Read Hrangkhol INPÂKNA HLAHAI 102 Bible Online

INPÂKNA HLAHAI 102 - Hrangkhol bible

INPÂKNA HLAHAI 102

¹O RENGPA, ki chongchaina hi irngaitua’n lân, Ki khêk irhâi hi ni kuang tung ri se.

²Ki lungzîng nia keimaa hin ni hmâi thup no’n lân: Ki tiang hin ni mikuar zuang do’n lân; Nang ki koi zoro’n ni sâm lat roh.

³Ki hring sûng nikhuahai hi meikhu angin ar zâm irhmanga, Ki ru hi thingthu angin a ikâng a ni.

⁴Ki milung hi hloisûl anga em thatin a oma, a thêm zoi ta; Bu nêk khom ki’rnghila.

⁵Kin ruhai hi ki taksaa a ikop khak a ni.

⁶Ramchâr simbu ang ki nia; Kho ram simbu ang chian ki lei ni ta.

⁷Ki meng chiana, Chongzong, in chunga ama vaia om ang ki lei ni ta.

⁸A ni doituhaiin chu sûn sôtin an ni hril insiat ngai; Ni hmumâkhai khan ki’rhming chu khomâksâmna’n an hmanga.

⁹Irvut hi bu angin ki nêka, Ki i-in hrang chu mitrithi leh ki pol ta a ni,

¹⁰A sân ni milung a hoi no le ni ninginmur sikin: Nangin ni nin doma, ni ni pai irhmang tâka.

¹¹Ki dam sûng nikhuahai hi khohloi irhlîm boi thiai ang kha a nia; Hloisûl angin ki thêm tâka.

¹²O RENGPA, nangma chu kumkhua’n om ni ta; Nangma inhriat maina khom irlo murdi dênin om sa a ti.

¹³Thoi ni ta, Zion tâng chu lunginkham ni ti: Ama chu lungkham zoro a ni tâka, a ni, zoro inkung chu a tung tâka.

¹⁴Ni siahlohai khan a lunghai kha an irngaiinhlua, A vâiphin khom lung an inkhama.

¹⁵Khanchu nam tinin RENGPA irhming kha chi sa an ti.

¹⁶RENGPA khan Zion khua kha an ding nôk tâka, A roiinpuinaa irbelin an lang tâka;

¹⁷Invâihai chongchaina chu a uksaka, An chongchaina kha hmusit ngai mah.

¹⁸Kha kha thoiinthar la hong om hrang khan irziak ni a ta: Nam siama la hong om hrang khan RENGPA kha inpâk an ti.

¹⁹Ama khan a hmun irthiang irsângtak ata a zu ena; RENGPA khan irvân ata irnêng hi a zuang hmua;

²⁰Mi intâng inrûm kha irngai hrang le, Thi hranga inkunghai kha khoi hrangin;

²¹RENGPA sintho hranga mi tin le ram tin an inkhôm tika, Mihaiin RENGPA irhming chu Zion khuaa an hril theia, An pâkna thu chu Jerusalem khuaa an hril theina hrangin.

²³Ama khan lamlaia hin ki’rnak an chuaitira; Ki dam sûng hi an boitir ta.

²⁴“O ki Pathian, ki vânglai nikhuahai hin ni lapai no ro,” ki tia: Nangma kumhai chu irlo om sûng murdi’n om a ti.

²⁵Irnêng irnghatsan chu tianlaia ni phûm tâk a ni; Irvânhai khom ni kut suak a ni.

²⁶Khahai kha la boi irhmang a ta, nang chu om mai ni ti: A ni, khahai murdi kha silkai angin la milui a ta; Puan angin thûl ni ta, hong danglam ta ni ti:

²⁷Nang rêk chu ni pangai maia, Ni kumhai khan boi ni rêng nei no ni.

²⁸Ni siahlohai an nâihai kha om mai an ta, An irchihai kha ni makunga indetin om an ti.