Read Hrangkhol INPÂKNA HLAHAI 109 Bible Online

INPÂKNA HLAHAI 109 - Hrangkhol bible

INPÂKNA HLAHAI 109

¹O ki inpâk ngai Pathian, dâihrek no ro!

²Mi sia bâi le mi huang ngai chu ki chunga an chiara: Anni khan irnêng milak theiin ki kuang thu an insîra.

³Khôkmâkna thu’n a ni huala, A bi boiin an ni doia.

⁴Ki lungthungna sikin ki râl an hong chang tâka, Khannisianlân kei chu an ta hranga chongchai hrangin ki’rpêk ngita.

⁵Anni khan thil sa chu thil sualin an ni thuana, ki lungthungna chu hnôlna’n an ni thuan sa tâka.

⁶Nangma’n an chunga roirêltu sual se pêkin lân; A chang tiang a hnôltu ngîr ri se.

⁷Roirêl pea a om tikin thiamno changin suak sianlân; A chongchaina chu sualnaa hong chang ri se.

⁸A hring sûng nikhuahai chu tôm sianlân; A hruaitu nina chu mi dangin chang ri se.

⁹A nâipahai chu pa boiin omhai sianlân, A dôngma chu meithâiin om ri se!

¹⁰A nâihai chu invâiin an kut dôhai sianlân; An fâk hrang chu an hmun ramhaia khan zong ri se!

¹¹a pung irzûla sum inpûktirtu chu a inei murdi kha lâk pe zit sianlân; Mikhualhai khan a sinsôl ra chu inmok pe ri se.

¹²A chunga lungkhamna inlangtir maitu hrang tûte om no sianlân; A nâi, pa nei loihai lunginkhamtu hrang tûte om viat no ri se.

¹³A’rchihai chu irhmangtirin om sianlân; Thoiinthar hong om nôka khan an irhming kha kâtpaiin om ri se.

¹⁴A’rchibulhai pualoina chu RENGPA kuang inhriat maiin om sianlân; A nu sualna chu kâtpaiin om no ri se.

¹⁵Khahai kha RENGPA makunga om mai ri se, Ama khan anni inhriat maina kha irnêng ata an boipai theina hrangin.

¹⁶Lungkhamna inlangtir nachâng inhre mahaia, Mi inriang invâi le irsamhai chu that tuma deng an theitir ual sikin.

¹⁷A ni, mi khosâl tong hi a nuamlam a nia, Khanchu ama chunga a zuang tunga; Mi satvur hi a lôm lam ni maka, Khanchu ama hla uala a oma.

¹⁸Songkol irfuala irbel angin khosâlin ar bela, Kha kha a phîng sûnghaia khan tui angin a lûta, An rûhaia khan sahriak angin a lût saa.

¹⁹Kha kha ama hrangin a irbel ngaina silkai angin om sianlân, An irkhit henaa kongkhit ni sa ri se.

²⁰Kha kha mi doituhai le ki hringna hrilsiattuhai RENGPA a thuanna a ni.

²¹Khannisianlân, O Pathian, RENGPA, nangin nir hming sikin ni thopuiin lân: Ni lungkhamna a sa sikin ni saninzôk ro,

²²Inriang le invâitak ki nia, Ki milung hi ki phîng sûnga popin a om sa.

²³Khohloi irhlîm angin ki boi thiai tâka; Khâihmimse angin sêm invuangin ki om ta.

²⁴Ki’rkhûkhai hi bu nghei sikin a’rzal tâka; Ki takpum hi ru le vun vai a ni ta.

²⁵Ni doituhai nuiso ki hong ni tâka; Anni hmu le chu an lu an inthika.

²⁶O RENGPA ki Pathian, ni changpuiin lân; O ni lungkhamna sikin ni saninhring ro:

²⁷Kha kha ni kut a nih ti an inhriat theia, RENGPA, nangin ni itho a nih ti an inhriat theina hrangin.

²⁸Anni’n khua sâl ri se, nangma’n chu satvur ual ro: An thoi le chu mualinphoi an ta, ni siahlo rêk chu raiinfân a ti.

²⁹A ni doituhai chu inzakna puan insiltirin omhai sianlân Songkola innghâk angin anni mualinphoiin irbel ri se.

³⁰Ki bâi hin RENGPA kuang lômthu irkhêl tak insîr ki ti: A ni, mipui laia ama kha inpâk ki ti.

³¹Ama kha invâi chang tiang ngîr a ta, A hringna roirêl petuhai ata saninhring hrangin.