Read Hrangkhol INPÂKNA HLAHAI 140 Bible Online

INPÂKNA HLAHAI 140 - Hrangkhol bible

INPÂKNA HLAHAI 140

¹O RENGPA, mi sualhai ata ni saninzôkin lân; Mi nunrônghai ata ni hrung roh.

²Anni khan an lungrîla thilsual an ngaituaa, Irsualna an siam ngai.

³An milei chu mirûl angin an intâta; An hner thuaia khan sokvom tûr a oma.

⁴O RENGPA, mi siahai kut ata chu ni hrungin lân, Mi nunrônghai kut ata khan ni hrung ro; Anni khan ki ke pêthai inrîlna hrang an tuma.

⁵Mi irsonghai khan kin ôkna hrang châng inrûkin an kama, sokvom leh; Lam sîra khan lên an dâpa, Kin ôkna hrang chânghai an kam ngaia.

⁶RENGPA kuang khan, “Nang chu ki Pathian ni nia; O RENGPA, changpui ki ngênna hnukirhai hi nir ngai pe ro!

⁷O RENGPA, ki Pathian, ki saninzôkna det, Nangma’n irdoi nia khan ki lu ni ni hôi pea.

⁸O RENGPA, mi siahai nuamlamhai chu pe no’n lân; An ngaituana’n sualhai chu hloinchuk pe no ro; khano’nchu an irpâkna itinin,” ki tia.

⁹A ni doituhai chu ki chunga inlal hrangin phal no’n lân; Anni hmûra chong sual ti khan irkhû ri se.

¹⁰Mei ir-alhai an chunga ta sianlân, meia paiin om sianlân; An thoinôk ta loina hrangin khurpadop inthûk takhaia paiin om ri se.

¹¹Dikloi taka mi hnôl ngaihai chu irnênga hin hmanchangsua’n om no nia; Mi nunrônghai khom siatna’n inhre a ta, irhmangtir a ti.

¹²RENGPA khan dengtheina tuanghai chu an chungchânga thop a ti, ti kin hriata, Mi irsamhai hrangin roirêl dik inlang a ti.

¹³Irkhêl loiin mi felhai khan nangma irhming inpâk an ta; Mi dikhai chu ni makunga om mai an ti.