Read Hrangkhol INPÂKNA HLAHAI 104 Bible Online

INPÂKNA HLAHAI 104 - Hrangkhol bible

INPÂKNA HLAHAI 104

¹O ki hringna, RENGPA chu inpâk roh. O RENGPA ki Pathian, nang chu ni roiinpui tak taka; Chôiindômna le roiinpuina’n nir bela.

²Nangma’n chu vâr kha puan angin nir bela; Irvânhai khi puan in chung angin ni kaiphara:

³Ni inhai chu tui chunghaia ni sina, Sûmhai khi ni tâli’n ni hmanga, Mithi irtha chunga ni vuanga.

⁴Phâivuahai chu ni palaiin ni hmanga, Mei le meichok chu ni sinthotuhaiin ni hmang ngai.

⁵Irnêng irnghatnahai chu ni phûma, Kumkhua’n an hnîng loina hrangin.

⁶Nangma’n irnêng chu puan angin tui inthûk takin nir khûa, Tuihai khan tânghai chu an simtir zita.

⁷Tuihai chu ni hala, laizâm an tho ngai; Ni thupêk inring tak an inhriat le chu an rot zôi zel tâka.

⁸Tânghaia a kâia, phâihaia a chuma, A ta hrangin hmun ni isinsiam tiang khan.

⁹A khêl loina hrangin rî ni siama; Irnêng chim hranga a kîr nôk ta loina hrangin.

¹⁰Ama khan phâihaia khan tuihnârhai ni siama; Tâng kârhaia khan a luanga.

¹¹Khahai khan ramsa tinrênghai in hrang an pêk ngai; Ram sakuartunghai khan an tui inhrâl an inchantir ngai.

¹²A kôla thing kunghaia khan chung vuang vâhaiin omna’n an nei ngaia, A ônhaia khan an inhrâm ngai.

¹³Nangma’n irvâna irthokin tânghai chu rotuiin nin fâa, Irnêng hi ni satvurnahaiin a khop ngai.

¹⁴Ramsahai hrang hloisûl nin môngtir pea, Chîmuhai chu mihriamhai hrang nin mông pehai ngai.

¹⁵Mihriam lungrîl inlômtirna hrang sahriak le mihriam lungrîl inhrâttirna bai le.

¹⁶RENGPA thinghai chu tuiin nin fa’n khop maia, Lebanon tânga sidar thing a iphunhai chu.

¹⁷Ama khan vâhaiin irbu an kaia; vapual chu meisâr thinghaia irbu an siam ngai.

¹⁸Tâng irsânghai chu sarzahai lêngna hrang a nia, Lungpuihai chu mizupuihai irbîkna a ni.

¹⁹Nangma’n tha khi hunbi inhriatna hrangin ni siama; Misa khan a tâk hrang zoro chu an hriata.

²⁰Nangma’n inthim ni siama, zân a hong nia; Kha zoroa khan ramsa chi tinrêng an lêng suak ngai.

²¹Kâmkeibaknei vânglaihai khan an sa sê hrang zongin an inhrâm ngai.

²²Misa a hong suaka, an kîr nôka, An omna pûk chita an kual ngai.

²³Mihriamhai chu sintho hrangin an suaka, khohloi dênin sin an thoa.

²⁴O RENGPA, ni sinthohai chu a tam bâka! Vârna’n ni ni isiam zit a ni: Irnêng hi ni mihriam siamhaiin an isip a ni.

²⁵So so tuikhanglian a oma, a lianin a’rzat oka, So son mihriam a lian le a chîn tep zoi loi an om.

²⁶Kha khan irkuanghai an lêng sup supa, Ni isiam Leviathan kha a lêng dôr dôra.

²⁷Khahai murdi khan nangma nang an nghâk senga, A zoro taka an bu ni pêk sengna hrangin.

²⁸Anni ni ipêk chu an hrût ngaia, Ni kut ni phara, satna’n an khop ngai.

²⁹Ni hmâi ni thupin chu an lunginzîng ngaia; An phûk chu ni lâk pea, an thia, An suakna vâiphin dêna an kîr nôk ngai.

³⁰Nangma phûk ni tîr suaka, siamin an oma; Irnêng chung khom hi ni siam inthar nôk ngai.

³¹RENGPA roiinpuina chu kumkhua’n om sianlân; RENGPA chu a thilsiamhaia khan lôm roi!

³²Ama khan irnêng hi a ena, an inthing ngaia; tânghai chu a tôna, an inkhul suak ngai.

³³Ki dam sûng kâr ka RENGPA chôiindômin hla sak ki ta; Ki hring kâr ka ki Pathian inpâkin zâi ki ti.

³⁴Ki ngaituana hi ama hrangin lôm inruk ni sianlân, RENGPAA khan ki lôm mai sikin.

³⁵Mi sualhai chu irnênga irthoka hin irhmangtirin omhai sianlân; Mi siahai chu om ta no ri sehai. O ki hringna, RENGPA chu inpâk ro! RENGPA chu inpâk roi!