Read Hrangkhol INPÂKNA HLAHAI 138 Bible Online

INPÂKNA HLAHAI 138 - Hrangkhol bible

INPÂKNA HLAHAI 138

¹O RENGPA, ni kuang ki lungrîl murdi’n lômthu hril ki ti; Pathianhai makunga khan nangma inpâkin zâi ki ti.

²Ni Biak In irthiang tiang irnghatin Chubai nang mûk ki ta, Ni lungkham lianna le hi thutak sikin nir hming inpâk ki ti. Ni thupêkhai le nir hming chu thil tinrêng nêkin nin lian tâka.

³Nang kin sam ni kha nangma’n ni ni sâma; Nangma hrâtna’n ni nin hrâta.

⁴O RENGPA, irnênga rênghai murdi khan nang inpâk ri sehai, Ni bâi thu suakhai chu an hriat tâka.

⁵A ni, RENGPA sinthohai chu hla’n sak sianlân; RENGPA roiinpuizia chu a sân a ilûminna a ni.

⁶RENGPA chu an chungtak ni khom sianlân, Mi irngaiintômhai kha ar ngaitua ngaia, Mi lârirpâkhai chu an kuanga irthokin irbi thei ngai mah.

⁷Lungzîng laia om khom inlân, Nangma’n ki hringna ni hrunga. Ki râl ningmurhai doi hrangin ni bân ni phara, Ni kut chang tiang ni saninzôk ni ti.

⁸RENGPA khan ki kuanga a chonginkung chu hlen a ta; Kumkhua’n om a ti. Nangma kut sinthohai hi hlo inchuk roh.