Read Hrangkhol INPÂKNA HLAHAI 103 Bible Online

INPÂKNA HLAHAI 103 - Hrangkhol bible

INPÂKNA HLAHAI 103

¹O ki hringna, RENGPA chu inpâkin lân; Ki phîng sûnga om murdihaio, ar hming irthiang chu inpâk roi.

²O ki hringna, RENGPA chu inpâkin lân, A sintho insa murdihai chu irnghil no roh:

³Ama khan ni pualoina murdi nang a ngaidam hena; Ni natna murdi nang an dam ngaia;

⁴Irhmangna ata ni hringna kha nang ar tan ngaia; Lungkhamna le inrennahai nang an khumtir hena;

⁵Ni bâi kha thil sa’n an khoptir ngaia; Khanchu ni thoibop kha irmupui anga siam tharin a om nôk ngai.

⁶RENGPA khan, nêpsiana tuang murdihai hrang, Thil fel tho pe’n, roi a rêl ngai.

⁷A lampuihai kha Mosia an hriattir ngaia, A sinthohai chu Israela irchihai an hriattira:

⁸RENGPA chu inrenaa sip, mi lunginkham thei tak, Milung ir-ial tak, lungkhamna nei intamtak a ni.

⁹Ama khan hal mai no nia; A ninginmur chu pai kumkhua ual no ni.

¹⁰Ei sualnahai angin ni thuan ual no ni.

¹¹Irvân khi irnêng chung irsâng taka a iom angin, Ama chituhai chunga a lungkhamna kha ar khêl a ni.

¹²Sak le thang a irhla ang hin, Ei pualoinahai ei kuang ata ar sonpai pat tâka.

¹³Pa’n a nâihai lung a inkham angin, RENGPA khan ama chituhai kha lung an kham ngai.

¹⁴Ei takpum siam dân hi an hriata, Vâiphin mai ei nih ti an hriat mai sikin.

¹⁵Mihriam chu, a hring sûng nikhuahai hloisûl ang a nia; Pâr angin a chuai ngaia.

¹⁶Phâivua’n a sêma, a irhmang ngai a ni; A omna khan inhre nôk ta no ni.

¹⁷RENGPA lungkhamna rêk chu ama chituhai chunga khan kumtuang ata kumtuang dênin om a ta, A felna khom an tû le tê dênin om a ta,

¹⁸A thuthung zôm murdihai le, A thuhrilhai zôm tuma inhriat maihai kai chunga khan.

¹⁹RENGPA khan a rêngtoihmun kha irvânhai khin an dettira; A ram chu itinrêng chunga roi a rêla.

²⁰A vân tîrtônhaio, A thu irngaituaa a thu zôm ngai, hrâtnaa roiinpuinahaio, RENGPA chu inpâk roi:

²¹A sipaihaio, a nuamlam tho ngai, a sinthotuhaio, RENGPA chu inpâk roi.

²²A roirêlna hmun murdia a sintho murdihaio, RENGPA chu inpâk roi: O ki hringna, RENGPA chu inpâk roh.