Read Hrangkhol INPÂKNA HLAHAI 118 Bible Online

INPÂKNA HLAHAI 118 - Hrangkhol bible

INPÂKNA HLAHAI 118

¹O, RENGPA kuanga khan lômthu hril roi, ama chu a saa; A lungkhamna lianna chu kumkhontuangin om a ti.

²Israelhai khan “A lungkham lianna chu kumkhontuangin om a ti,” ti ri sehai.

³Arona in mihai khan, “A lungkham lianna chu kumkhontuangin om a ti,” ti ri sehai.

⁴RENGPA chituhai khan, “A lungkham lianna chu kumkhontuangin om a ti,” ti ri se.

⁵Ki lungzîngna irthokin RENGPA chu kin sama; RENGPA khan a ni sâma, a nin zôk tâka.

⁶RENGPA chu keima tiang a changa, chi no ning; Mihriamin imo a ni ilo hrang?

⁷RENGPA chu ni changpui hrangin keima tiang a changa, Khasikin ni hnôltuhai nuamlam chu hmu ki ti.

⁸Mihriam iam nêkin chu RENGPAA iamna irnghat hi a isa ual a ni.

⁹Mi lianhai iam nêkin chu RENGPAA iamna irnghat hi a sa ual.

¹⁰Nam tinrêngin an ni hual vêla; Anni chu RENGPA irhmingin ki’rhmangtir zithai tâka.

¹¹Anni khan an ni hual vêla; Anni chu RENGPA irhmingin ki’rhmangtirhai zit ta.

¹²Khuai angin an ni hual vêla, Khannisianlân, ilhling kâng angin an ram tîr tîra, Anni chu RENGPA irhmingin ki’rhmangtirhai zita.

¹³Kin rîlna hrangin sun rak rakin ki oma, Khannisianlân, RENGPA khan a ni changpui zôi zela.

¹⁴RENGPA chu ki hrâtna le ki hla a nia; Ama chu ki saninhringna a ni ta.

¹⁵Irngai roi, mi felhai puan ina râl inhnê zoia lômna hla irhâi chu;

¹⁶“RENGPA kut chang tiang khan hâi takin a tho ngai,” an ti ngai.

¹⁷Thi no ninga, hring ki ti; RENGPA khan satakin a ni sepa, Thina tak chu nin tungtir mah.

¹⁸RENGPA khan satakin a ni sepa; Thina tak chu nin tungtir mah.

¹⁹Biak In mikothai hi nin hong pe roi; Khahaia khan lût ki ta, RENGPA kuang lômthu hril ki ti.

²⁰Ama hi RENGPA mikot a nia; Mi felhai vai lût an ti.

²¹Nangma’n ni ni sâm tâk sikin ni kuang lômthu hril ki ti, Nang chu ki saninhringna ni ni tâka.

²²In sinhai lung indit loi kha a kila lung poimo tak a hong ni ta.

²³Ama kha RENGPA itho a nia; Ei mithmua a irkhêl a ni!

²⁴Ama hi RENGPA sûn inkung chu a nia; Amaa hin raifânin lôm ei ti!

²⁵O RENGPA, lungkhamin ni saninhringin lân; O RENGPA, lungkhamin hlochukna ni pe ro!

²⁶RENGPA irhminga zuang chu hoi pe ri se! RENGPA ina irthokin sat nangni kin ivur a ni.

²⁷RENGPA chu Pathian a ni, ama khan vâr a ni pêka: Nin kuta thing ôn chu chôiin hruaithe chu phut unglân, Maichâm irkî irhîla khan.

²⁸Nang chu ki Pathian ni nia, lômthu nang hril ki ti; Ki Pathian ni nia, nang chôiindôm ki ti.

²⁹O, RENGPA kuanga lômthu hril roi, ama chu a saa; A lungkham lianna chu kumtuangin om a ti.