâka; ni kuta thuan hrangin thil tho’nsual le nuarna ni ien mai: Ite tho theiloi mi chu ni kuang an koltir ngaia: Pa nei loi changpuitu ni ni ngai.

¹⁵Mi sia bân chu inkhiakin lân; Mi sual chu, a pualoina zong suak roh, ni hmu lat mâka chu.

¹⁶RENGPA chu kumkhontuang hrangin Inlaltak a nia: Nam tin chu ama ram ata an irhmang ta. 17,

¹⁷RENGPA, irnênga mi chu ichiom taka om nôk ta loi hrangin, Pa nei loi opbêna tuanghai roirêl pena hrangin, Thuhnuairôlhai nuamlam chu ni ngaitua tâka: An milung kha sinsiam ni ta, ni mikuar chu irngaitir ni ti.