Read Hrangkhol INPÂKNA HLAHAI 105 Bible Online

INPÂKNA HLAHAI 105 - Hrangkhol bible

INPÂKNA HLAHAI 105

¹O, RENGPA kuang lômthu hril unglân, ar hming irlam roi; Mi tin laia khan a sinthohai kha inhriattir roi.

²Ama chôiindômin hla sak unglân, ama inpâkin zâi roi, A sintho’rkhêl murdi thu kha insîr irhlôm roi.

³A’rhming irthiang kha song roi. RENGPA zongtuhai milung kha raiinfân ri se.

⁴RENGPA le a hrâtna kha zong unglân; A hmêl chu zong mai roi.

⁵O, a siahlo Abrahama irchihaio, Jakoba irchi, a inthanghaio, A sintho’rkhêlhai inhre mai roi; A sinirkhêlhai le a bâia a roirêl suakhai kha.

⁷Ama chu RENGPA ei Pathian chu a ni: A roirêlhai chu irnêng chung murdia hin a om.

⁸A thuthung chu kumkhua’n an hriat ngaia, Irlo sângkhat dêna a thu lei pêk chu;

⁹Abrahama kuanga a thuthung le, Isaka kuanga a khomâksâm kha:

¹⁰Kha dên kha chong inkung hrangin Jakoba kuang an dettira, Israela kuang kumkhua thuthung hrangin:

¹¹“Kanaan ram hi nang pe ki ti, Ni’rchon dongtum hrang chu,” tiin.

¹²Mi tômte vai an ni lai khan; A ni, tômte vai, kha mi rama khan mikhual an ni zoia;

¹³Nam dang dang kuang an hong fe va fea. Ram dang dang ata ram danga an irthon an irthona.

¹⁴Tûte’n an inêpsia hrang phal maka; Anni sikin rênghai khom a hala:

¹⁵“Ki sahriak irthutirhai chu tôn no unglân, Ki deipuhai poi rêng rêng khom tho no roi,” tiin.

¹⁶Kha ram ata hrangin châm a koia; Fâk hrang rêng rêng inomtir ta maka.

¹⁷An makunga mi a tîra; Josefa chu siahlo hrangin izuarin a oma:

¹⁸A kehai chu kolin an natira; Thîrhrui bunin a om tâka:

¹⁹A thu a tung ma senga chu; RENGPA thu’n ama chu a fia ngaia.

²⁰Aigupta rêng khan mi a tîra, a sûta, An sua tâka, mi tin roirêltu hranga khan.

²¹Ama khan a insûng mihai chunga hruaitu le ar chon murdi chunga roirêltu’n a siama,

²²A mi lianhai chunga irchamneina le a ulianhai vârna irchutir hrangin.

²³Khanchu, Jakoba Aigupta rama a fea; Hama rama khan a om tâka.

²⁴RENGPA khan a mihai chu satakin an pungtira, Anni doituhai nêkin an hrâttir ual tâka.

²⁵A mihai khôkmâk hrangin an lungrîl an danglamtir pehaia, A siahlohai chunga vârirlet taka tho hrangin.

²⁶A siahlo Mosia kha a tîra, A mi inthang Arona leh.

²⁷Anni khan an irsinsianahai kha an kuang an entira, Hama rama khan sinirkhêlhai an entira.

²⁸Ama khan inthim a tîra, ram pumpui kha an thim tâka, Khanchu a thuhai kha zôm nuam mah.

²⁹An tuihai kha thisen an chang pea, An ngahai chu a that zita.

³⁰An ram chu uichok an tâmtir pea, An rênghai chontan ten khom uichok an siptir pea.

³¹Ama khan thu a pêka, khanchu an ram sûnga khan thoivâi an tâmtira, Hrik khom an ram sûng murdia tamtak an hong om tâka.

³²Ama khan rua irthûlin irial an tho pea, An rama khan kôlirlek lop lop a pêka;

³³An grep hruihai le theipui kunghai an siat pea; An rama thinghai kha an khiak sa tâka.

³⁴Ama khan thu an sîra, khanchu Khâihmimsehai an honga, Longakhai leh, tep zoi loi rakin an hong om tâka;

³⁵Khahai khan an rama chîmu tinrênghai kha an fâk zoia; An irnêng rahai khom an fâk zoi zita.

³⁶An rama nâilutîr om murdi a thata, An hrât laia an inei masa tak chu.

³⁷Khanchu, tangka le rângachak le Israelhai chu a hruai suak tâka, Ama namhai laia khan mi hrât loi inkhat khom om mahai.

³⁸An suak laia khan Aigupta-hai chu an lôma: Anni kha an lei chi tâk sikin.

³⁹Ama khan irhlîtu hrangin sûm a’rzâmtira, Zâna vâr hrangin mei a pêk saa.

⁴⁰An ngêna, khanchu varung a hong hruaia, Irvân bu’n an khoptirhai ta.

⁴¹Lungpui an honga, khanchu tui a hong suak zun zun tâka. Ramchâra khan tuidung angin a luang tâka.

⁴²A thu irthiang kha an hriat maia, A siahlo Abrahama leh khan.

⁴³Khanchu, a mihai kha raifân takin a hruai suak tâka, A mi inthanghai chu hla sak pumin.

⁴⁴Khan, nam tin ramhai chu a pêk tâka. Anni khan mi danghai sinsôl ra an lua tâka,

⁴⁵A thupêk chu an zôma, A dânhai chu an vong insa theina hrangin. RENGPA chu inpâk roi.