Read Hrangkhol INPÂKNA HLAHAI 108 Bible Online

INPÂKNA HLAHAI 108 - Hrangkhol bible

INPÂKNA HLAHAI 108

¹O Pathian, ki milung hi a idet a ni; Hla sak ki ta, a ni, inpâkna hla sak ki ti, ki roiinpuina ngeiin.

²Perkhuang le serândahaio, har roi: Kei chu zîng taka har ki ti.

³O RENGPA, mi tinhai laia lômthu nang hril ki ti: Nam tin laia nangma inpâkin zâi ki ti.

⁴Ni lungkhamna chu irvân phâk rakin ar khêla, Ni thutak khan irvân dumhai khi a phâk raka.

⁵O Pathian, nang chu irvân phâk rakin chôiindômin omin lân: Ni roiinpuina chu irnêng murdi chunga hin chôiindômin om sa roh.

⁶Ni lungthunghai hi saninzôka an om theina hrangin, Ni kut chang tiang saninzôkin lân, ni sâm roh.

⁷Pathianin a hmun irthianga khan hiang hin a tia, “Râifân ki ta: Sekem khua chu sem ki ta, Sukoth phâi chu semindarh sa ki ti.

⁸Gilead ram chu ki ta a nia; Manasea ram ki ta a nia; Efraima ram khom kha ki lu saninzôkna a ni.

⁹Moab ram chu ki tui irsilna bêl a nia; Edom rama khan ki kekok pai ki ta: Filistia ram chu khêkkhum ki ti.

¹⁰Khopui kul neia khan tu’n mo ni hruai inlût hrang? Edom rama khan tu’n mo ni hruai hrang?

¹¹O Pathian, nangin ni ni inthâ ta tak ma ni? O Pathian, kin sipaihai kuang lak suak ngai ta mak chea.

¹²Ni doituhai bei hrangin ni changpui roh: Mihriam changpuina kha chanlamboi a ni.

¹³Pathian zâra hâitakin tho kin ti: Ama kha ni doituhai sirbêtu hrang a ni.