Read Hrangkhol INPÂKNA HLAHAI 144 Bible Online

INPÂKNA HLAHAI 144 - Hrangkhol bible

INPÂKNA HLAHAI 144

¹RENGPA ki lungpui chu inpâkin om ri se! Ama khan ki kuthai hi râlkâp lam an irchu ngaia; Ki kut pârhai hi irdoi lam an irchu ngai.

²Ama chu ki lungpui le ki saninzôkna, Ki kulpui irsâng le saninzôkna, Ki phô ki iamna irnghatna, Mihai ki hnuaia kûn ngaitu chu a ni.

³O RENGPA, mihriam hi imo a nia ni inhriatmai ngai? Mihriam nâipa khom hi imo a nia ni ingaitua ngai?

⁴Mihriam hi chanlamboi chian ang kha a nia; A hring sûng sûnhai hi irhlîm intân ang hi a ni.

⁵O RENGPA, irvân inkûntirin zuang chumin lân; Tânghai chu tônin lân, khanchu a khû suak an ti.

⁶Kôlhai irlektirin lân, annihai chu indartir ro; Ni thalhai chu kâp suakin lân, annihai chu laizâm inthotir ro.

⁷Chung tianga irthokin ni kutin zun banin lân, Tuilianhai ata ni kaisua’n lân, ni sansuak ro; Ram dang mihai irchamneina ata hi ni saninzôk ro.

⁸An bâi khan milak an hrila, Khomâk irsâm pumin milak an tho ngai.

⁹O Pathian, nangma chôiindômin hla thar sak ki ta; Perkhuang hrui sôm nei leh nangma inpâkin zâi ki ti.

¹⁰Ama chu a ni, rênghai kuang zôkna pêka, Khandai mi’nsiat thei ata a suak Davida sansuaktu chu.

¹¹Ki râl ata chu ni sansuakin lân; Ram dang mihai kut ata ni saninzôk ro, An bâi khan milak an hrila, An kut chang tiang chu kut chang tiang dik loi a ni.

¹²Thing irsôna intuai duam angin kin nâihai khom intuai duamhai sianlân; Kin nâinuhai khom lung isin enhoi tak, rêng in kil irvôtu ang kha ni ri sehai.

¹³Kin fasiarhai hong sipin Thil tinrêng om sep sup sian, Kin belrahai khomin a tê sâng tamtak nuai tamtak kin ramhaia hong pung ri sehai.

¹⁴Kin sialhai khom hong punghai sianlân; An rûktu le ar hmangtirtu om loiin, Kin mikot tuala lungzîng khêk hnukirhai om no ri se.

¹⁵A ni, khaanga satvurna donghai kha chu an vân a sa; RENGPA Pathiana nei mihai chu an vân a isa a ni.