Read Hrangkhol INPÂKNA HLAHAI 119 Bible Online

INPÂKNA HLAHAI 119 - Hrangkhol bible

INPÂKNA HLAHAI 119

¹A hringnuna mi sa irkiphai chu an vân a sa, RENGPA dân zômtuhai chu.

²A thupêk zômhai chu an vân a sa, Lungrîl murdia ama zongtuhai chu.

³Anni khan sa no rêng rêng tho ngai mahaia; RENGPA lampuia khan an fe ngai.

⁴Nangma’n ni dânhai chu ni ni pêka; Sathnem irngai taka zôm hrangin ni ni bêa.

⁵O, ni roizêkhai chu zôm hrangin Ki om dânhai hi indetin om ta sianlân chu o!

⁶Khanchu mualinphoiin om no ninga, Ni thupêkhai murdi chu ki vong ngitin chu.

⁷Lungrîl diktak irputin nang inpâk ki ta, Ni roirêlna felhai chu ki’rchu tikin chu.

⁸Ni roi irfûkhai zôm ki ta; O ni mâk viat no roh.

⁹Vânglaiin itin mo a om dân a irthiangtir thei hrang? Ni thu ang taka a om dân veng insa’n,

¹⁰Ki lungrîl murdi’n nang ki zonga; O ni thupêkhai ki imâk hrang chu phal viat no ro.

¹¹Ni chunga ki sual loina hrangin, Ni dânhai chu ki lungrîla ki phûm khaka.

¹²O RENGPA, inpâkin om ro; Ni lampuihai chu nir chutir roh.

¹³Ni bâia roirêlna suak murdihai chu ki bâiin kin puanga.

¹⁴Ni thupêk zôma khan ki lôma, Irchongna murdia ki raifânna nêkin.

¹⁵Nangma irchutirna thuhai chu ngaitua ki ti. Ni lampuihai chu ngaisak ki ti.

¹⁶Ni roizêk chunga khan lôm ki ta; Ni thuhai chu irnghil no ning.

¹⁷Ki hring theina hrang le ni dân ki zôm theina hrangin, Ni suak chunga hin satakin tho roh.

¹⁸Ni dâna irthokin thudik irkhêl tak ki hmu theina hrangin, Ki mithai nin meng pe roh.

¹⁹Irnênga hin mikhual ki nia; Ni thupêkhai chu ki kuang ata thup no roh.

²⁰Itiklai khomin ni roirêlnahai irngai sikin, Ki hringna hi beiindongin a irzal a ni.

²¹Mi lârirpâk, khosâl tonghai chu ni hala; Ni thupêk zôm ngai loihai chu.

²²Hrilinsiatna le hmusitna hi ki kuang ata la pai ro, Ni dânhai chu ki zôm sikin.

²³Mi lianhai chu toi khomin mi sêl khom sianlân, Ni suak hin ni roizêk chu ngaitua mai ki ti.

²⁴Nangma irchutirna thuhai chu ki lômna a nia; Roi ni izêk petuhai khom an ni.

²⁵Ki hringna hi vâiphin a kop khaka; Ni thu ang takin nin hartir roh.

²⁶Ki om dânhai chu ni kuang kin puanga, Nangma’n ni ni sâma; Ni lampuihai chu nir chutir roh.

²⁷Ni sepna lampui chu nin hriat thiamtirin lân, Khanchu ni sinirkhêl thuhai chu ngaitua ki ti.

²⁸Ki hringna hi beidongin a sip tâka; Ni thu ang takin nin hrâttir ro.

²⁹Lam dik loi hi ki kuang ata khâipaiin lân; Lungkham takin ni dân chu nir chutir ro.

³⁰Iamomna lampui kin thanga; Ni roirêlnahai chu ki makunga kin omtir maia.

³¹Ni’rchutirna thuhai ki vong ngita; O RENGPA, mualinphoiin nin omtir no roh.

³²Ni thupêkna lam tiang khan intân ki ta, Inhriat thiamna ni ni pêk hrang sikin.

³³O RENGPA, ni roizêk lampui chu nir chutirin lân, Khanchu a mong dênin zôm ki ti.

³⁴Ni dân ki vong insa theina hrangin inhriat thiamna ni pe ro; Khanchu ki lungrîl murdi’n zôm ki ti.

³⁵Ni thupêk lampuia ni hruaiin lân, Ama vai khan lômna ki hmu ngai sikin.

³⁶Huatirhamna lama ni loiin ni dân zômna tiang khan ki milung hi irlêktir roh.

³⁷Thil chanlamboi papai en loi hrangin Ki mit hi ni la pe’n lân; Ni lampuihaia khan hringna ni pe roh.

³⁸Ni chonginkung chu ni suak kuang hin indetin lân, Ama kha nangma chituhai hrang vai a ni.

³⁹Mi hrilsiatna ki ichi hi lapai ro; Ni roirêlnahai chu a sa vang na!

⁴⁰Irngai ta, ni thupêkhai chu zôm ki nuam tak tak ngaia; Ni felnaa khan hringna thar ni pe roh.

⁴¹O RENGPA, ni lungkham lianna chu Ki kuang zuanga inlangtirin lân, Ni chonginkung ang takin ni saninhring roh.

⁴²Khanchu, ni hrilsiattuhai sâmna hrang nei ki ti, Ni thu ki iam sikin.

⁴³Khan, thutak thu chu ki bâi ata hi la suak zit no ro, Ni roirêlnahai chu ki isabei a ni sikin.

⁴⁴Ni dân chu zôm mai ki ta, kumkhontuangin;

⁴⁵Khanchu zalên takin lêng ki ta, Ni’rchutirna thuhai kha ki zong sikin.

⁴⁶Ni thupêkhai chu rênghai makunga hril ki ta, Inzak no ning.

⁴⁷Ni thupêkhaia khan ki lôm ngaia, Lung ki ithung a ni.

⁴⁸Ni thupêkhai chu kin hlu’n ki mahripa; Ni ni irchûna thuhai hi ngaitua ki ti.

⁴⁹Ni suak kuang ni chonginkung chu inhre mai ro; Ama khan sabeina lian tak a ni ipêk a ni.

⁵⁰Ama kha ki dengtheinaa khan ki’rtharngamna a ni; Ni chonginkung khan hringna a ni pêk ngai.

⁵¹Mi lârirpâkhai khan an ni nuiso maia, Khannisian ni dân chu ma viat ma ung.

⁵²O RENGPA, khorsianga ni roirêlnahai chu kin hriat maia, Irtharngam ki’rsak ngai.

⁵³Mi siat ni dân mâktuhai sikin, Lunghoiloina lian takin a ni de tâka.

⁵⁴Ki khual inzinna rama hin Ni thupêkhai chu ki hla a ni ngai.

⁵⁵O RENGPA, zâna khan nang kin hriat mai ngaia, Ni dân khom ki ngaitua ngai.

⁵⁶Ni thupêkhai chu ki vong insa sikin. Vânsatna ki chunga a ichum a ni.

⁵⁷RENGPA chu ki dongtum a ni; Ni thu zôm hrangin chong kin kunga.

⁵⁸Ki lungrîl murdi’n ni lungkhamna ki ngêna; Ni thu ang takin lung nin kham roh.

⁵⁹Ni om dânhai ki ngaituaa, Ni nir chûna tiang khan ki ke ki phêt tâka.

⁶⁰Ni thupêkhai zôm hrangin ki’rhnota, ir-ial ma ung.

⁶¹Mi siahai chângin nir kul khomsian, Ni dân chu irnghil ngai ma ung.

⁶²Zân laia nang inpâk hrangin ki thoia, Ni roirêl felhai sikin.

⁶³Nangma chitu murdihai le Ni dân zômtuhai murdi rual ki ni.

⁶⁴O RENGPA, irnêng hi ni lungkham lianna’n a sipa; Ni thupêkhai chu nir chutir roh.

⁶⁵O RENGPA, ni thu ang takin, Ni suak hi nin satir ngai.

⁶⁶Vârna le inhriatna nir chutir ro, Ni thupêkhai chu ki iam sikin.

⁶⁷Dengintheia ki om mân khan kin vâi irhmang ngaia, Atûn chu ni thu ki zôm ta.

⁶⁸Nang chu ni sa a, thil sa ni thoa; Ni thupêkhai chu nir chutir roh.

⁶⁹Mi lârirpâkhai khan ki chunga milak an phuaa; Khannisian ki lungrîl murdi’n ni nir chutirna thuhai chu vong insa ki ti.

⁷⁰Hi mihai hin inhriat thiamna zel nei mahaia, Keima rêk chu ni dân chunga ki lôm ngai.

⁷¹Ni thupêkhai chu ki’rchu theina hrangin, Dengtheia ki om kha ki ta hrangin a isa a ni.

⁷²Rângachak le tangka sâng tamtak nêkin Ni bâia dân suak chu ki hrangin a sa ual a ni.

⁷³Ni kuta ni siamin, ni nin dingtira; Ni thupêkhai chu ki’rchu theina hrangin inhriat thiamna ni pe roh.

⁷⁴Nangma chitu murdihai khan ni hmu an ta, lôm an ti, Ni thuhaia ki’rnghat ngai sikin.

⁷⁵O RENGPA, ni roirêlhai chu fel ti le, Nangma’n chu iamom takin a ni, ni ni sep a nih ti kin hriat tâka.

⁷⁶Ni suak kuang ni chonginkung ang takin, Ni lungkham lianna khan irtharngam ni sak ri se.

⁷⁷Ki hring theina hrangin ni satna chu ki kuang zuang ri se; Ni dân chu ki lômna a ni.

⁷⁸Pathian ngaisak loi mihai chu mualinphoiin om ri se. Dik loi takin an nir hniamtir sikin. Khannisianlân keima’n chu ni nir chutirna thuhai ngaitua ki ti.

⁷⁹Nangma chi mihai chu keima tiang mâ song sianlân, Khanchu ni thupêkhai chu inhria an ti.

⁸⁰Ki mualinphoi loina hrangin ki lungrîl hi ki thupêka khan sat irkipin om ri se.

⁸¹Ki hringna hi ni saninhringna irngaiin a’rzal tâka; Khannisianlân, ni thu chu ki inhlu a ni.

⁸²Ni thu thîrna’n ki mit a chamai zoi tâka; “Nangma’n itika mo irtharngam ni ni isak hrang?” ki ti, ki ti ngai.

⁸³Meikhu iur savun kok ang kha ki ni tâka, Khannisian, ni thupêkhai chu irnghil ma ung.

⁸⁴Ni suak hin i dôra sôt mo a la inghâk hrang? Nuamning ni lôtuhai chunga hin itika mo roi ni irêl hrang?

⁸⁵Mi lârirpâk, ni dân zôm loihai khan, Ki tâkna hrang khur an choia.

⁸⁶Ni thupêkhai murdi chu iam a oma; Mihriamhai khan dikloi takin deng an ni intheitir hi, o ni changpui roh.

⁸⁷Anni khan irnênga hin an nir hmangtir vâng vânga, Khannisianlân, ni thupêkhai chu hnung songsan ma ung.

⁸⁸Ni lungkham lianna khan ki hringna hôi ro, Khanchu ni bâia dân suakhai kha zôm thei ki ti.

⁸⁹O RENGPA, kumkhua hrangin Ni thu chu irvâna indetin a oma.

⁹⁰Ni iamomna chu suanpâr tin tin dênin om a ta; Irnêng hi nin dinga, det takin a om maia.

⁹¹Khahai kha nangma thupêkin atûn ten an om maia, Thil tinrêng chu ni suak an ni.

⁹²Ni dân chu ki lômna ni no sianlân chu, Ki dengtheinaa khan ki irhmang hrang tâk a ni.

⁹³Ni thupêkhai chu irnghil viat no ning, Nangma’n ama khan ni nin hring tâk sikin.

⁹⁴Ni ta ki ni hi, ni saninhring ro; Ni thupêkhai chu ki zong ngaia.

⁹⁵Mi siahai khan nir hmangtir tumin an nin ruang ngaia, Khannisianlân, ni dân chu ngaitua ki ti.

⁹⁶Thil tinrêng mongna ten a iom a nih ti kin hriat tâka; Khannisianlân, ni thupêk chu a sa irkip a ni.

⁹⁷O, ni dân chu ki’rngaiinhlu bâka na! Sûn sôt ki ngaitua ngai a ni.

⁹⁸Ni thupêkhai khan ni doituhai nêka vâr ualin a ni siama, Kumkhua’n ki kuang a om mai sikin.

⁹⁹Ni’rchutirtu murdi nêkin inhriat thiamna ki nei ual a ni, Ni nir chûtirna ki ngaitua ngai sikin.

¹⁰⁰Tarhai nêkin ki vâr ual a ni, Ni thupêkhai ki zôm sikin.

¹⁰¹Ni thupêkhai ki zôm theina hrangin, Lamnoa rêng rêng ki kehai hi pêt hrang phal ma ung.

¹⁰²Ni roirêlnahai ata chu pêt ma ung, Nangma’n ni nir chûtir sikin.

¹⁰³Ni thuhai hi ki bâi hrangin a thum bâka! A ni, ki bâi hrangin chu khuaihlutui nêkin a thum ual.

¹⁰⁴Ni dânhai sikin vârna ki neia, Khasikin om dân dikloi tinrêng hi ki ihnôl a ni.

¹⁰⁵Ni thu hi ki ke hrangin meiser a nia, Ki lampui hrangin vâr a ni.

¹⁰⁶Ni roirêl fel takhai chu zôm hrangin, Chong det tak kin kunga.

¹⁰⁷A sate’n intaktirin ki oma; O RENGPA, ni thu ang takin nin hring roh.

¹⁰⁸O RENGPA, nang ki chôiindômna thilpêk hi pom ro, Ni thupêkhai chu nir chûtir roh.

¹⁰⁹Ki hringna hi ki kutin kin tûk maia, Khannisianlân, ni dân chu irnghil ma ung.

¹¹⁰Mi siahai khan kin ôkna hrang châng an kama, Khannisianlân, ni thupêkhai chu hnung songsan ma ung.

¹¹¹Ni thupêkhai chu kumkhua’n ni dongtum a nia; A ni, ki lungrîl lômna tak a ni.

¹¹²Kumkhua’n a mong dênin, Ni dânhai chu zôm hrangin ki milung ki’rlêktira.

¹¹³Lungrîl mumal neiloi mihai chu ki hnôla, Ni dân rêk chu ki’rngaiinhlu a ni.

¹¹⁴Nang chu ki’rbîkna hmun le ki phô ni nia; Ni thu chu ki tûngna a ni.

¹¹⁵Ki Pathian thupêkhai ki zôm theina hrangin, Thil saloi thotuhai, ki kuang ata rotpai roi,

¹¹⁶Ki hring theina hrangin ni chonginkung ang takin tho ro, Ki tûngna hin mualinphoiin nin omtir no roh.

¹¹⁷Ni kaiin lân, khanchu zôk ki ti, Ni thupêkhai chu uksak mai ki ti.

¹¹⁸Ni dân zôm loituhai murdi chu ni hnôla, An huangna thuhai chu chanlamboi a ni.

¹¹⁹Irnênga mi siahai murdi chu sahrok angin ni bêa, Khasikin ni nir chûtirna chu ki inhlu a ni.

¹²⁰Ki takpum hi nangma chi sikin an thinga; Ni roirêlnahai chu ki ichi a ni.

¹²¹Thil dik le thil sa ki tho ngaia; Ni nêpsiatuhai kuang nin thâ rak no roh.

¹²²Ni suak chu changpui ni ti, ti inkungin lân; Mi lârirpâkhai khan ni nêpsia no ri sehai.

¹²³Ni saninhringna hranga thîrna’n ki mit a chamai zoi tâka, Ni saninhring hranga ni chonginkung thîrna’n.

¹²⁴Ni lungkham lianna ang takin ni suak chunga hin tho’n lân, Ni thupêkhai chu nir chûtir roh.

¹²⁵Ni suak ki nia; inhriat thiamna ni pe ro, Ni’rchûtirna kin hriat theina hrangin.

¹²⁶RENGPA, ni ichâng hrang zoro a ni ta, Ni dân hi chanlamboiin an siam tâk sikin.

¹²⁷Ni dânhai chu rângachak nêkin kin hlua, A ni, rângachak irthiang nêkin khom.

¹²⁸Khasikin ni thupêkhai tiang kal ki phêta, Om dân dikloi tinrêng ki hnôl a ni.

¹²⁹Ni irchûtirna chu a irkhêl a ni; Khasikin ki lungrîl murdi’n ki zôm ngai.

¹³⁰Ni thu hrilfiana hin mihai an vârtira, Mi’nmôlhai chu inhriat thiamna a pêk ngai.

¹³¹Ni thupêkhai irngai sikin ki bâi ki ânga, Kin phu huan huan a ni.

¹³²Keima tiang hmâi irnghatin lân, lung nin kham ro, Nangma lungthunghai lung nin kham ngai ang khan.

¹³³Ni chonginkung ang takin ki kalbîhai indetin lân, Sualna rêng rêng ki chunga thu inneitir no roh.

¹³⁴Mihai nêpsiana ata chu ni sansuakin lân, Khanchu ni thupêkhai hi zôm thei ki ti.

¹³⁵Ni hmêlin ni suak chu êl invârin lân, Ni dânhai chu nir chûtir ro.

¹³⁶Ki mitrithi hi tuidung angin a luang dût dûta, Mihaiin ni dân an zôm no sikin.

¹³⁷O RENGPA, nang chu ni fela, Ni roirêlna khom a idik a ni.

¹³⁸Ni dân pêkhai chu an dikin iam an iom a ni.

¹³⁹Ki sathnem irngaina hin a ni fâk zoi ta, A ni doituhaiin ni dân mahrip an tho no sikin.

¹⁴⁰Ni chonginkung hi a dik bâka na! Ni suak hin ki inhlu a ni.

¹⁴¹Michîn le hmusitom ki nia, Khannisianlân, nir chûtirna thuhai chu irnghil ngai ma unga,

¹⁴²Ni felna chu kumkhua’n om mai a ta, Itiklai khomin ni dân chu a idik a ni.

¹⁴³Lungzîngna le irtha tâkna khan a ni dê tâka; Khannisianlân, ni thupêkhai chu ki lômna a ni.

¹⁴⁴Ni nir chûtirnahai chu kumkhua’n a ifel a ni; Inhriat thiamna ni pe ro, khanchu hring mai ki ti.

¹⁴⁵Ki lungrîl murdi’n nang kin sama; O RENGPA, ni sâm roh. Ni thupêkhai chu zôm ki ti.

¹⁴⁶Nang ki koi ngaia; ni sansuak ro, Khanchu ni dânhai chu zôm kin ti.

¹⁴⁷Kôlirsal mân ni changpui hrangin nang kin sama; Ni chonginkunga khan ki tûngna ki sia ngai.

¹⁴⁸Ni thu ki ngaitua theina hrangin, Zân khovârin ki meng ngai.

¹⁴⁹Ni lungkham lianna sikin ki hnukirhai hi irngaiin lân; O RENGPA, lungkhamin ki hringna hrung roh.

¹⁵⁰Mi nunsia, nuamninga ni lôtuhai khan an ni hong nâia, Anni chu ni dân zôm loi an ni.

¹⁵¹O RENGPA, nang chu ni ni nâi maia, Ni thupêkhai chu thutak a ni.

¹⁵²Tian ata ni nir chûtirna irthokin khahai kha; Kumkhua hrangin ni indet an nih ti kin hriat ta.

¹⁵³Ki dengtheizia hi enin lân, ni saninzôk ro, Ni dân chu ki’rnghil ngai no sikin.

¹⁵⁴Ki thu nin sîrpuiin, ni’rtanin lân; Ni thu ang takin nin hring roh.

¹⁵⁵Mi siahai chu saninhring ni no nia, Ni dân an zôm no sikin.

¹⁵⁶O RENGPA, ni lungkhamna chu an thûk vang na! Lungkhamin ni saninzôk roh.

¹⁵⁷Ni nêpsiatuhai le ni doituhai chu tamtak an nia, Khannisianlân, ni dân chu lôi ngai ma ung.

¹⁵⁸Vârirlethai chu lunghoi loi takin ki ena, Ni thu an zôm no sikin.

¹⁵⁹Ni nir chûtirna thuhai kin hlutzia hi irngaitua ta! O RENGPA, ni lungkham lianna sikin ki hringna hi hôi roh.

¹⁶⁰Ni thu irchû khom kha thutak a nia; Ni roirêlna fel tinrêng khom hi kumkhua’n om mai a ti.

¹⁶¹Mi lianhaiin a bi boiin nuamning an ni loa, Khannisianlân, ki lungrîl khan ni thuhai kha a ni, a ichi chu.

¹⁶²Ni thua hin ki ilôm a ni, Irchon hmu ang khan.

¹⁶³Milak hi ki hnôlin kin tira, Ni dân rêk chu ki inhlu a ni.

¹⁶⁴Sûn khata voi sari nang kin pâk ngaia; Ni roirêl felhai sikin.

¹⁶⁵Ni dân lungthunghaiin chu irtharngamna lian tak an nei ngaia; Ite’n inrîl thei ngai mah.

¹⁶⁶O RENGPA, ni saninhringna ki tûnga, Ni thupêkhai angin ki sin ngai a ni.

¹⁶⁷Ki hringna hin ni nir chûtirna chu a zôm ngaia; Ki inhlu tak tak a ni.

¹⁶⁸Ni thupêkhai le ni nir chûtirna thuhai chu ki zôm ngai, Ki om dân murdi hi ni hmu zit a ni.

¹⁶⁹O RENGPA, ki khêk irhâi hi ni kuang hong tung ri se; Ni thu ang takin inhriat thiamna ni pe roh.

¹⁷⁰Ki ngênna hi ni makung tung sianlân; Ni thu ang takin ni saninzôk roh.

¹⁷¹Ki bâi hin ni thu inpâkin zâi ri se; Nangma’n ni dânhai ni nir chûtir ngai sikin.

¹⁷²Ki milei hin ni thu inpâkin zâi ri se, Ni thupêk murdi chu a dik sikin.

¹⁷³Ni kut chu ni changpui hrangin irfûk diamin om ri se, Ni thupêkhai chu kin thang sikin.

¹⁷⁴O RENGPA, ni saninhringna chu ki’rngai bâka na! Ni dân chu ki lômna a ni.

¹⁷⁵Ki hringna hi inhring ro, khanchu nang inpâk ki ti, Ni nir chûtirna khan ni changpui roh.

¹⁷⁶Belra irhmang angin kin vâi irhmanga; Ni suak hi zong ro, Ni thupêkhai chu ki’rnghil ngai no sikin.