Read Hrangkhol INPÂKNA HLAHAI 148 Bible Online

INPÂKNA HLAHAI 148 - Hrangkhol bible

INPÂKNA HLAHAI 148

¹RENGPA chu inpâk roi! Irvâna irthokhaia khin RENGPA chu inpâk unglân, Chung tianghaia khin ama chu inpâk roi.

²O vântirtôn mihaio, ama chu inpâk unglân, A sipai murdihaio, ama chu inpâk roi.

³Misa le thahaio, ama chu inpâk unglân; Ârsi vâr murdihaio, ama chu inpâk roi.

⁴Irvân irsânghaio, ama chu inpâk unglân; Irvân chunga tui omhaio, ama chu inpâk roi.

⁵Khahai murdi khan RENGPA irhming chu inpâk roi; Ama khan thu a pêka, siamin an hong om tâka.

⁶Ama khan khahai kha kumkhontuanga hrangin an dettira, Thu, a boi thei taloi hrang chu an kunga.

⁷Irnênga irthokin RENGPA chu inpâk unglân, Nangni dragonhai le tui inthûk murdihaio,

⁸Mei le irialhai, ivur le sûmhaio, A thu zôm ngai phâivopuihaio, RENGPA chu inpâk roi.

⁹Tâng lian le tâng chîn murdihaio, Thing ra nuamhai le sidar thing murdihaio, Ama chu inpâk unglân;

¹⁰Ramsahai le a insûng sa murdihaio, Thilhring le chunga vuang vâhaio, Ama chu inpâk roi.

¹¹Irnêng rênghai le mi tinrênghaio, Mi lianhai le irnênga roirêl murdihaio; Ama chu inpâk roi.

¹²Dôngmate le ruathartehaio, Tar le nâipanghaio; Ama chu inpâk roi.

¹³Khahai murdi khan RENGPA irhming chu inpâk ri sehai, Ama irhming vai hi chôiindômin a oma; A roiinpuina khan irnêng le irvân a ikhêl zit a ni.

¹⁴A mihai chu an hrâttirhaia, Khanchu a mihai khan ama an inpâk theina hrangin, a mi Israelhai, a kôla mihai inpâkna chu. RENGPA chu inpâk roi!