Read Hrangkhol INPÂKNA HLAHAI 116 Bible Online

INPÂKNA HLAHAI 116 - Hrangkhol bible

INPÂKNA HLAHAI 116

¹RENGPA chu ki lungthung a ni, Lungkham ki ngênnahai hnukirhâi chu a nir ngai pe sikin.

²Keima tiang a mikuar a sung sikin, Ki hring sûng kâr ka ama chu koi ki ti.

³Thina hruihrualhai khan a ni zêla; Seol natnahai khan a ni chela; Lungzîngna le beidongna ki tuang tâka.

⁴Khanchu RENGPA chu kin sama; “O RENGPA, irngaihoi takin ki hringna hi inzôk ro!” tiin ki ngêna.

⁵RENGPA chu mi lunginkham thei tak le fel tak a nia; A ni, ei Pathian chu mi lunginkham thei tak a ni.

⁶RENGPA khan mi farahai chu a donsui ngai; Irhniamin ki oma, ama khan a ni saninhring ta.

⁷O ki hringna, ni’rngamnaa khan kîr nôk roh, RENGPA khan ni chunga satakin a tho tâk sikin.

⁸Ki hringna hi thina ata, Ki mihai hi mitrithi ata, ki kehai hi tûkna ata nangma’n ni saninzôk tâka.

⁹Mihring rama hin RENGPA makunga lêng ki ti.

¹⁰“A sate’n dengintheiin ki oma,” ki ti lai khomin ki iam ngita.

¹¹Ki chardongin, “Mi tûte tûng rua om mahai,” ki lei ti rak tâka.

¹²Ki chunga a sintho sat murdi sika hin RENGPA chu imo ki ipêk hrang tâk?

¹³Saninhringna khilât la ki ta, RENGPA irhming irlam ki ti.

¹⁴Ki chong inkunghai chu RENGPA kuang hlen ki ta, A ni, a mihai murdi makunga khan.

¹⁵RENGPA irngaia hlutak chu, A mi irthianghai thina hi a ni.

¹⁶O RENGPA, ni suak ki nia; Ni suak, ni suaknu nâipa chu ki nia; Ni khitnahai chu ni sût tâka.

¹⁷Lômthu hril irbôlnahai chu nang inhlan ki ta, RENGPA irhming chu irlam ki ti.

¹⁸Ki chong inkunghai chu RENGPA kuanga hlen ki ta, A ni, a mihai murdi makunga khan.

¹⁹RENGPA Biak In sûng tuallaia, O Jerusalem, nin lâina taka hlen ki ti. RENGPA chu inpâk roi!