Read Hrangkhol INPÂKNA HLAHAI 132 Bible Online

INPÂKNA HLAHAI 132 - Hrangkhol bible

INPÂKNA HLAHAI 132

¹RENGPA, Davida chu a dengthei tuangna murdi inhrepui ro;

²RENGPA kuanga chong irkhâma, Jakoba Pathian roiinpui tak kuang chong an kungzia kha:

³“Ki omna ina lût viat no ning; Ki zâlhmuna khom lût viat no ning;

⁴Irngam no ninga, Ki mit khom insîng viat no ning,

⁵RENGPA hrang hmun, Jakoba Pathian hrât hrang, In ki hmu pe mâka chu,” tiin.

⁶Irngai ta, Bethlehem-a a Thuthung Bôm thurchi ei inhriata, Jearim hmuna ei hmu tâka.

⁷“A omna khan fe ei ta, A ke bula chubai lei mûk rei,” kin tia.

⁸O RENGPA, thoiin lân, Nangma le ni Thuthung Bôm leh khan ni Tempila hin lût ro. Ni hrâtna Bôm leh khatak khan kumkhua’n om ro.

⁹Ni ochaihai chu felna’n inthuam sianlân; Ni mi irthianghai chu raifânin khêk ri se.

¹⁰Ni siahlo Davida kuang chong nin kunga; Ni sahriak irthûtir hmêl chu irheikîrtir no ro.

¹¹RENGPA khan Davida kuang chonginkung det an kunga; Ama kha la nôk ta no nia; Nangma nâi ngei ni rêngtoihmuna khan intoitir ki ta,

¹²Ni nâihai khan ki thuthung le ki thupêkhai, Anni ki la’rchûtir hrang kha an zômin chu, An nâihai khom kumkhua’n ni rêngtoihmuna khan toi mai an ti,” tiin.

¹³RENGPA khan Zion chu an thanga; A omna hrangin a nuama.

¹⁴Hi hi kumkhuaa ki omna hrang hmun a nia; Hi hin om mai ki ta, ki nuam lam tak a ni.

¹⁵Zion chu a irsam murdia tamtakin satvur ki ta; A mi inrianghai chu bu’n inkhop ki ti.

¹⁶A ochaihai chu saninhringna’n inthuam ki ta, A mi irthianghai chu raifânna hla sakin khêk an ti.

¹⁷Kha khan Davida irchia mi inkhat rêng roiinpui takin siam ki ta; Ki rêng inthang ta hrangin meiser ki’rfûktir tâka.

¹⁸Ama doituhai chu mualphoina’n irkhû ki ta, Ama chunga rêk chu a rênglukhum chu irtêk sup a ti,” tiin.