Read Hrangkhol INPÂKNA HLAHAI 136 Bible Online

INPÂKNA HLAHAI 136 - Hrangkhol bible

INPÂKNA HLAHAI 136

¹O RENGPA kuanga lômthu hril roi, ama chu a saa; A lungkham lianna chu kumkhua’n om a ti;

²O pathianhai RENGPA kuang lômthu hril roi; A lungkham lianna chu kumkhua’n om a ti.

³O rênghai RENGPA kuang lômthu hril roi; A lungkham lianna chu kumkhua’n om a ti.

⁴Ama vaiin thilirkhêl roiinpuihai a tho ngaia; a lungkham lianna chu kumkhua’n om a ti.

⁵A vârnaa khan irvânhai khi a siama; A lungkham lianna chu kumkhua’n om a ti;

⁶Irnêng hi tui chunga a siam indinga; A lungkham lianna chu kumkhua’n om a ti.

⁷Ama khan misa le tha a siama; A lungkham lianna chu kumkhua’n om a ti.

⁸Misa, sûna vâr hrangin; a lungkham lianna chu kumkhua’n om a ti.

⁹Tha le ârsihai zâna vâr hrangin; A lungkham lianna chu kumkhua’n om a ti:

¹⁰Ama khan Aigupta nâilutîrhai a that tâka; A lungkham lianna chu kumkhua’n om a ti.

¹¹Israel mihai chu Aigupta ata a hruai suak tâka; A lungkham lianna chu kumkhua’n om a ti.

¹²Kut hrât le bân pharin a hruai suakhai tâka; A lungkham lianna chu kumkhua’n om a ti.

¹³Ama khan Tuipui Sen chu arsentir tâka; A lungkham lianna chu kumkhua’n om a ti;

¹⁴Israelhai chu a laitaka an kâitirhai tâka; A lungkham lianna chu kumkhua’n om a ti;

¹⁵Faroa le sipaihai chu Tuipui Sena khan an ngîm zoi ta; A lungkham lianna chu kumkhua’n om a ti.

¹⁶Ama khan a mihai chu ramchâra a hruai intunga; A lungkham lianna chu kumkhua’n om a ti.

¹⁷Ama khan rêng roiinpui takhai chu a thata; A lungkham lianna chu kumkhua’n om a ti.

¹⁸Ama khan rêng inthang takhai chu a thata; A lungkham lianna chu kumkhua’n om a ti;

¹⁹Amor-hai rêng Sihona chu a thata; A lungkham lianna chu kumkhua’n om a ti;

²⁰Basan ram rêng Oga khom a thata; A lungkham lianna chu kumkhua’n om a ti.

²¹An ram chu a mihai a pêka; A lungkham lianna chu kumkhua’n om a ti.

²²A suak Israelhai chu a pêka; A lungkham lianna chu kumkhua’n om a ti.

²³Ama khan ei nam intem laia khan a nin hriat maia; A lungkham lianna chu kumkhua’n om a ti;

²⁴Ama khan ni doituhai ata a ni saninzôka; A lungkham lianna chu kumkhua’n om a ti.

²⁵Ama khan mihring kuang fâkrua a pêka; A lungkham lianna chu kumkhua’n om a ti.

²⁶O irvân Pathian kuang khan lômthu hril roi; A lungkham lianna chu kumkhua’n om a ti.