Read Hrangkhol INPÂKNA HLAHAI 106 Bible Online

INPÂKNA HLAHAI 106 - Hrangkhol bible

INPÂKNA HLAHAI 106

¹RENGPA chu inpâk roi. O RENGPA kuang lômthu hril roi; ama chu a saa: A lungkhamna khom kumkhua’n a iom hrang a ni.

²Tu mo RENGPA sintho roiinpui takhai kha insîr theia, An pâkna murdi inhriattir zit thei?

³Roirêlna vong insahai chu an vân a sa e, Itiklai khoma fel taka thotu leh.

⁴O RENGPA, ni mihai ni indit bîkna’n nin hre maiin lân, O, ni saninhringna leh ni kan roh:

⁵Ni mi inthanghai hlochukna ki hmu theia, Ni’rchon donghai kuang ki song theina hrangin.

⁶Kin irchibulhai angin thil kin tho’nsual tâka; Thilsual kin sina, sual takin kin om tâka.

⁷Kin irchibulhai khan Aigupta rama ni sinirkhêl sinhai kha inhre thiam mahaia, Ni lungkhamna irkhêl tak kha inhre mai ta mahai: Tuikhangliana tehel an zong tâka, Tuikhanglian Sena khan.

⁸Kha tena khom khan ama irhming sikin anni kha a saninhring tâka, A sinthotheina roiinpui tak kha an hriattir theina hrangin.

⁹Tuikhanglian Sen kha a hala, Khanchu a kang ta: Khanchu anni kha muang inzena fe’n varâl an kâi ta.

¹⁰Anni khôkmâktuhai kut ata a sansuak tâka; An râlhai irchamneina ata a sansuakhai tâka.

¹¹Tuihai khan anni doituhai chu a khum zoi tâka; Inkhat lua dama suak om ta mahai.

¹²Khanchu a thuhai chu an iama; Ama inpâkna hla an saka.

¹³Khannisianlân a sinthohai kha an irnghil nôk zôi zela; A roizêk chu nghâk zôt mahaia:

¹⁴Ramchâra khan a sân thil an irzuka, Ramchâra Pathian chu an fiaa;

¹⁵An thil ngên a pêkhaia, Khannisianlân, an chunga khan hri tamtak khom a tîr pehai saa.

¹⁶An riakbukhai khan Mosia chu an hnarsaa, RENGPA mi irthiang Arona leh khan.

¹⁷Irnêng chu a ânga Dathana chu an lema, Abirama pôlhai chu ar khû zoi tâka.

¹⁸An pôl laia khan mei inchokin a hong oma; Meichok khan mi siahai kha a kâng irhmang ta.

¹⁹Horeb tânga khan sehrâtte irlim an siama, Ama kha chubai an mûka;

²⁰Khaang khan Pathian roiinpuina chu, Sehrât hloisûl fâk ngai sehrât irlim an paiin an inchangtir tâka,

²¹Pathian an saninhringtu an irnghil tâka, Aigupta rama thil roiinpui tak tak le

²²(Hama rama sinirkhêl takhai, Tuikhanglian Sen kôla thil irkhêl takhai) thotu chu.

²³Khasikin, inboitirna ti, tia ninginmur inkîrtir hrangin, A mi inthang Mosia chu a lûtna hranga khan a makunga ngîr hong sianlân chu, Inboipai a tih ti an sîra.

²⁴A ni, ram inditom tak chu an ngainêpa, A thu kha iam nuam mahai;

²⁵An puan inhai khan an chiar lik tâka, RENGPA irhâi chu irngai nuam mahai.

²⁶Khasikin anni tiang chu a kut a phara, Annihai chu ramchâra an tûktirna hrang le,

²⁷An irchi hranghai chu nam tin laia an tûktira, Ram tina an darhtirna hrangin.

²⁸Baal Peor tânga khan an kopa, Mithi kuang thilinhlanhai chu an fâk sa tâka. Khanchu hri kha an chunga a hong lêng tâka.

²⁹Khaang khan an sinthohaiin ama kha ning an inmurtira; Khanchu hri kha an chunga a hong lêng tâka.

³⁰Kha zoro lai khan Finehasa chu a ngîra, roi a rêla: Khanchu hri kha inboiin a om tâka.

³¹Kha kha a felnaa inkung a ni, Kumkhua’n irlo murdi dênin.

³²Meriba tuihaia khom khan ama chu ning an inmurtira, Khanchu anni sikin Mosia chunga thil saloi a tung chian tâka:

³³A’rtha chunga tehel an zonga, A hmûrin saloi taka an sîr sikin.

³⁴RENGPA’N an kuang inboipai thu a ipêk angin, Mipuihai kha inboipai mahai.

³⁵Nam tinhai chu an irpôlpuia, An sinthohai chu an irchu lika.

³⁶An millim sinhai an thoa, Ama kha an hrangin châng a hong ni tâka.

³⁷a ni, ramilhli kuanghai irbôlna’n an nâipahai an nâinuhai an inhlana.

³⁸Thisen sêlnaboi, an nâipahai le an nâinuhai thisen ngei kha an insua tâka, Khahai kha Kanaana ram millimhai kuang an irbôla; Kha ram kha thisenin a hong porinche tâka.

³⁹Khaang khan an sinthohaia porinchetirin an oma, An sinthohai khan an hong uire tâka.

⁴⁰Khasikin RENGPA ning kha a mihai chunga an mur tâka, an tirhai tâka.

⁴¹Khanchu anni kha nam tin kuta a pêk tâka; A khôkmâktuhai khan an chunga roi an rêl tâka.

⁴²Anni doituhaiin an nêpsiaa, An kut hnuaia khan inlômtirin an om tâka.

⁴³Voi tamtak a saninzôkhaia; Khannisianlân a inkungnaa khan tehel an zong ngaia, An pualoinaa khan irhniamtirin an om tâka.

⁴⁴Khaang dôra khom khan, an khêkirhai an hriatin chu, An lungzîng kha a uksaka:

⁴⁵A thuthung kha anni an hriat pehai maia, A lungkhamna irkhêl sikin an lungrîl a’rlet tâka.

⁴⁶Suaka hruaitu murdihai chu lung an khamtirhaia.

⁴⁷O RENGPA kin Pathian, ni saninhringin lân, Nam tin lai ata ni hruai bûm nok roh. Ni’rhming irthiang chu inpâk hrang le Inpâkna song hrangin.

⁴⁸RENGPA, Israelhai Pathian chu, inpâkin om ri se, Kumtuang ata kumtuang khomin. Mi murdi khan, “Amen,” ti ri se. RENGPA chu inpâk roi.