Read Hrangkhol INPÂKNA HLAHAI 107 Bible Online

INPÂKNA HLAHAI 107 - Hrangkhol bible

INPÂKNA HLAHAI 107

¹O, RENGPA kuang lômthu hril roi; ama kha a sa sikin: A lungkhamna khom kumkhua’n a iom hrang a ni.

²RENGPA mi inthanghai khan khaang kha insîr ri sehai, Doitu kut ata a irtan,

³Ram tin ata a hruai bûm, Sak le thang, sim le hmârhaia khan.

⁴Senkhat chu ramchâr irkhêla khan an invâia, Mihriam omna khua rêng rêng hmu mahaia.

⁵Phîngchâm le tuiinhrâlin an hringna kha an phîng sûnga a’rzal tâka.

⁶Kha zoi le an buainaa khan RENGPA kha an insama, Ama khan an lunginzîngnahaia a saninzôka.

⁷Mihriam omna khuaa an fe theina hrangin Lam intûn taka a hruaihai tâka.

⁸O, mihriamhai hin RENGPA chu a lungkhamna sik le, Mihriam nâihai chunga a sinirkhêl thohai sika hin inpâk sianlân O!

⁹Ama khan hringna thil irzuk tak tak kha inkhoptirin, Hringna phîngchâm kha satna’n an khoptir ngai.

¹⁰Inthim hnuaia le thina daihlîma toia, Intakna le thîra khithai chu;

¹¹Pathian thu chunghaia tehel an zonga, Anchungtaka inkungna kha an ngainêp sikin:

¹²Ama khan an milung chu sinsôlna’n a hmin tâka; An tûka, changpuitu hrang rêng rêng om mahaia.

¹³Kha zoi le an buainaa khan RENGPA kha an insama, Ama khan an lunginzîngnahai ata a saninhringa.

¹⁴Inthim hnuai ata le thina daihlîm ata kha a hruai suakhaia, An khitnahai kha an chattir tâka.

¹⁵O, mihriamhai hin RENGPA chu lungkhamna sik le, Mihriam nâihai chunga a sinirkhêl thohai sikin inpâk sianlân chu o!

¹⁶Ama khan dâr mikothai kha an siattira, A fena thîr tuamhai kha a tan tâka.

¹⁷Mi invêthai kha an tho’nchâina sik le, An pualoinahai sikin deng an thei ngai.

¹⁸An hringna khan fâk hrang tinrêng hi an intira; Thina kul mikothai kha an nâi ngaia.

¹⁹Khanchu an buainaa khan RENGPA kha an insama, Ama khan an lungzîngnahaia khan a saninhring ngai.

²⁰A thu kha a tîr suaka, anni chu an damtir ngaia, An irhmangna hranghaia a saninzôk ngai.

²¹O, mihriamhai hin RENGPA chu a lungkhamna sik le, Mihriam nâihai chunga a sinirkhêl thohai sika hin inpâk sianlân chu o!

²²Anni khan lômthu’nsîr irbôlnahai kha inhlan sianlân, An sinthohai kha hla sakin hril ri se.

²³Tuikhangliana irkuang liana zu fea, Tui irzattak chunghaia sintho ngaihai khan;

²⁴Khahai khan RENGPA sinthohai le, Tui inthûk taka a sintho’rkhêlhai kha an hmu ngai.

²⁵Ama khan thu a pêka, phâivopui an thotira, Kha khan a tui irsônhai kha a’rsângtir ngai.

²⁶Irvâna an kâi tîr tîra: Lungzîngna sikin an hringna kha a zôi ngai.

²⁷Zû’nrui angin an hong pêm an va pêm an hong irhnor rem ruma, Om lam dân rêng rêng inhre ngai mahai.

²⁸Kha zoi le an buaina khan RENGPA kha an insama, Ama khan an lungzîngnahai ata a hruai suak ngai.

²⁹Phâivopui chu irhôra an mongtira, Khanchu a tui irsônhai a mong rup ngai.

³⁰Khan, a mong tâk sikin an lôm ngaia; Ama khan an irngaitak irkuang irngam hmuna khan a hong hruai ngai.

³¹O, mihriamhai hin RENGPA chu a lungkhamna sik le, Mihriam nâihai chunga a sinirkhêl thohai sika hin inpâk sianlân O!

³²Anni khan mihai inkhômnaa ama chu inpâk sianlân, Upahai toinaa khan inpâk ri se.

³³Ama khan tuipuihai chu ramchâra an changtir ngaia, Tuihnârhai chu irnêng châra an changtir ngai.

³⁴Ram satakhai chu a mi omhai sual sikin, ram inponin an changtira.

³⁵Ramchâr chu dîl an changtir ngaia, Irnêng châr chu tuihnârhai an changtir ngai.

³⁶Ama khan phîngchâm tuanghai chu an om ngaia, Omna hrang khua an siama;

³⁷Loihai an neia, grep irhuanhai an siama, A ra hong punghai chu an hmu theina hrangin.

³⁸Anni chu sat a vur ngaia, khanchu a sate’n inpungtirin an oma; An sahai kha a iram phal ngai mah.

³⁹Khan, nêpsiana hai, intakna hai, beidongna hai sikin, An ram sit sita, an kûn tîr tîra.

⁴⁰Ama khan mi lianhai chunga hmusitna a bunpai ngaia, Ramchâr, lampui rêng rêng om loinaa khan a’rvâk a’rvâktira.

⁴¹Khannisianlân, inrianghai chu intakna ata hmun irsânga a bâng ngaia, Belra pâl angin insûng mihai a siam pe ngai.

⁴²Mi diktakhai khan kha kha hmu an ta, lôm an ti; pualoina murdi khan a bâi hîp a ti.

⁴³Tukhom vâr ka kaiin khahai kha vong insa an ta, RENGPA lungkhamnahai ngaitua an ti.