Read Hrangkhol INPÂKNA HLAHAI 139 Bible Online

INPÂKNA HLAHAI 139 - Hrangkhol bible

INPÂKNA HLAHAI 139

¹O RENGPA, nangma’n satakin ni ni ena, Ni nin hriat tâk.

²Nangma’n ki toi le ki ngîr nin hriat ngaia; Ki ngaituana hi hlatak ata khom nin hriat thiam ngai.

³Ki ife le ki zâl hi ni ni hmu mai ngaia; Ki om lam murdi hi nin hriat zit ngai.

⁴Ki chong mân khomin, Ki iti hrang tum chu nin hriat zit ngaia.

⁵Nang chu ki’rhîlin ni oma; Ni sinthotheina’n ni ni hrung ngaia.

⁶Khaang taka inhriatna chu ki hrangin a irkhêl a ni; A’rsâng hraia, ki inhriat phâk loi a ni.

⁷Nangma irtha kuang ata hi kho tiang mo ki irot hrang? Ni makung ata kho tiang mo ki intân irhmang hrang?

⁸Irvâna hong lui inlân, ama khan ni lei oma; Mithi khuaa zu zâl khom inlân, kha khan khom ni lei oma.

⁹Zîng mitha pharin, Tuikhanglian pên viata va om inlân,

¹⁰Khatak khan khom ni kutin ni hruai a ta; Ni kut chang tiangin nin tûk a ti.

¹¹“Inthimin nir khû irhmang sian, ki kôlvâr hi zân inthim ni ri se,” ti khom inlân,

¹²Inthim khomin nangma ata ite inhlî maka, Zân hi sûn angin a vâra, Ni hrangin chu inthim le vâr hi hmunkhat a ni.

¹³Nangma ngeiin ki takpumpui hi ni siama; Ka nu phîng sûnga nangma’n ni ni’rkhûa.

¹⁴Ni kuang lômthu hril ki ti; ichiom tak le irkhêl taka siam ki nia: Ni sinthohai hi a irkhêl a ni. Ama kha ki hringna hin an hriat infel zit a ni.

¹⁵Inrûka siamin ki oma, Ka nu phîng sûnga sataka irkhûa ki omhai khan, Ki ru chu ni makunga thupin om maka,

¹⁶Ki ruak la’rsiam loi chu ni mitin ni hmua. Ni lekhabua khan ki sûnhai hi irziak zit a nia; Inkhat lua an la om mân.

¹⁷O Pathian, ni ngaituanahai chu ki hrangin a hlu vang na! An tam bâk bâk ngaia!

¹⁸Tep ngân inlân, tuipui chiai nêkin tam ual a ti. Ki hong har tena khom ni kuang ki la iom dên a ni.

¹⁹O Pathian, mi siahai chu that ngêtin lân; A ni, thisen insua ngai mihai khan ni ma ri sehai.

²⁰Anni khan sa no takin nang an hrilsiata. Ni’rhming chu an hrilsiat ngai.

²¹O RENGPA, nangma hnôltuhai chu hnôl ma ung mo? Nangma doituhai chunga khan ki milung hi a ihoiloi mo ni ma?

²²Anni chu hnôl ta takin ki hnôla; Keima ni doituhai ang takin ki ibe a ni:

²³O Pathian, satakin ni ensuiin lân, Ki milung hi inhre ro; Ni fia’n lân, ki ngaituanahai hi inhre roh.

²⁴Khanchu, keimaa hin siatna lam rêng rêng a om mo, om ma mo enin lân, Kumtuang lama khan ni hruai roh.